Kasin Akaparaan Kayo no Walay Onsabin Kalamidad?
1. Akin a makabat so pagmaliw ya akaparaan antis ya onsabi iray kalamidad?
1 Kada taon, minilyon a totoo ed sankamundoan, pati dakel ya agagi tayo, so naaapektoan na saray yegyeg, tsunami, nepnep, bagyo, maksil ya alimbusabos, tan delap. Lapud agnailaloan so isabi na saray kalamidad a nayarin mangapekta ed siopaman ed sikatayo, makabat so masakbay lan pamparaan.—Uli. 21:5.
2. Akin a nepeg tayon iter ed saray mamatatken so sankabaloan ya address tan numero na telepono tayo?
2 Sakbay na Kalamidad: No maminsan et nipapasakbay la na saray autoridad so isabi na saray kalamidad. Kanian, importante so pangimano ed saratan a pasakbay. (Uli. 22:3) Diad oniaran kipapasen, panggunaetan na saray mamatatken a kontaken so amin a kakongregasyon da pian natulongan da iran makapanparaan. Kayari na kalamidad, panggunaetan lamet na mamatatken a kontaken so amin a kakongregasyon da ta pian naamtaan da so kipapasen na saray agagi tan no anton tulong so nakaukolan da. Napirdi labat so mablin panaon no saray mamatatken et andian na sankabaloan ya impormasyon a pakakontakan ed agagi. Kanian importante ya iter na saray manangipalapag so sankabaloan ya address tan numeroy telepono ra ed sekretaryo tan say manangasikaso na CBS da.
3. Panon itayon mikoopera ed saray mamatatken no manaayam tayo ed lugar a naynay a naaapektoan na kalamidad?
3 No say kongregasyon et walad lugar a naynay a naaapektoan na kalamidad, kerewen na saray mamatatken ed saray manangipalapag so ngaran tan numeroy telepono na sakey a kanayon odino kaaro ra a manaayam ed arum a lugar a nayarin kontaken no walay emerhensia. Saya so makatulong ed saray mamatatken pian naanap da iramay inmalis ed arum a lugar. Nayari met a manplano laray mamatatken no anto so gawaen na kongregasyon da sano walaray ag-iilaloan a nagawa, a mangilaktip ed sakey a listaan na saray manunan bengatla a kaukolan ya itarya na kada sakey, saray uksoyan a pan-evacuate, tan saray uksoyan pian tulongan iramay walaan na nikaduma iran pankaukolan. Importante so pikoopera ed sarayan maaron uksoyan.—Heb. 13:17.
4. Anto so nepeg tayon gawaen sano walay agawan kalamidad diad lugar tayo?
4 Kayari na Kalamidad: Anto so nepeg yon gawaen no walay agawan kalamidad ed lugar yo? Seguroen yon naasikaso iray manunan pisikal a pankaukolan na pamilya yo. No nasarag yo, tulongan met so arum ya apektado. No posible, kontaken yon tampol so manangasikaso na CBS yo odino arum nin matatken. Onia so nepeg yon gawaen anggano agkayo apektado tan agmankaukolan na tulong. Balet, no nakaukolan yo so tulong, makaseguro kayo a gagawaen na saray agagi yo so amin a nayarian da pian natulongan kayo. (1 Cor. 13:4, 7) Nodnonoten ya amta nen Jehova so kipapasen yo tan manmatalek kayo ed sikato a tulongan to kayo. (Sal. 37:39; 62:8) Manalerto kayo ed antokaman a pankanawnawan ontulong ed arum diad espiritual tan emosyonal a paraan. (2 Cor. 1:3, 4) No posible, ituloy yo lan tampol so teokratikon aktibidades yo.—Mat. 6:33.
5. Bilang Kristiano, panon so ikiwas tayo ed saray nagagawan kalamidad?
5 Anggaman pakakagonigonan a maong na katooan iray nagagawan kalamidad, sikatayo so matalek a makapanilalo ed arapen lapud magano lan naandi so amin a kalamidad. (Apo. 21:4) Kaleganan ni, makapanggawa itayo na makatunongan iran kundang pian naparaanan tayo iray panaon na gonigon tan irap legan tayon pansiasiansiaen so seseg tayon mangiyabawag ed maong a balita.