Tepet

◼ Panon tan siopay nepeg a mangiparungtal ed panlukas a kanta ed Teokratikon Eskuelaan Parad Ministeryo, Pantitipon Parad Panagserbi, Publikon Paliwawa, tan Panagaral na Panag-Bantayan?

Saray panlukas a kanta parad sinimban Teokratikon Eskuelaan Parad Ministeryo so akalista ed Eskedyul ed Teokratikon Eskuelaan Parad Ministeryo a walad insert na Nobyembre a Ministeryo Tayo ed Panarian. Say panlukas tan pansara iran kanta ed sinimban Pantitipon Parad Panagserbi so naromog ed pahina 2 na Ministeryo Tayo ed Panarian. Ontan met, saray numero na kanta parad sinimban Panagaral na Panag-Bantayan so naromog ed pahina 2 na kada isyu na Say Panag-Bantayan. Saray kantan usaren so ipapasen a kabiangan na pantitipon tan kaukolan sirin ya iparungtal na agi a mangikokondukta ed pantitipon imbes a say tsirman na akaunan pantitipon.

Alimbawa, say manangasikaso na Teokratikon Eskuelaan Parad Ministeryo so mangabrasa ed saray dumerengel, iparungtal to so panlukas a kanta, ikondukta to so eskuelaan, insan to tawagen so unonan walay betang ed Pantitipon Parad Panagserbi. Satan ya agi a walaan na parte ed Pantitipon Parad Panagserbi so nepeg a mangiparungtal ed kanta bilang panlukas ed Pantitipon Parad Panagserbi.

Ontan met so gawaen ed Publikon Paliwawa, igapo itan na tsirman. Abrasaen to so amin ya inmatendi tan kerewen to ed sikaran mibiang ed panganta ed panlukas a kanta a pinili na espiker. Say tsirman (odino nayarin sananey a kualipikadon agin laki ya apabtangan lan masakbay) so mangilukas ed pantitipon panamegley na pikakasi. Iparungtal to so espiker tan salambiten to so tema na paliwawa to. Kayari na paliwawa, ibalikas na tsirman so apresasyon ed naawat ya instruksion ya agto la susumaryoen iray punto ed paliwawa na espiker. Ipakabat to so titulo na publikon paliwawa ed ontumbok a simba, insan to imbitaan so amin ya inmatendi a mansiansia parad Panagaral na Panag-Bantayan. Agla kaukolan a kerewen na tsirman no kasin labay na saray inmatendi ya ipawit so panangaro tan panangomusta ed kongregasyon na bisitan espiker. Insan, tawagen na tsirman ed plataporma so manangidaulo ed Panagaral na Panag-Bantayan.

Iparungtal na manangidaulo na Panagaral na Panag-Bantayan so unonan kanta ya usaren a mitukoyan ed panagaral. Idaulo to so panagaral a mitunosan ed nipalapag iran instruksion insan to iparungtal so pansaran kanta. Kaslakan et kerewen na manangidaulo na Panagaral na Panag-Bantayan ed agin angiter na publikon paliwawa a sikatoy mangidaulo na pansaran pikakasi.

Say panumbok ed sarayan inkalapagan a totontonen so ontulong pian naseguro a saray pantitipon ed kongregasyon et nikokondukta a manpapara.