Makapaliket Iran Pananguman ed Say Panag-Bantayan!
1 Diad banda’d gapo na sayan taon, naawat na saray kongregasyon so makapaliket ya anunsio: Manlapu la no Enero 2008 et wala lay duaran nandumaan ya edisyon na Say Panag-Bantayan, say sakey et para publiko tan say sananey et parad sikatayoran agagi! Anganko et nitepet yo: ‘Antoy pandumaan na duaran magasin? Antoray bentaha no nawalaan itayo na nandumaan ya edisyon? Kasin walaray balon kabiangan a talaranan tayo?’
2 Saray Pandumaan: Say isyu ya apetsaan na unonan agew na bulan et natawag a Para Publikon Edisyon. Amin ya artikulo ed sayan isyu so intarya parad pakagunggonaan na publiko. Say isyu ya apetsaan na akinsi na bulan so natawag a Panaralan ya Edisyon tan ag iyopresi ed lawak na kimeyan. Lugan na saya so amin ya artikulo ya aralen ed loob na sakey bulan, ontan met ed kaaruman iran artikulo a seguradon nagustoan na saray dedikadon Kristiano. Say Para Publikon Edisyon na Say Panag-Bantayan et aglabat nagustoan na saray Tasi noag pati saray mangaawat ed Biblia ya aliwan Tasi. Diad biek a dapag, say Awake! so siansia nin parad amin lawarin totoo, kaiba la’d satan iramay agtanto manisia tan saramay aliwan Kristiano.
3 Saray Bentaha: Diad Panaralan ya Edisyon, agla kaukolan ya ipaliwawa ni iray termino a singa say “payunir” pian natalosan na saray aliwan Tasi. Lugan met na sayan edisyon so diretsaan ya impormasyon parad saray Tasi nen Jehova tan iyaaralan na Biblia ya ombubulaslas la ed espiritual. Komusta balet so Para Publikon Edisyon? Lapud saray tema tan estilo na panangisulat et para publiko, seguradon labalabay a basaen na aliwan Tasi so interon magasin. Siempre, amin a Tasi so nagunggonaan diad pambasa ed kada isyu. Lapud sakey labat a Panag-Bantayan tan Awake! so iyopresi tayo ed kada bulan diad lawak na kimeyan, pankanawnawa tayoy makapanggawa na epektibo iran presentasyon ed interon bulan.
4 Balo Iran Kabiangan: Walaray implanon ipilaktip ed Say Panag-Bantayan diad Para Publikon Edisyon. Say sakey a kabiangan et say paningbat ed Makasulatan iran bangat diad simsimplin paraan. Say sakey ni et say pangiparungtal ed no panon a makatulong so Biblia ed saray pamilya. Wala met so ipresenta iran proyekto a panagaral ed Biblia parad saray kalangweran. Diad kada isyu et walay artikulo a mangipabitar ed espisipiko iran teksto a mangibangat ed sikatayo nipaakar ed saray kalidad nen Jehova.
5 Mailalo kamin bendisyonan nen Jehova iyan balon uksoyan ed Say Panag-Bantayan. Komon ta nipasabi na satan a magasin, ontan met na Awake! so maong a balita ed mas dakel nin makanepegan.—Mat. 10:11.