Say Balon Panaralan ya Edisyon na Say Panag-bantayan
SAY magasin a babasaen yo et sankaunaan ya isyu na panaralan ya edisyon na Say Panag-Bantayan. Labay min isalaysay so pigaran kabiangan na sayan magasin a balo lay format to.
Sayan edisyon et impalapag parad saray Tasi nen Jehova tan ed maaligwas iran iyaaralan na Biblia. Saya so ipalapag a maminsan ed sakey bulan tan lugan na saya so apatira odino limaran aaralen iran artikulo. Say eskedyul na panaral ed sarayan artikulo et naromog ed apis na sayan magasin. Aliwan singa say parad publikon edisyon, say panaralan ya edisyon et agmansalat na itsuray apis ed kada isyu, lapud ag-itan iyopresi.
Diad pahina 2 na sayan magasin, naromog yoy antikey a sumaryoy gagala na balang artikulo odino serye ontan met ed listaan na kaaruman iran artikulo. Mausa-usar itan a sumaryo ed saray mangikokondukta na Panagaral ed Panag-Bantayan, legan iran mangipaparaan na makabaliksan a paningbat ed saray artikulo diad aral na kongregasyon.
Naimano yo a mas antikey natan iray aaralen ya artikulo. Kanian, mas dakel a panaon so nigana ed paningbat na saray manunan teksto legan na Panagaral ed Panag-Bantayan. Papasesegen mi kayon basaen so amin a nisitan teksto kada simba. Saray teksto ya amarkaan na “basaen” et kaukolan a basaen tan pantongtongan legan na Panagaral na Panag-Bantayan. Nayarin basaen met iray arum a teksto no iyabuloy na panaon. Diad arum ya artikulo, naimano yon wala iray tekston amarkaan na “ikompara.” Lapud ag-iratan direktan mikonektaan ed saray manunan punto na parapo, anggano agla basaen iratan legan na aral. Ingen, walay lugan na saratan a teksto a kaaruman ya impormasyon, odino saratan so agdirektan manusuporta ed saray punto a pantotongtongan. Kanian papasesegen mi kayon basaen iratan legan kayon manpaparaan parad Panagaral na Panag-Bantayan, ompan nausar yo ed komento yo.
Say tinaon a report et agla ipalapag ed Say Panag-Bantayan. Onggapo ed 2008, satan so kalaktip la na Ministeryo Tayo ed Panarian tan diad Yearbook. Ingen, singa nibaga la, say panaralan ya edisyon et walaan na kaaruman iran artikulo. Anggaman dakel ed saraya so agnakonsidera diad aral, pasesegen mi kayon basaen irayan maong. Lapud lugan met na saratan so espiritual a tagano a nanlapud “matoor tan makabat ya aripen.”—Mat. 24:45-47.
Kaunoran, say panaralan ya edisyon tan edisyon a parad publiko na Say Panag-Bantayan et aliwan nandumaan a magasin. Sikaray namparan Say Panag-Bantayan a Mangipapalapag na Panarian nen Jehova. Diad pahina 2 na sarayan magasin et walaray parehon parapo a mangipapaliwawa ed gagala na Say Panag-Bantayan. Sarayan isyu so nampara met a naromog ed tinaon a tomo tan parehon pangalaan na materyal ya onapireng ed “Kasin Nanonotan Yo?” ya iyimprinta ed panaralan ya edisyon.
Panaon man na bakal, kairapan na bilay tan panamasegsegang, Say Panag-Bantayan so matoor ya angiproklama na katuaan nipaakar ed Panarian na Dios nanlapu la nen 1879. Ipikasi mi a diad panamegley na panamendisyon nen Jehova, et ontan so mantultuloy nin gawaen na sayan magasin a balo lay format to. Kerewen mi ed si Jehova a bendisyonan to kayo ran bumabasa, legan yon usaren ed epektibon paraan iyan balon panaralan ya edisyon na Say Panag-Bantayan.