Makanan Kalat ed Balon Serbisyon Taon
1. Anton kalat so nayarin ikonsidera tayo parad balon serbisyon taon?
1 Nepeg a walaray kalat tayo no labay tayoy onaligwas ed espiritual. Antoray kalat yo parad balon serbisyon taon? Say sankaabigan a kalat et say pan-auxiliary payunir a sakey odino pigaran bulan. Lapud kaslakan lan mankakaukolan na masakbay a panagplano iyan maliket a kimey, natan la so maabig a panaon a manplano. Akin ya ikonsidera so pan-auxiliary payunir bilang kalat?
2. Akin a gawaen a kalat so panag-auxiliary payunir?
2 Saray Rason Pian Man-auxiliary Payunir: Say panag-auxiliary payunir so ontulong ed sikatayo pian nagkalalon napaliket tayoy mangatatawen ya Ama tayo diad pamadaak na oras ed ministeryo. (1 Tes. 4:1) Diad pannonot tayo ed amin a ginawa nen Jehova ed sikatayo, pakiwasen itayo na kapusoan tayo a sikatoy ipakabat ed arum. (Sal. 34:1, 2) Iimanoen tan papablien nen Jehova iray panagsakripisyo tayo a napadaak so nagawaan tayo ed ministeryo. (Heb. 6:10) Lapud amta tayon napapaliket tayoy Jehova ed impasyan kimey tayo, satan so lapuan na baleg a gayaga tayo.—1 Awa. 29:9.
3, 4. Panon itayon nagunggonaan ed panag-auxiliary payunir?
3 Kaslakan, no lalo yon gagawaen so sakey a bengatla, mas mainomay tan lalon makapaliket itan. Say pangusar na dakel a panaon ed ministeryo so ontulong ed sikatayon magmaliw a matalek ed panagpulong. Magmaliw kayon lalon marunong ed pangigapo na tongtongan tan ed panangusar na Biblia. No lalo yon itotongtong so pananisia yo, lalon ombiskeg itan. Dakel ed saray andian na iyaaralan na Biblia so akalmo nen nan-auxiliary payunir ira.
4 Say panag-auxiliary payunir so nayarin ontulong pian lalon onligsa ed espiritual. Amoria na sakey a datin regular payunir a dakel a panaon so nauusar to ed sekular a trabaho to tan denesidi toy man-auxiliary payunir a sakey bulan. Inkuan to: “Agko napanisiaan so imbisbiskeg na espiritualidad ko ed loob labat na sakey bulan! Denesidik so man-auxiliary payunir a tuloytuloy, ya anggad nanregular payunir ak lamet.”
5. No liknaen tayon kulang so abilidad tayo, panon tayon natalonaan itan?
5 Panalona ed Saray Makakaamper: Arum so nayarin masuyat a man-auxiliary payunir lapud isipen dan kulang ni abilidad da ed panagpulong. No saya so makakaamper ed sikayo, natulongan kayo nen Jehova a singa ginawa to ed si Jeremias. (Jer. 1:6-10) Anggaman si Moises et ‘mabanayat a mansalita tan manawel so dila to,’ sikatoy inusar nen Jehova a manumpal ed linawa To. (Exo. 4:10-12) No isipen yon kulang so abilidad yo, patulongan ed si Jehova a makapanpakpel.
6. Panon a nayarin posible so pan-auxiliary payunir anggaman maletey so bunigas odino okupadoy eskedyul?
6 Kasin masuyat kayon man-auxiliary payunir lapud saray problema ed bunigas odino okupadon eskedyul? No maletey so bunigas yo, nagawaan yoy man-auxiliary payunir unong ed paraan ya agkayo nairapan. No okupadoy eskedyul yo, nayari yon iyeskedyul ed arum a bulan iray agtanto importantin bengatla. Arum a walaan na sigpot-panaon a trabaho so angaliw na panaon pian man-auxiliary payunir diad impanbakasyon da na sakey odino duaran agew.—Col. 4:5, NW.
7. Akin a mapetepet ya ipikasi so panag-auxiliary payunir?
7 No Panon a Gawaen Itan: Ipikasi yoy pilalek yo. Kerewen ed si Jehova a bendisyonan toray sagpot yo pian napalaknab so ministeryo yo. (Roma 12:11, 12) Natulongan to kayon manggawa na makabat iran desisyon ed no panon ya iyarunsa so eskedyul yo. (Sant. 1:5) No andian kayo na pilalek, kerewen ed si Jehova a tulongan to kayon napanggayagaan so panagpulong a kimey.—Luc. 10:1, 17.
8. Panon a say pangiyaplika ed Uliran 15:22 so ontulong ed sikayon man-auxiliary payunir?
8 Bilang pamilya et pantongtongan so kalat a panag-auxiliary payunir. (Uli. 15:22) Ompan say sakey a membro na pamilya so makapan-auxiliary payunir diad panuporta na arum a membro na pamilya. Itongtong ed arum a kakongregasyon yo so pilalek yon manpayunir, nagkalalo la ed saramay mipadparay sirkumstansya yo. Saya so mangarum na ligsa ed panag-auxiliary payunir.
9. Dinan iran bulan so nayarin pilien yo a pan-auxiliary payunir?
9 Legan yon rerepasoen so teokratikon eskedyul yo parad balon serbisyon taon, kapigan kayo makapan-auxiliary payunir? No mantratrabaho odino mani-eskuela kayo, nayarin labay yon ikonsidera iray bulan a walaay holiday odino limaray Sabado odino Simba. Singa bilang, say Setyembre, Disyembre, Marso, tan Agosto so walaan na limaran sampot-simba. Say bulan na Mayo so walaan na limaran Sabado, tan say Hunyo so walaan na limaran Simba. No maletey so bunigas yo, ikonsidera iray bulan a kaslakan et maabig so panaon. Nayarin labay yo met ya ikonsidera so panagpayunir legan na bulan ya akaeskedyul ya ombisita so manangasikaso na sirkito ed kongregasyon yo. Legan na bisita to, nawalaan kayo na pankanawnawan onatendi ed unonan parte na miting kaiba iray regular payunir. Lapud say Memoryal no ontumbok a taon et ombana ed Marso 22, maabig iray bulan na Marso, Abril, tan Mayo a pan-auxiliary. No akapili kayo la na bulan odino pigaran bulan a pan-auxiliary payunir yo, mangisulat na eskedyul a makatulong ed sikayo pian naabot so kakaukolanen ya oras.
10. Antoy nagawaan yo no aliwan posible so man-auxiliary payunir?
10 Anggano isipen yo ya agyo sarag so man-auxiliary payunir legan na ontumbok a serbisyon taon, napansiansia yoy inkaseseg ed ministeryo. Itultuloy a gawaen so anggaan na nayarian yo ed ministeryo, a matalek a napapaliket si Jehova ed interon-kamarerwa a sagpot yo pian iter so sankaabigan yo. (Gal. 6:4) Magmaliw a masuporta, tan pasesegen iramay makasarag a man-auxiliary payunir. Ompan sarag yon iyarunsa so eskedyul yo pian makapangigana ni na sanagew a pibiang ed ministeryo kaiba iramay manpapayunir.
11. Akin ya apurado lay panaon tayo?
11 Natatalosan na saray totoo nen Jehova ya apurado lay panaon. Wala so kimey a kaukolan a nasumpal, salanti, say pangipulong ed maong a balita. Nalalanor so bilay, tan daiset lay nakekeran panaon. (1 Cor. 7:29-31) Say aro ed Dios tan ed kaparan too so mamakiwas ed sikatayon gawaen so anggaay nayarian tayo ed ministeryo. Tekep na sagpot tan maabig a panagplano, nayarin makapan-auxiliary payunir tayo na anggan sakey bulan legan na balon serbisyon taon—peteg a sakey itan a makanan kalat!