Iplano la Natan a Palaknaben so Ministeryom
1. Anton nikaduman pankanawnawa so walad sikatayo diad panaon na Memoryal, tan panon tayon manparaan parad satan?
1 Kada panaon na Memoryal, pankanawnawa tayon ‘pisalamatan na balbaleg si Jehova.’ (Sal. 109:30) Palaknaben mo kasi ministeryom diad Marso pian nipanengneng moy pisasalamat mo ed samay angitarya na dondon? Natan la so pamplano.—Uli. 21:5.
2. Panon kan kinmiwas pati saray arum ed probisyon ya binawasay kakaukolanen ya oras parad auxiliary payunir nen imbeneg ya Abril?
2 Pan-Auxiliary Payunir: Nen imbeneg ya taon malikeliket iray kongregasyon sanen naamtaan dan sarag day man-auxiliary payunir na Abril ya mas daiset so oras ya kaukolan dan aboten. Oniay insulat na sakey ya brother: “High school ak ni labat, tan singa agko ni sarag so man-regular payunir. Man-apply ak parad 30 oras balet pansagpotan kon aboten so 50 oras ed bulan na Abril.” Insulat na sakey a sister ya mantratrabahon full-time: “Talomplon oras—magangganon aboten ‘tan!” Sanen inyanunsio iyan probisyon, imbaga na sakey a datin payunir ya 80 años to la natan: “Abayag ko lan aalagaren iya! Amta nen Jehova ya say impanpayunir ko so sankaabigan ya panaon ed bilay ko!” Saray arum ya agmakapan-payunir et gagawaen dan kalat so panggaway mas dakel ed ministeryo.
3. Akin et maabig ya nonoten so pan-auxiliary payunir diad Marso, Abril, tan Mayo?
3 Maabig so pan-auxiliary payunir no Marso lapud sarag tayo lamet so manpili no 30 odino 50 oras so aboten tayo. Ontan met, onggapo no Sabado, Marso 17, mibiang tayo ed espisyal ya kampanya a pangimbitad arum pian nakaiba tayo rad Memoryal no Abril 5. Seguradon na-enjoy na dakel so impamalaknab dad ministeryo da kanian labay da lamet so man-auxiliary payunir diad Abril tan Mayo, ya 50 oras so aboten da.
4. Antoy gawaen tayo pian napalaknab so ministeryo tayo, tan antoy magmaliw a resulta?
4 Diad ontumbok ya Panagdayew na Pamilya yo, agta maabig no pantongtongan yo no panon ya napalaknab na kada sakey ed sikayo so ministeryo to legay panaon na Memoryal? (Uli. 15:22) Kerewen ed si Jehova ya bendisyonan to ray sagpot yo. (1 Juan 3:22) Diad pamapalaknab yoy ministeryo yo, agyo labat naarumay panangidayew yod si Jehova noagta naaruman yo met so liket yo.—2 Cor. 9:6.