Magmaliw a Maliket ed Sayan Panaon na Memoryal!
1. Antoy sakey a paraan pian magmaliw kan mas maliket ed sayan panaon na Memoryal?
1 Labay mo kasi magmaliw a mas maliket legay bulan na Marso, Abril, tan Mayo? Sakey a paraan pian nagawaan mo itan et palaknab moy ministeryom tan, no posible, man-auxiliary payunir ka. Panon iyan mangarum ed liket mo?
2. Panon ya mangarum ed liket tayo so pamalaknab ed ministeryo?
2 Arumay Liket Mo: Pinalsa itayo nen Jehova ya naliknay liket diad pandadayew ed sikato legan tayon pepeneken so espiritual a pankaukolan tayo. (Mat. 5:3) Ginawa to tayo met ya makaliknay liket no mangiter tayod arum. (Gawa 20:35) Lapud ministeryo, posible tayon makapandayew ed Dios tan natulongan iray totoo. Kanian no aruman tayoy pibiang tayod ministeryo, mas maliket itayo. Sakey ni, no naynay tayon manpupulong, magmaliw itayon mas marunong. Tan no marunong itayo, nawalaan tayoy kompiyansa tan nabawasay pannerbiyos tayo. Nawalaan tayoy mas dakel a pankanawnawan manpulong tan makapangigapoy panangiyaral na Biblia. Lapud saraya, magmaliw a mas maliket so ministeryo.
3. Akin a say Marso tan Abril et maabig iran bulan parad pan-auxiliary payunir?
3 Say Marso tan Abril et maabig iran bulan parad pan-auxiliary payunir ta sarag tayoy manpili na oras ya kaukolan tayon aboten, balanglan 30 odino 50 oras. Ontan met, manlapu lad Sabado, Marso 22, tan manpatuloy anggad Memoryal no Lunes, Abril 14, sarag tayoy mibiang ed makapaliket a pangimbita ed arum ya onatendid Memoryal. Seguradon malikeliket iray kongregasyon a mankakasakey a mankimey pian anggad posible et nasumpal so teritorya diad ingganan panaon.—Sof. 3:9.
4. No labay tayoy man-auxiliary payunir, antoy kaukolan tayon gawaen?
4 Manparaan La Natan: No agmo ni iya agawaan, usisam so eskedyul mo tan nengneng mo no anto ray kaukolan mon i-adjust pian napalaknab moy ministeryom diad sakey odino pigaran bulan. Ipikasim iya. (Sant. 1:5) Itongtong iyad pamilyam tan arum ya agagid kongregasyon. (Uli. 15:22) Napaneknekan mo ya anggano makapuy so laman odino full-time kad trabahom, sarag mo met so magmaliw a maliket ed pan-auxiliary payunir.
5. Antoy resulta no palaknaben tayoy ministeryo tayo ed sayan panaon na Memoryal?
5 Labay nen Jehova ya maliket iray lingkor to. (Sal. 32:11) No mansagpot tayon palaknabey ministeryo tayo ed sayan panaon na Memoryal, agti labat magmaliw a mas maliket noagta napaliket tayo met so Ama tayo ed tawen.—Uli. 23:24; 27:11.