Panaon na Memoryal—Pankanawnawa Pian Padaakey Kimey!
1. Akin et sarag tayon padaakey kimey tayo kaleganay Marso, Abril, tan Mayo?
1 Sarag mo ’tan padaakey kimey mo’d ministeryo legan na panaoy Memoryal? Diad dakel a lugar et marakep so tiempo ed sarayan bulan. Bakasyon na arum a manangipalapag diad trabaho odino eskuelaan kanian nausar day panaon da’d ministeryo. Onggapo no Abril 2, naliketan itayon mibiang ed espisyal a kampanya na pangimbita’d saray interesado ya onatendi ed Memoryal no Abril 17. Kayari na satan, panggunaetan tayon bayuboan so interes na saramay inmatendi tan imbitaan ira ed espisyal a paliwawa a nagawa’d simba na Abril 25. On, dakel so paraan pian napadaak tayoy kimey tayo legay Marso, Abril tan Mayo.
2. Anto so sakey a maabig a paraan pian napadaak so kimey tayo?
2 Pan-Auxiliary Payunir: Say pan-auxiliary payunir et sakey a maabig a paraan pian napadaak so kimey. Lapud okupado tayon amin, nakaukolan so masakbay a pamplano tan pangiyarunsa ed eskedyul tayo. (Uli. 21:5) Ompan nayarian yon i-postpone iray agtanto importantin aktibidad yo. (Fil. 1:9-11) Agta maabig no ipaamta yo’d arum ya agagi so pilalek yon manpayunir pian naamtaan yo no makapan-auxiliary payunir met ira?
3. Panon a napadaak na saray pamilya so kimey da?
3 Diad ontumbok ya Panagdayew na Pamilya yo, maabig no pantongtongan iray kalat yo bilang pamilya. (Uli. 15:22) No walay kooperasyon, nayarin makapan-auxiliary payunir so arum a membro na pamilya diad loob na sakey odino pigaran bulan. Panon to no aliwa iyan posible? Sarag nin siansia na pamilya a padaakey kimey da diad pibiang ed ministeryo diad saray labi odino pampulong na andukdukey sano weekend.
4. Antoran bendisyon so nagamoran diad pamadaak ed kimey tayo’d ministeryo sano panaoy Memoryal?
4 Nanenengneng nen Jehova so amin a serbisyo tayo tan aapresyaen to iray sakripisyo tayo. (Heb. 6:10) Say pangiter ed si Jehova tan ed arum et lapuay liket. (1 Awa. 29:9; Gawa 20:35) Sarag mo ’tan padaaken so kimey mo ed panaoy Memoryal tan gamoray agnasabsabaan a liket tan bendisyon?