“Sigpot ya Ipulong so Maong a Balita”
1. Antoran maong a balita so kaukolan tayon inabang?
1 Diad mundo a matalag so maong a balita, walaan itayo na pribilehyon ‘mangipulong a sigpot ed maong a balita na agnapalumbasan a kaabigan na Dios.’ (Gawa 20:24, NW) Laktipen na saya so pangipaamta ed totoo a “saray kaunoran ya agew” et magano lan salatan na matunong a balon mundo nen Jehova, a ditan et “saray una a bengatla sikara so linmabas la.” (2 Tim. 3:1-5; Apo. 21:4) Diad satan a panaon et anggapo lay sakit. (Isa. 33:24) Saray inaatey ya inad-aro so ompaway ed pakanodnonotan a lubok tan nikasakey lamet ed pamilya tan kakaaro ra. (Juan 5:28, 29) Say interon dalin so magmaliw a marakdakep a paraiso. (Isa. 65:21-23) Pigara labat iraya ed saray maong a balita a kaukolan tayon inabang!
2. Akin a say panaon na Memoryal et maabig a pankanawnawa parad pangipulong ed maong a balita?
2 Saray bulan na Marso, Abril, tan Mayo so maabig iran pankanawnawa parad pangiyabawag na maong a balita. Legan na sarayan bulan et marakep so panaon tan andukey so agew diad dakel a parte na mundo kanian paborabli so pangusar na malaem ya oras ed ministeryo. Niarum ni, say sankaimportantian ya okasyon ed taon, say Memoryal, et selebraan ed interon mundo kaselek na agew no Sabado, Marso 22. Natan la so pamparaan pian padaaken so kimey ed lawak na serbisyo.
3. Anto so ontulong ed sikatayon napadaak so aktibidad tayo bilang pamilya?
3 Pan-auxiliary Payunir: Kasin niyareglo yoy eskedyul yo pian makapan-auxiliary payunir kayo na sakey, duara, odino taloran bulan? Akin ya ag-iya pantongtongan no ontumbok a panagaral yo bilang pamilya? No walay pantutulongan, nayarin makapan-auxiliary payunir so sakey odino pigaran membro na pamilya. (Uli. 15:22) Ipikasi iya, tan nengnengen so panamendisyon nen Jehova ed saray sagpot yo. (Uli. 16:3) Anggano anggapoy makapan-auxiliary payunir a membro na pamilya, amin et makapangiyuksoy na espisipiko iran kalat a napadaak so pibiang da ed ministeryo legan a mikikimey ed saramay makapanpayunir.
4. Panon tayon niyeskedyul iray kimey tayo pian makapan-auxiliary payunir anggano mantratrabaho tayo?
4 No mantratrabaho kayo, say maabig ya eskedyul so ontulong ed sikayon makapan-auxiliary payunir. Nayarin nisalet yoy manpulong legan na panangugto. Odino sarag yoy mangala na personal a teritorya ya asingger ed abung yo odino pantratrabahoan yo tan mibiang ed ministeryo ed loob na sakey oras odino onsulok ni antis odino kayari na trabaho. Nayarin sarag yon aruman so panaon yo ed panagpulong diad pangiguntang ed ag-importante iran bengatla ed arum a bulan tan diad pansanagew yo ed ministeryo ed saray sampot-simba. Arum so nambakasyon na sanagew odino duay agew pian makapaway ira ed lawak na serbisyo.
5. Panon kayon makatulong ed maedad la odino walay deperensya ed laman pian makapan-auxiliary payunir ira?
5 No maedad kayo la odino walay deperensya na laman yo odino maletey so bunigas yo, nayarian yoy man-auxiliary payunir diad pangusar na sandaraiset ya oras kada agew ed ministeryo. Kerewen ed si Jehova a pagamoran to kayo na “sankatageyan ya inkabaleg na pakayari.” (2 Cor. 4:7) Sakey ya agin bii so akapan-auxiliary payunir ed edad a 106! Diad tulong na saray Tasin kakanayon to tan arum a kakongregasyon to, sikatoy akapanpulong ed kabkaabungan, nanggawa na panagpawil, tan angikondukta na saray panangiyaral na Biblia, tan akibiang ed arum a nengneng na ministeryo. Sikatoy akatulong ed pangigapo na panangiyaral na Biblia ed samploran totoo. Inkuan to: “Legan kon momolimolien so alay abig a pribilehyok a makapanlingkor bilang auxiliary payunir, manleppua ed pusok so panangaro tan panamabli ed si Jehova, ed Anak to, tan ed maaron organisasyon To. Talagan kaliktan kon ibagay ‘salamat, Jehova!’”
6. Panon a posible parad saray bautismadon kalangweran a maneeskuela ni so pakapan-auxiliary payunir?
6 No sakey kayon bautismadon kalangweran a maneeskuela ni, nayarian yo met so man-auxiliary payunir. Singa saramay mantratrabaho, nayari yon igana iray sampot-simba ed ministeryo. Nayarin makapaway kayo ed loob na sakey oras odino onsulok ni kaditira yo ed eskuelaan. Wala tay holiday na eskuelaan a nigana yo ed ministeryo? No labay yoy man-auxiliary payunir, itongtong itan ed atateng yo.
7. Antoy nagawaan na saray mamatatken pian naaruman ni inkaligsa ed ministeryo legan na panaon na Memoryal?
7 Aruman ni Inkaligsa: Baleg so nagawaan na saray mamatatken pian naaruman ni inkaligsa na kongregasyon panamegley na ehemplo ra. (1 Ped. 5:2, 3) Nayarin natebek dan kaukolan so mangiyeskedyul na kaaruman iran pantitipon parad lawak na serbisyo parad saramay mibiang ed ministeryo ed kabkabuasan, kayari na eskuela, odino kayari na trabaho. Kaukolan a seguroen na manangasikaso na serbisyo a walaray kualipikadon manangipalapag ya apabtangan a mangidaulo tan kaukolan a walay magenap a teritorya, magasin, tan literatura parad sarayan bulan na espisyal ya aktibidad.
8. Antoy naaralan tayo ed eksperiensya na sakey a kongregasyon?
8 Diad sakey a kongregasyon et impaseseg na saray mamatatken so pan-auxiliary payunir pigay bulan ni ed asasakbay. Papakabatan da so kongregasyon kada simba ed no kaunongan a manangipalapag so naaabobonan a man-auxiliary payunir. Saya so amaseguro ed saramay manpilalek a mamadaak na pibiang da ed ministeryo a dakel so nakaiba ra. Inyuksoy da so kaaruman iran pantitipon parad lawak na serbisyo ed kabkabuasan tan ed pansirunget. Say resulta et 53 a manangipalapag so nan-auxiliary payunir ed Abril, ngalngali kapaldua na kongregasyon!
9. Akin a say panaon na Memoryal et maabig a panaon parad saramay kualipikadon magmaliw a manangipalapag na maong a balita?
9 Tulongan so Arum a Manpulong: Sano kualipikado la iray balo ni tan saray kalangweran a magmaliw a manangipalapag, nayarin imbitaan iran mikimey ed lawak na serbisyo kaiba iray eksperiensyado. Say ontan a pankanawnawa et nayarin nagawa legan na panaon na Memoryal sano dakel ed kongregasyon so mamadaak ed aktibidad da. Walaan kayo ta na progresibon iyaaralan na Biblia a manbibilay la unong ed saray matunong ya estandarte nen Jehova? Walaan kayo ta na makalakal ya ananak ya onaaligwas la balet aliwa ni ran manangipalapag? No pilalek da lay magmaliw ya agbautismadon manangipalapag tan natebek yon kualipikado la ira, ipaamta itan ed sakey ed saray mamatatken. Iyuksoy na mangidadaulon manangasikaso so pitongtong na duaran mamatatken ed sikayo kaibay anak yo odino say iyaaralan yo.
10. Antoy nagawaan na saray mamatatken pian natulongan iramay inaktibo?
10 Saray arapen a bulan so maabig met a panaon parad saramay inaktibo pian nitubat da lamet so kimey da ed kongregasyon. Saray manangasikaso na Panagaral na Kongregasyon ed Libro tan arum a mamatatken so nepeg a manseet ya ombisita ed saratan tan masimoon daran personal ya imbitaan a mikimey ed sikara ed ministeryo. No abayag iran inaktibo, duaran mamatatken so mitongtong nin unona ed sikara pian nadetermina no kasin kualipikado ira.—km 11/00 p. 7.
11. Anto so sankabalgan a panangipatnag na “agnapalumbasan a kaabigan na Dios?”
11 Manparaan Parad Memoryal: Say dondon et sankabalgan a panangipatnag na “agnapalumbasan a kaabigan na Dios.” (Gawa 20:24, NW) Minilyon a maapresian totoo ed interon mundo so mantitipon no Sabado, Marso 22, kaselek na agew, pian selebraan so Memoryal na impatey nen Kristo. Labay tayon imbitaan tan tulongan so amin a matuan impanpuson totoo ya onatende ed sayan importantin okasyon a mangipapabitar ed agnapalumbasan a kaabigan nen Jehova ed katooan.
12. Siopa so imbitaan tayo ed Memoryal?
12 Ilista iramay labay yon imbitaan. Seguradon kaiba ed listaan yo iray kakanayon, katrabaho odino kaeskuelaan, dati odino peles ya iyaaralan na Biblia, tan arum niran bibisitaen yon regular. No arum ed saray inimbitaan yo et walaray tepet da nipaakar ed Memoryal, nayarin makatulong ed sikayo so pangusar ed samay artikulon nipaakar ed Pangdem na Katawan diad apendesi na libron Ibabangat na Biblia, pahina 206-8. Saya so nayarin pakapangigapoan yo ni ingen na panangiyaral na Biblia, lapud mangiter itan na pankanawnawa pian iparungtal iyan publikasyon ya uusaren tayo ed pangiyaral na Biblia.
13. Panon a benindesionan nen Jehova iray sagpot na duaran manangipalapag a nanseet ya angimbita ed arum diad Memoryal?
13 Sakey ya agin bii so angilista na 48 a pamilya ya imbitaan to. Sano naimbitaan to lara, markaan toy kangaranan da tan isulat toy petsa na impangimbita to ed sikara. Sikatoy aliketan a maong ta 26 ed inimbitaan to so inmatendi ed Memoryal! Sakey ya agin laki a walaan na lakoan so angimbita ed sakey ya empleado to a datin pari. Inmatinde so laki tan kayari na satan et inkuan to, “mas dakel ni so naaralan ko ed Biblia ed sakey oras labat nen say naaralan ko ed loob na 30 taon ed Iglesia Katolika.” Ag-abayag kayari na Memoryal, sikatoy impaiyaralan na libron Ibabangat na Biblia.
14. Anto so kampanya ed interon mundo ya onggapo no Marso 1?
14 Kampanya: Manlapud Sabado, Marso 1, ya anggad Marso 22, ibunog ed interon mundo so espisyal ya imbitasyon ed Memorial. Amin so malabay a sigpot a makapibiang ed sayan importantin kampanya. Magmaong no personal ya ikdan so unabung na sakey ya imbitasyon nen say itilak itan ed puerta. Balet, no baleg so teritorya yo, nayarin determinaen na saray mamatatken a maalwar lan itilak iray imbitasyon ed kaabungan ya anggapoy nasabi. Diad saray sampot-simba et iyopresi tayo met iray kaplesan a magasin.
15. Antoy nayarin ibaga tayo sano mangiter itayo na imbitasyon ed Memoryal?
15 Lapud limitado so panaon tayo a pangibunog ed saray imbitasyon, sankaabigan so antikey a presentasyon. Magmaliw a makaaro tan maligsa. Nayarin onia so ibaga yo: “Labay min seguroen a naimbitaan kayo, saray kapamilyaan yo, tan saray kakaaro yo ed importantin okasyon a nagawa no Marso 22. Nia’ay so imbitasyon yo. Nabasa yo ed sayan imbitasyon iray impormasyon.” Nayarin walaray tepet na unabung. Odino nayarin awaten to so imbitasyon tan ibalikas to ni ingen a sikatoy onatendi. Irekord iramay interesado tan iyuksoy so ipawil.
16. Anton eksperiensya so mangipapabitar ed kaimportantian na kampanya a pangiyimbita ed Memoryal diad teritorya?
16 Nen imbeneg a taon, sakey a sundalo so akaromog na imbitasyon ed Memoryal diad puerta to. Deniside toy onatendi balet kaukolan toy manpatanir ed sarhento to. Sanen impanengneng toy imbitasyon ed sarhento, ameneng so sarhento insan to inkuan a saray atateng to et Tasi kanian dati et sikatoy onaatinde ed saray pantitipon a kaiba ira. Agto labat inabuloyan so sundalo noagta akila met ya inmatendi ed Memoryal!
17. Panon tayon nipatnag ya agtayo asaew so gagala na agnapalumbasan a kaabigan na Dios?
17 Ipatnag so Apresasyon: Legan a manasingger so panaon na Memoryal ed sayan taon, komon ta ipatnag na balang sakey ed sikatayo so agnapalumbasan a kaabigan nen Jehova. Insulat nen apostol Pablo: “Pikasi mi met ed sikayo ya agyo awaten so agnapalumbasan a kaabigan na Dios tan saewen so gagala na satan.” (2 Cor. 6:1, NW) Panon tayon ipatnag ya agtayo asaew so gagala na agnapalumbasan a kaabigan na Dios? Insulat nen Pablo: “Dia ed balang bengatla imamatalek mi inkasikamin dili, a singa ministros na Dios.” (2 Cor. 6:4) Kanian, ipatnag tayo so panamabli tayo ed regalo nen Jehova panamegley na maabig a kondukta tan maseseg a pangipulong tayo ed maong a balita. Alay abig iyan panaon na Memoryal pian napadaak so aktibidad tayo, a sigpot ya ipulong so maong a balita.
[Kahon ed pahina 3]
Siopa Iray Nayarin Man-auxiliary Payunir?
◼ Saray pamilya
◼ Saramay mantratrabaho
◼ Saray maedad la tan walay deperensya ed laman
◼ Saramay maneeskuela
[Kahon ed pahina 4]
Sano Ibubunog Iray Imbitasyon ed Memoryal:
◼ Agla manbabayag; maligsan mansalita
◼ Irekord iray interesado tan ompawil
◼ Iyopresi ed sampot-simba iray magasin