“Sigpot ya Ipulong so Salita na Dios”

¹ Sano masimoon yon papablien so pakaawat na bengatlan maabig, agyo ta ipapatnag itan ed walna tan ed saray kiwas yo? Siempre on! Nipaakar ed kaabigan tan maaron-panangasi ya inanatnat nen Jehova ed katooan, imanoen no panon so inkiwas nen apostol Pablo. Inkelyaw to: “Salamat ed Dios lapu ed langkap to ya agnibalikas!” Anto so lalaktipen na satan a “langkap”? Amin ya “alablabas a grasya na Dios” a nipapanengneng ed sikatayo, say sankatalonggaringan a panangipatnag ed satan et say langkap na mismon Anak to bilang dondon parad saray kasalanan tayo.​—2 Cor. 9:14, 15; Juan 3:16.

² Kasin angangga labat ed salita so balikas na pisasalamat nen Pablo? Andin balot! Diad dakel a paraan et impanengneng toy aralem a panamabli to. Sikatoy mapagan tuloy ed espiritual a pankaabigan na saray kaparan Kristiano tan kinaliktan ton gawaen so anggaan na nayarian to pian tulongan iran sigpot a nagunggonaan manlapud maaron panangasi na Dios. Nipaakar ed sikara, onia so inkuan nen Pablo: “Maib-ibeg kamin mangaro ed sikayo, apaliket kamin tuloy a mangipanabang ed sikayo, na aliwan say ebanghelyo na Dios labat, noag met saray dilin kakamarerwa mi, ta nagmaliw kayo a sankablian ed sikami.” (1 Tes. 2:8) Niarum ed pananulong ed saraman so kabiangan la na kongregasyon a manseguro ed kilalaban da, andi-kesaw ya impulong nen Pablo so maong a balita, a nambaroy na nilibon milya diad dalin tan dayat pian naromog iraman so “suston nikiling parad andi-anggaan a bilay.” (Gawa 13:48, NW) Say aralem a pisasalamat nen Pablo ed amin a ginawa nen Jehova parad sikato so amakiwas ed sikaton “sigpot ya ipulong so salita na Dios.”​—Col. 1:25, NW.

³ Agta say panamabli tayo ed amin ya agawaan la nen Jehova parad sikatayo so mamakiwas ed sikatayon iyopresi so espiritual a tulong ed saraman so mankaukolan ed kongregasyon tayo? (Gal. 6:10) Tan agtayo ta napakiwas a sigpot a mibiang no posibli ed panangipulong na maong a balita na Panarian diad interon teritorya tayo?​—Mat. 24:14.

⁴ Pankanawnawa Pian Ipanengneng so Panamabli: Kada taon say Memoryal na impatey nen Kristo so mangiiter ed sikatayo na nikaduman pankanawnawa pian ipanengneng so panamabli tayo ed agawaan la nen Jehova tan si Jesus parad sikatayo. Saya so aliwa labat a pangapet odino basta labat pannodnonot ed sakey ya ebento. Inkuan nen Jesus: “Gawa yo’ ya a pakanodnonotan ed siak.” (Luc. 22:19) Say Memoryal na impatey nen Kristo et sakey a pankanawnawa pian dalepdepen so inkapersona nen Jesus. Satan so panaon pian bidbiren a sikatoy mabilay tan aktibo natan, tekep na say gloria tan inkaari a niiter ed sikato lapud matoor a kurang na bilay tan bagat to. Sayan panagngilin so pankanawnawa met pian ipanengneng so panagpasakop tayo ed inkaulo nen Kristo legan ton ididirehi iray kurang tan aktibidad na Kristianon kongregasyon. (Col. 1:17-20) Amin a totoo na Dios so nepeg a marespeton presente parad Memoryal na impatey nen Kristo. Diad sayan taon et nagawa itan ed kaselek na agew no Huebes, Marso 28, 2002.

⁵ Tekep na magunaet a sagpot sakbay na impanselebra ed Memoryal nen imbeneg a taon, walaan itayo na sankatageyan a pantok ya inmatendi a 424,306 ed sangan Pilipinas. Kaunongan kasi so onatendi ed sayan taon? Mandependin maong itan ed ‘pansagpot tan pantepel [tayo],’ a tulongan so dakel ya onatendi no posibli.​—1 Tim. 4:10.

⁶ Likud ed iyatendi ed Pangdem na Katawan, nayarin sarag tayon padaaken so aktibidad tayo ed lawak na serbisyo. Seguradon nilibon agagi so man-auxiliary payunir a sakey bulan odino masulok ni. Kada taon ed apalabas a limaran taon, walaan itayo na promedyon 41,618 ya auxiliary payunir legan na panaon na Memoryal, manlapud Marso anggad Mayo. Nen 2001 say bilang so 33,802, a mas daiset nen say promedyo. Kasin niyuksoy yo iray eskedyul yo pian panggayagaan iyan pribilehyon pan-auxiliary payunir ed sayan taon? Maabig no ipanengneng tayo so masimoon a panamabli tayo ed maaron probisyon na Dios a bagat nen Kristo. Napaseguroan kayo ed panamendisyon nen Jehova, singa ipapanengneng na onggendan iran eksperiensya.

⁷ Sakey ya agin bii a walaan na sigpot-panaon a trabaho so nansulat nipaakar ed eksperiensya to ed impan-auxiliary payunir to nen imbeneg a Marso: “Say Pebrero 2001 a Ministeryo Tayo ed Panarian so amaseseg ed siopaman ya iyabuloy na saray sirkumstansya to a man-auxiliary payunir legan na panaon na Memoryal. Lapud say Marso so walaan na limaran Sabado, saya so ontukoy a maong ed eskedyul ko. Kanian denesidik ya isubmite so aplikasyon ko.” Diad kagapo na bulan, sikatoy angiletneg na kalat to diad panggunaet a makapangigapo na panangiyaral na Biblia. Kasin sikatoy tinmalona? On, diad koma-52 ya oras to ed impanpulong ed saman a bulan! Antoy nikuan to? “Walaray makapakelkelaw a bendisyon sano sikatayoy mamasya.”

⁸ Antoray bendisyon ed pamilya a mankakasakey a nan-auxiliary payunir? Sakey a pamilya na apatira a nan-auxiliary payunir nen imbeneg ya Abril so angikuan a satan a bulan et makatantanda. Inkuan na ina: “Agaylan positibo so panmoria mi ed kada agew, nanlapula’d nen nankakasakey kami ed ministeryo! Makapalikliket iray pantongtong mi ed oras na pangdem nipaakar ed inagew-agew ya aktibidad ed serbisyo.” Inkuan na anak a laki: “Nanggayagaan ko so pikimey ed si Dad legan na sakey simba, lapud gendagendat et sikatoy walad trabaho.” Inyarum na ama: “Bilang ulo na pamilya, aliknak ya apenek’ak ed pakaamta a manuulop kamin mankikimey ed sankaimportantian a kimey ed panaon tayo.” Kasin makapankakasakey so pamilya yo a manpayunir? Akin ya agyo pantongtongan a sankapamilyaan tan amtaen no kasin posibli ed interon sankaabungan yo so pan-auxiliary payunir legan na sayan panaon na Memoryal?

⁹ Kasin Nagawaan Tayon Sankaabigan a Bulan ed Kapiganman so Marso? Onia so intepet na insert ed Marso 2000 a Ministeryo Tayo ed Panarian: “Kasin Nagawaan Tayon Sankaabigan a Bulan ed Kapiganman so Abril 2000?” Anto so ebat? Apalumbasan tayo so imbeneg a pantok na saray manangipalapag tan inmatendi ed Memoryal, tan 19,704 so nan-auxiliary payunir ed saman a bulan. Saya met so amadaak ed bilang na oras, magasin, tan panagpawil, tan saray panangiyaral tayo na Biblia et asabi toy 100,156. Kasin nanonotan yo ni so ligsa na kongregasyon yo lapud inka-okupado ed espiritual a kimey legan na saman ya espisyal a bulan? Kasin naparaan tayo odino napalumbasan tayo ni ingen ed sayan taon iraman ya agawaan? No walay nankakasakey a sagpot na amin, say Marso 2002 so magmaliw a “Sankaabigan a Bulan ed Kapiganman.” Akin a Marso?

¹⁰ Wala so duaran rason no akin a say Marso so nepeg ya espisyal a bulan parad kimey. Unona, say Memoryal so nagawa ed pansamposampot na Marso, a mangiter ed sikatayo na malaem a pankanawnawa ed masasakbay na bulan pian dakel so naimbitaan ya onatendi no posibli. Komadua, say Marso ed sayan taon so walaan na limaran kompleton sampot-simba, a mamainomay ed pan-auxiliary payunir parad saraman so mantratrabaho ed sekular odino maneeskuela. Akin ya agnonoten a maong tan iplano so matukoy ya eskedyul, ya usaren so kalendaryo a nitarya diad sayan insert? Say panag-auxiliary payunir so nayarin mas mainomay nen say iisipen yo. Alimbawa, no makapangigana kayo na 8 oras ed lawak na serbisyo ed kada sakey ed limaran sampot-simba, wala labat lay 10 a kaaruman ya oras a kaukolan yon iyeskedyul ed arum ya agew na bulan pian naabot so kakaukolanen a 50 oras.

¹¹ Anto so nagawaan na mamatatken pian tulongan so amin ed kongregasyon a “sigpot ya ipulong so salita na Dios”? Ipaseseg so inkaligsa diad saray parte ed miting tan personal a pitotongtong. Saray manangasikaso na Panagaral na Kongregasyon ed Libro tan saray katulongan da so nayarin unona lan mitongtong ed kada sakey a niasain ed grupo ra tan iyopresi so personal a tulong. Nayarin say kaukolan labat et say pigaran maabig iran salita na panamaseseg odino pigaran praktikal a suhestion. (Uli. 25:11) Dakel so makaimano a tekep na pigaran samet a panangiyarunsa ed eskedyul da, napanggayagaan da so pribilehyon panlingkor bilang auxiliary payunir. Diad pigaran kongregasyon, maslak, no aliwan amin, ed mamatatken tan ministeryal a lingkor tan saray kaasawaan da so angipanengneng na maabig ya ehemplo diad impan-auxiliary payunir da legan na panaon na Memoryal. Saya so akapasesegan na dakel a manangipalapag a miulop ed sikara. Lapud pisikal iran limitasyon odino arum iran sirkumstansya, nayarin walaray manangipalapag ya agmakapanpayunir, balet sikaray napaseseg ya ipanengneng day apresasyon da diad panggawa na anggaay nayarian da ed ministeryo kaiba met so arum ed kongregasyon.

¹² Say itatalona so mandedependi ed maalwar a panagplano ed biang na mamatatken. Saray miting parad lawak na serbisyo so nepeg ya iyeskedyul diad kombenientin panaon ed interon simba. No posibli, say manangasikaso na serbisyo so masakbay lan mangiasain na kualipikado iran agagi a mangikondukta ed amin a miting parad serbisyo. Nakaukolan so maabig a preparasyon pian sarayan miting so ag-onlampas ed 10 anggad 15 minuto, pati pangorganisa ed saray grupo, pangi-asain na teritorya, tan pampikasi. (Nengnengen so “Tepet” ed Setyembre 2001 a Ministeryo Tayo ed Panarian.) Say eskedyul ed aktibidad parad interon bulan so nepeg a malinew ya ipaliwawa ed kongregasyon tan ipeket ed information board.

¹³ Nepeg a wala so magenap a teritorya. Say manangasikaso na serbisyo so nepeg a mitongtong ed agin mangaasikaso na saray teritorya pian iyuksoy iray teritoryan matalag a nakokobrian. Nepeg ya idanet so pankimey ed saray agnasasabi ed kaabungan, pampulong diad saray karsada tan diad saray lakoan, tan pampulong diad bandad labi. No matukoy, arum a manangipalapag so nayarin tulongan a manpulong panamegley na telepono.

¹⁴ Tulongan Iran Manlingkor Lamet: Kasin wala ed teritorya na kongregasyon yo so inaktibo la ed panangipulong na maong a balita? Sikaray kabiangan nin siansia na kongregasyon tan mankaukolan ira na tulong. (Sal. 119:176) Lapud magano la so pangangga na sayan daan a mundo tan say balon mundo so asingger la, walaan itayo na maabig a rason pian manggunaet a natulongan iraman so nagmaliw ya inaktibo. (Roma 13:11, 12) Diad Pilipinas ed apalabas a limaran taon, masulok a 3,150 a totoo ed kada taon so kinmiwas ed impanulong ed sikara tan nagmaliw ira ya aktibo lamet. Anto so nagawaan tayo pian tulongan so dakel ni a napaelet da lamet so aro tan kompiyansa a walad sikara sanen kagapo da ed ministeryo?​—Heb. 3:12-14.

¹⁵ Say ulop na mamatatken so malabay a mangisingbat no panon dan natulongan iraman so nagmaliw ya inaktibo ed apalabas a pigaran taon. (Mat. 18:12-14) Nepeg a nengnengen na sekretaryo iray Congregation’s Publisher Record card tan ilista ya amin iraman so nagmaliw ya inaktibo. Nepeg a panggunaetan so panagpastol ya uksoyan pian mangiter na tulong. Nayarin kaliktan na sakey a matatken so idalaw ed sakey a manangipalapag lapud dati lan makapikabat tan mililimog ed satan a sakey, odino arum a manangipalapag so nayarin nakerew ya ontulong. Nayarin sikaray angiyaral ed satan a sakey ya inaktibo la natan tan maliket iran mangawat ed pankanawnawan mangiter na nikabiig a tulong ed sayan panaon na pankaukolan. Komon ta dakel ed saraman a nagmaliw ya inaktibo so napakiwas ya onggapo lamet a mangipulong ed salita na Dios. No onkualipika ira, say sankaabigan lan panaon ya igapo ra et say panaon na Memoryal!​—Nengnengen so “Tepet” ed say Nobyembre 2000 a Ministeryo Tayo ed Panarian parad nagkalalon detalye.

¹⁶ Kasin Kualipikado Iray Arum a Manpulong? Itutultuloy nen Jehova a bebendisyonan iray totoo to diad pangitarok ed “saray mabli a bengatla na saray amin a nasyon.” (Ag. 2:7) Kada taon et nilibo so kualipikado bilang agbautismadon manangipalapag. Siopa iratan? Ananak na Tastasi nen Jehova ontan met ed saray onaaligwas ya iyaaralan na Biblia. Panon so pakaamta tayo no kasin kualipikado iran magmaliw a manangipalapag na maong a balita?

¹⁷ Ananak na Tastasi nen Jehova: Dakel ya ananak so miuulop ed atateng da ed panagkabkaabungan ed dakel lan taon, anggaman sikaray agni manlilingkor bilang agbautismadon manangipalapag. Say Marso so maabig a panaon ya igapo ra. Panon so pakaamta yo no kasin say anak yo et kualipikado? Ibabaga na Organized to Accomplish Our Ministry ed pahina 100 a “no say anak so napanuliranan ed kondukta to tan nayarian ton ibalikas so personal a pananisia to diad pangitongtong ed arum nipaakar ed maong a balita, a papakiwasen na puso ton manggawa ed satan.” No isipen yon kualipikado so anak yo, mitongtong ed sakey ed mamatatken ed Service Committee na Kongregasyon.

¹⁸ Kualipikado Iran Iyaaralan na Biblia: Kayarin akagamor la na pikakabat tan onaatendi met la ed saray miting so iyaaralan na Biblia, nayarin kaliktan to so magmaliw a manangipalapag na Panarian. No mangikokondukta kayo na panangiyaral ed ontan ya iyaaralan, konsideraen irayan tepet: Kasin sikatoy onaaligwas, unong ed edad tan abilidad to? Kasin inanabang to la so pananisia to ed arum diad impormal a paraan? Kasin isusulong to la so ‘balon inkatoo’? (Col. 3:10) Kasin nakakapet to iray kualipikasyon parad agbautismadon manangipalapag, a nidatak diad pahina 97-9 ed libron Our Ministry? No ontan, kaukolan yoy mitongtong ed Service Committee na Kongregasyon ta pian niyuksoy ed duaran mamatatken so pitongtong ed sikayo tan ed iyaaralan. No sikatoy kualipikado, say duaran mamatatken so mangipaamta ed sikato a nayarian to lay mibiang ed publikon ministeryo.

¹⁹ Komusta Balet so Abril tan Mayo? Saraya met so espisyal a bulan parad apadaak ya aktibidad ed lawak na ministeryo. Dakel a man-auxiliary payunir ed Marso so nayarin makasarag a manggawa lamet ed saya ed Abril tan/odino Mayo. Legan na Abril tan Mayo, ikdan tayo na prayuridad so pangiparungtal ed Panag-Bantayan tan Awake! a magasin ed ministeryo. Agaylan makagunggona so epekto na saratan ed kabibilay na saramay manbabasa ed saratan! Sarayan magasin so walaan na baleg a betang ed pakakadampot na makapakelkelaw ya idaraak a nagagawa ed sankamundoan. Sakey a nikaduman sagpot so gawaen ed Abril tan Mayo pian iyopresi iray magasin ed dakel a totoo no posibli. Iplano la natan so sigpot a pibiang.

²⁰ Lapud implanon pamadaak ed panagpulong a kimey, kasin kaukolan yon dakelan so bilang na saray magasin ya aalaen yo ed kongregasyon? Diad interon serbisyon taon, iyopresi tayo so Say Panag-Bantayan tan Awake! kada Sabado, say niganan Panagmagasin tayo. Balet, lapud dakel so mibiang ed panag-auxiliary payunir tan amin tayo so mangiparungtal ed saray magasin ed loob na duay bulan, nayarin kaukolan a laeman so pedido yon magasin ed kongregasyon. No ontan, ipangasin pakabatan a tampol so manangasikaso na magasin ed kongregasyon yo. Ontan met, say manangasikaso na literatura so nepeg a maneguro a walay magenap a suplay na tract a Labay Moy Makaaral nin Maong Diad Biblia? pian walay usaren na amin.

²¹ Dakel so angibalikas na panamabli ed kabiangan na Ministeryo Tayo ed Panarian ya apauloan na “No Anto so Ibaga Nipaakar ed Saray Magasin.” Kasin inanamot yo la iyan probisyon diad pangipasal ed saray pangaligan a presentasyon? Akin ya ag-usaren so kabiangan na panagaral yo na Biblia bilang sankapamilyaan kada simba pian ipasal irayan presentasyon?

²² Sigpot ya Anamoten Iyan Panaon na Memoryal: Singa si apostol Pablo, ipanengneng tayo ed si Jehova so panamabli tayon maong “ed langkap to ya agnibalikas” diad sigpot a pibiang ed espiritual iran aktibidad ya implano parad sayan panaon na Memoryal. Lalaktipen na saraya so (1) iyatendi ed sankaimportantian ya okasyon ed taon, say panselebra ed Pangdem na Katawan no Huebes, Marso 28, 2002; (2) panulong ed saraman so nagmaliw ya inaktibo pian napaelet da lamet so “akauna ya aro [ra]” (Apoc. 2:4; Roma 12:11); (3) panulong ed ananak tayo tan siopaman ya iyaaralan tayo na Biblia ya onkualipika a magmaliw ya agbautismadon manangipalapag; tan (4) sigpot a pakapibiang ed panag-ebanghelyon kimey anggad posibli, tan pan-auxiliary payunir ni ingen ed Marso, Abril, tan Mayo no iyabuloy na saray sirkumstansya yo.​—2 Tim. 4:5.

²³ Masimoon min ipipikasi ya amin tayo so sigpot a mibiang ed panangipulong na maong a balita na Panarian ed sayan panaon na Memoryal, a diad ontan et nipanengneng tayo so panamabli tayo ed amin a gagawaen nen Jehova ed sikatayo.

[Kahon ed pahina 6]

Personal ya Eskedyul ed Lawak na Serbisyo parad Marso 2002

Simba Lunes Martes Mierkoles Huebes Biernes Sabado

1 2

Panagmagasin

3 4 5 6 7 8 9

Panagmagasin

10 11 12 13 14 15 16

Panagmagasin

17 18 19 20 21 22 23

Panagmagasin

24 25 26 27 28 29 30

MEMORYAL Panagmagasin

KASELEK

NA AGEW

31

Kasin niyeskedyul mo so dagup na 50 oras pian makapan-auxiliary payunir ka ed Marso?