Kasin Man-auxiliary Payunir Ka?
1. Akin a say panaon na Memoryal et maabig a pankanawnawan napalaknab so ministeryo tayo?
1 Say panaon na Memoryal et maabig a pankanawnawan napalaknab so ministeryo tayo. Panaon iya pian dalepdepen so baleg ya panangaro nen Jehova diad impangiter tod Anak to bilang dondon. (Juan 3:16) Lapud saya et misalsalamat itayo, kanian labalabay tayon ibagad arum so nipaakar ed si Jehova tan ed gagawaen to parad totoo. (Isa. 12:4, 5; Luc. 6:45) Panaon met iya pian panliketan tayoy espisyal ya kampanya a pangimbitad saray kabkabat tan totood teritorya ya onatendid Memoryal. Kayari to, natulongan tayo iramay inmatendi ya naarumay interes dad Biblia. Labay mo kasin palaknabey ministeryom diad pan-auxiliary payunir legay Marso, Abril, odino Mayo?
2. Akin ya lalon maabig ya bulan so Marso pian man-auxiliary payunir?
2 Gawaen ya Espisyal a Bulan so Marso: Balibali man-auxiliary payunir ed bulan na Marso. Saramay man-aplay et makapampili na oras ya kaukolan dan aboten, balanglan 30 odino 50 oras. No say bisita na manangasikaso na sirkito et ombanad Marso, nayarin onatendi iray auxiliary payunir diad interon miting na saray regular tan espisyal payunir. Nagawa so Memoryal no Martes, Marso 26, 2013. Say kampanya a pangimbita parad satan et onggapo no Marso 1, tan mas andukey itan nen say imbeneg iran taon. Ontan met, walay limaran Sabado tan Simba na Marso. Agta maabig no nonoten mon maong no panon mon gawaen iyan sankaespisyalan a bulan ed sayan taon?
3. Antoy gawaen tayo pian naarumay oras tayod ministeryo?
3 Iplano la Natan: Natan la so panaon pian nengnengen so eskedyul tayo tan amtaen no anto ran pananguman so kaukolan pian makapanpayunir tayo. Importante so pitulongan na pamilya, kanian mangiganay panaon legan na Panagdayew na Pamilya yo pian pantongtongan iray plano yo tan manggaway eskedyul. (Uli. 15:22) No agka makapan-auxiliary payunir, agka nadidismaya. Kasin nai-adjust moy eskedyul mo pian arumay oras diad saray agew na pampulong mo? Kasin naaruman moy agew na panagpulong mo?
4. Anto ray gunggona no aruman tayoy pankimey tayo legay Marso, Abril, tan Mayo?
4 No aruman tayoy pankimey tayo legay Marso, Abril, tan Mayo, lalo tayon magmaliw a maliket tan napnek diad panaglingkor ed si Jehova tan diad pangiter ed arum. (Juan 4:34; Gawa 20:35) Balet say sankaimportantian ed amin, saray sakripisyo tayo et mamaliket ed si Jehova.—Uli. 27:11.