Sulat na Sangan Opisina

Pinabli Iran Manangipalapag na Panarian:

Maliket kamin makanengneng ya inmaligwas so kimey ed Pilipinas legan na 2007 a serbisyon taon! Nabet tayo so sankatageyan a pantok na 154,858 a manangipalapag nen Abril. Diad satan a bilang, 42,252 so akibiang ed sigpot panaon a serbisyo bilang auxiliary, regular, odino espisyal payunir, a kabaliksan toy 27% ed dagup na saray manangipalapag.

Legan na Oktubre tan Nobyembre 2006, masulok ya 8 milyon a kopya na Kingdom News No. 37, a “Magano Lay Panampot na Palson Relihyon!” so nibunog ed interon Pilipinas. Insan nen Marso tan Abril 2007, 8 milyon ya imbitasyon ed Memoryal so nibunog. Say gagala na saratan a kampanya et pian tulongan iray matuan impanpuso a makaaral ed no anto so peteg ya ibabangat na Biblia. Dakel ed saramay agnakakatongtong so apasabian na mensahe ed oniaran paraan.

Makapaseseg a naamtaan a walay masulok a 140,000 a panangiyaral na Biblia nen Abril 2007. Ipapabitar na saya a dakel a manangipalapag natan so magmamaliw lan managbangat na Salita. (Mat. 28:19, 20) Panliliketan na dakel so panguusar ed libron Ibabangat na Biblia ed sayan kimey. Nanlapula’d inkipaway na sayan libro nen 2005, masulok a sakey milyon a kopya so nibunog la ed interon Pilipinas. Maliket kamin mikimey ed sikayo a benebenek ed sayan importantin aktibidad, tan ipasabi mi so ampetang a Kristianon panangaro mi.

Saray agagi yo,

Sangan Opisina ed Pilipinas