Ikday Ilalo Iray Mairap Bilay
1 Si Jesus so interesadon maong ed saray duruka. Walaray panaon a sikatoy mamilagron amakan tan amaabig ed saray mansasakit. Balet, say akasentroay imano to et say panangiyabawag na “maong a balita” ed saray mairap bilay. (Mat. 11:5) Diad sayan panaon, say ministeryo tayo so siansia nin makakatulong ed saray mairap bilay tan ed arum ni ra.—Mat. 24:14; 28:19, 20.
2 Peteg ya Ilalo: Saray lider na Kakristianoan so mabetbet a mangisisipan ed saray mairap bilay a no baleg so iter da ed simbaan et onasenso so bilay da. Balet, ibabangat na Biblia a say Panarian na Dios labat so mamaandi kairapan na bilay tan manolbar ed amin a problema na katooan. (Sal. 9:18; 145:16; Isa. 65:21-23) No tulongan tayo iray mairap bilay a mangamta ed no anto so peteg ya ibabangat na Biblia, makapanginabang itayo na ilalo tan natulongan iran napenek so pankaukolan da ed espiritual.—Mat. 5:3.
3 Diad panaon nen Jesus, minudmora na saray Fariseo iray mairap bilay, tan andiay galang da ran tinatawag ya ‘am-ha·’aʹrets, odino “totoo na dalin.” Balet, minoria nen Jesus a “mabli” so “dala ra” odino say bilay da. (Sal. 72:13, 14) Sarag tayon aligen si Jesus tan ‘kasian’ iray mairap bilay panamegley na maabig a pideneng tan pisimpatya ed sikara. (Uli. 14:31) Anggan kapigan et agtayo labay a leglemewen odino masuyat a pulongan iray totoon walad simpok na maiirap. Diad tua, karaklan ed saray mangaawat ed mensahe na Panarian et totoon mairap bilay.
4 Ontulong la Natan: Natulongan met iray mairap bilay pian nabawasan so epekto na kairapan a nasasagmak da no ibangat tayo ed sikara iray prinsipyo na Biblia. Alimbawa, kokondenaen na Biblia so panagbuanges, panagsugal, inkangiras, panagsigarilyo, tan saray arum nin pansesengegay panirap. (Uli. 6:10, 11; 23:21; 2 Cor. 7:1; Efe. 5:5) Ipapaseseg na Kasulatan so pagmaliw a matua tan “sigpot-kamarerwa,” saray kalidad ya aanapen ed saray empleyado. (Col. 3:22, 23, NW; Heb. 13:18) Diad tua, impanengneng na sakey a surbi a kaslakan ed saray amo so angipasen ed inkamatua tan katooran bilang say manuna iran kalidad ya aanapen da ed saray aplikante.
5 Ag-ibabaliwala nen Jehova so paniirap na saray pobri. Agla manbayag et iliktar nen Jesu-Kristo ‘so naukolan ya oney-ey.’ (Sal. 72:12) Angga’d agni itan agawa, pankanawnawa tayon ligliwaen so arum, kaiba lay mairap bilay, panamegley na mensahe na Biblia a mangiiter na ilalo.