Ligliwa ed Nagogonigon
1 Kakkaukolan a taryaan na ligliwa iray katooan natan, a mas ni nen say nensaman. Diad itutumbok ed panangidaulo na Ari tayo, si Jesu-Kristo, pankikimeyan tayo met so ‘pamedber ed puso na maermen.’—Isa. 61:1.
2 No Anto so Gawaen a Paraan: Pian naligliwa iray totoo, say ministeryo tayo so nepeg a pakapatnagan na inkabalanse tan inkapositibo. Say iyapasakey tayon itongtong et say Makasulatan a katuaan tan say alay abig ya ilalo manlapud makaligliwa iran sipan na Dios, tan limitaan tayon singbaten iray mauges a kagagawa na mundo tan palson doktrina. Agkabaliksan na saya ya agtayo la isingbat so nipaakar ed Armagedon. Say kimey tayo et say pangiyabawag et “taon na panamalangkap nen Jehova, tan say agew na kababales na Dios tayo,” tan pian “manimbawa [odino mamasakbay] ed mauges a manlapu ed mauges a dalan to.” Anggaman ontan, say pangipasakbay ed Armagedon tan say paneskribe ed makaderal iran resulta na satan et agmet mamakilot ed tema na maong a balita na Panarian na Dios.—Isa. 61:2; Eze. 3:18; Mat. 24:14.
3 Diad Kabkaabungan: Kaslakan lan naromog so totoo a nadidismaya lapud sakit, impatey na inad-aro ra, ag-inkahustisya, odino problema ed pinansyal. Bilang umaalig ed si Kristo, napakiwas itayon ‘mangabagey’ tan misimpatiya ed saramay naabet tayo ed ministeryo. (Luc. 7:13; Roma 12:15) Anggaman ibabasa tayo so sakey odino duaran teksto a mitukoyan ed problema, nepeg a “masiglat [itayo] komon ya ondengel,” pian nibalikas to so liknaan to. (Sant. 1:19) Diad ontan et mas amta tayo no panon tayo iran ligliwaen.
4 Onia so nayarin mataktika tayon ibaga, “Labay kon inabang ed sika so pigaran makapaseseg a salita manlapud Biblia.” Magmaliw a balanse, ya agsusuppiaten so kada lingon panmoria a nayarin ibalikas na katongtong tayo. Imbes, iyapasakey tayoy pangiter na panamaseseg tan ligliwa diad pangusar ed Kasulatan. Nipaakar ed saya, nayari yon nengnengen so Reasoning From the Scriptures pahina 117-121 ed silong na paulon “Encouragement.” Odino nayarin ikdan yo na kopya na tract a Ligliwa Parad Nagogonigon tan itongtong so makapaseseg a mensahe na satan.
5 Anapen Iray Pankanawnawa Pian Ligliwaen so Arum: Wala tay amta yon kaabay, katrabaho, kaeskuelaan, odino membro na pamilya a mankaukolan na ligliwa? Akin ya agpanggunaetan a bisitaen iratan diad abung da tekep na gagalan inabang so makaligliwan Kasulatan? Lapud amta yoy rason na paneermen da, niparaan yo no panon yo ran ligliwaen. Arum so manggagawa na sulat odino ontatawag ed telepono pian mangiter na ligliwa. Say tuan aro ed kaparan too so mamakiwas ed sikatayon ipatnag so pililikna tan itarya so nakaukolan a ligliwa manlapud Kasulatan.—Luc. 10:25-37.
6 On, niganggan ed sikatayon ligliwaen tan pasayaksaken iray maneermen, tan ipaslep so ilalo a maliket ya arapen. Ontan a ligliwa so nakaukolan na totoo ed interon mundo. Say maliket a pangitongtong ed dakel a maabig bengatlan insipan na Dios so mangitarok na ligliwa tan ilalo ed saray nagogonigon. Komon ta lawas tayon tandaan so pankaukolan a pamedber ed puso na maermen.