Nodnonoten so Dondon Tekep na Apresasyon
1, 2. Akin a nepeg tayon nodnonoten so dondon tekep na apresasyon?
1 Bilang katutulok ed ganggan nen Jesus, saray Kristiano ed interon mundo so mantitipon kaselek na agew no Sabado, Marso 22, 2008, pian nodnonoten so impatey nen Jesu-Kristo. (Luc. 22:19; 1 Cor. 11:23-26) Napapakiwas itayon manggawa ed satan lapud apresasyon tayo ed amin ya agawaan ed satan a petsa, 1,975 a taon lay apalabas. Diad impamasiansia nen Jesus ed naspot a katooran anggaman ed makapaot-ot ya ipapatey ed panamairapan a kiew, pinasanto to so ngaran na Ama to, tan angiter na naspot ya ebat ed saray kantiaw nen Satanas.—Job 1:11; Uli. 27:11.
2 Pinaletan na nipaagus a dala nen Jesus so balon sipanan, a tinmulong ed ag-ayadyarin totoo pian natagibi ira bilang ananak na Dios a walaan na ilalon miuley ed si Kristo diad Panarian to ed tawen. (Jer. 31:31-34; Mar. 14:24) Sakey ni, say kaaralem na panangaro na Dios ed katooan so malinew ya apatnagan diad impangiter to ed pinabpabli ton Anak bilang bagat, unong ya impaliwawa a mismo nen Jesus ed si Nicodemo.—Juan 3:16.
3. Panon a nagunggonaan iramay onatendi ed Memoryal?
3 Imbitaan so Arum: Isusuheri na Enero ya isyu na Ministeryo Tayo ed Panarian ya ilista iray kabkabat tayo tan imbitaan iran mismo. Kasin inggapo yo lan inimbitaan iramay inlista yo? Kasin ipaparaan yo la so sigpot a pibiang ed kampanya ya onggapo no Marso 1 pian imbitaan so totoo ed Memoryal? Saramay onatendi so makarengel ed Makasulatan ya impormasyon a mamabiskeg ed pananisia ra ed dondon, tan mangitonton ed bilay ya andi-anggaan.—Roma 10:17.
4. Akin ya onsabi tayon masakbay parad Memoryal?
4 Saramay amin a makasarag so masakbay ya onsabi pian abrasaen iramay mangawat ed espisyal ya imbitasyon. Lapud dakel so onatendi ed Memoryal, importante ya imanoen tayo iramay balo ni, ontan met iramay sagpaminsan ya onaatendi ed saray pantitipon.
5. Panon yon iparaan so puso yo parad sayan okasyon?
5 Iparaan so Puso Yo: Naromog ed Usisaen so Kasulatan ya Inagew-agew—2008 tan ed 2008 Calendar so eskedyul parad espisyal a babasaen ed Biblia ed Memoryal ya onggapo no Marso 17. Say pangonsidera ed importante iran ebento ya agawa legan na unor iran agew na bilay nen Jesus diad dalin so ontulong ed sikayon niparaan so puso yo parad panselebra ed Memoryal. (Esd. 7:10) Say pandalepdep tekep na saray pikakasi ed sarayan salaysay na Biblia so mamaaralem na apresasyon yo ed panangaro nen Jehova tan ed Anak to diad impangitarya na dondon.—Sal. 143:5.
6. Panon itayon nagunggonaan no panggunaetan tayon napaaralem so apresasyon tayo ed dondon?
6 Legan a manasingger so Memoryal, komon ta manparaan itayon maong tan tulongan met so arum a manparaan parad sayan importantin okasyon. Mamaelet na relasyon tayo ed si Jehova tan ed Anak to so pannodnonot ed dondon tekep na apresasyon. (2 Cor. 5:14, 15) Mamakiwas met itan ed sikatayon mangalig ed sikara diad pangipatnag na masakripisyon aro ed arum.—1 Juan 4:11.