Babagbagen Tayo Iray Malet a Niletneg a Bengatla
1 Diad loob la na saray siglo, binulag nen Satanas so kapusoan tan kanonotan na dakel a totoo diad panguusar ed palso iran bangat tan panamalikdo. Uusaren to iray doktrina a singa say Trinidad, say ag-ipapatey na kamarerwa, tan say impiernon apoy. Isusugsog toy panduaruwa ed kiwawala na Manamalsa tan no kasin pinuyanan na Dios so Biblia. Say panangidumaduma lapud rasa tan say nasyonalismo so arum niran mangaamper ed liwawa na katuaan. (2 Cor. 4:4) Panon tayon nabagbag iratan a malet a niletneg a sisiaen?—2 Cor. 10:4, 5.
2 Nalalanor so Emosyon: Saray abayag lan relihyoson sisiaen na totoo et walad utel na emosyon da. Arum et abangonan da la iratan a lingon bangat. Pian natulongan ira, kaukolan a napatnagan ed panagsalita tayo so respeto ed panmoria ra.—1 Ped. 3:15.
3 Nipanengneng tayoy respeto ed sarayan totoo no abuloyan tayo ira a mangipaliwawa ed no antoy sisiaen da tan no akin. (Sant. 1:19) Nayarin panisiaan da a say kamarerwa et ag-ompatey lapud walay inatey iran inad-aro ra tan pirawat daran nanengneng lamet. Odino nayarin manseselebra iray holiday lapud papablien da iray pankanawnawan nakaiba iray pamilya ra. Say idengel ed saray balikas da so ontulong ed sikatayon natebek iray liknaan da tan natulongan itayon onebat ed epektibon paraan.—Uli. 16:23.
4 Aligen si Jesus: Angiter si Jesus na maabig ya ehemplo parad sikatayo sanen inebatan to iray tepet na toon marunong ed Ganggan. Ag-angiter si Jesus na direkta iran ebat, a nayarin ipulisay na saman a too lapud papablien to iratan a sisiaen to. Imbes, tinukoy nen Jesus so Kasulatan, impaibalikas Toy panmoria to, tan tinulongan Ton manrason panamegley na ilustrasyon.—Luc. 10:25-37.
5 Agbalot makapipara ed katuaan na Salita na Dios iray malet a niletneg iran palson relihyoson sisiaen. (Heb. 4:12) Diad maanos a pangipaliwawa ed katuaan, nayarian tayon tulongan iray totoo ya ipulisay so palso tan awaten so katuaan a mangibulos ed sikara.—Juan 8:32.