Manparaan a Maong Parad Memoryal

Say pamparaan a maong parad labi na pannodnonot ed impatey nen Jesu-Kristo et baleg a pribilehyo tan gayaga parad saray papatumbok to! (Luc. 22:19) Antoran praktikal a kundang so kaukolan a gawaen pian makapanparaan parad Memoryal?

◼ Oras tan Pasen: Balang sakey so nepeg a makaamta ed eksakton oras tan pasen na Memoryal. No pigaran kongregasyon so mangusar ed Kingdom Hall, maabig no onsabi itayo ed dugan oras tan onalis a matinunos lapud limitado so niganan oras. Kaukolay pansagpot pian napaliisay panseseksekan ed puerta, dadalanan, tan paradaan.

◼ Imbitasyon: Amin kasin manangipalapag et walaay magenap ya imbitasyon, tan kasin pamilyar ira ed karga na satan? Kasin nipasal mo la no panon mon ipresenta iya? Sioparay pangikdan mo? Nepeg a mansagpot pian nibunog so amin ya imbitasyon.

◼ Transportasyon: Nayarin walaray interesado tan pigaran agagi a mankaukolan na transportasyon odino arum niran tulong. Antoray inyuksoy na kongregasyon yo pian naasikaso iray pankaukolan da?

◼ Emblema: Seguroen ya agni ipapasa iray emblema no agni sinmelek so agew. Iyuksoy so pangiserbi na saray emblema ed siopaman ya alanaan a maletey tan agda la sarag so onatendi. Iparaan met so matukoy a klase na tinapay tan alak.​—Nengnengen so Pebrero 15, 2003, a Panag-Bantayan, pahina 14-15, parapo 14, 17.

◼ Kingdom Hall: Kaukolan a masakbay lan linisan a maong so hall. Masakbay met lan ilira iray plato, kopa, tan matukoy a lamisaan tan apis. No mangusar na sananey a pasen a pantiponan, seguroen a maabig so sound system pian narengel na amin so paliwawa. Kaukolan a masakbay lan pilien iray attendant tan managserbi. Bilinen met ira nipaakar ed saray asainmin da, no antoray kaukolan dan tumboken, tan say kaimportantian na mapagalang a panangawes tan panag-ayos.

Diad sayan sankaimportantian ya okasyon, salanti, say Memoryal na impatey nen Jesu-Kristo, labay tayon manparaan a maong bilang indibidual tan bilang kongregasyon. Seguradon baleg a bendisyon so ipagamor nen Jehova ed saramay mangipatnag na impapuson apresasyon ed amin ya intarya nen Jehova ed katooan panamegley na bagat na inad-aro ton Anak a si Jesu-Kristo.