Ibangat Iramay Agtanto Makabasa
1. Antoy nayarin naeksperiensya tayo’d ministeryo?
1 Sano manmiministeryo itayo, nayarin walaray ibabangat tayo ed Biblia a naiirapan a manbasa. Antoy gawaen tayo?
2. Panon tayon igalang iramay agtanto makabasa, tan akin?
2 Igalang Ira: Say nenengnengen nen Jehova et say kipapasen na puso, aliwan say edukasyon na sakey. (1 Sam. 16:7; Uli. 21:2) Kanian, agtayo memelag-melagen iramay agtanto makabasa. Mas posiblin awaten day tulong tayo no respetoen tan anosan tayo ra. (1 Ped. 3:15) Nayarin kalaktip ed satan so agtayo pamilit ed sikaran basaen so sakey a teksto odino parapo. Legan ya ondarakel so nakakabatan da ed saray mablin katuaan a walad Biblia, nayarin mas panseetan dan paaligwasey panagbasa ra, pian napanggayagaan day pambasa tan ‘pandalepdep ed Salita na Dios diad agew tan labi.’—Sal. 1:2, 3.
3. Antoran nanduruman panagbangat so nayarin usaren ed saramay agtanto makabasa?
3 Nanduruman Panagbangat ed Saray Iyaaralan na Biblia: Saray litrato et makatulong na baleg ed panagbangat tayo pian agnalingwanan na totoo so naaaralan da. Nayarin tepetan moy iyaaralan mo no antoy nibaga to ed sakey a litrato a walad samay publikasyon ya aaralen yo. Insan mangusar na espisipiko iran tepet pian natalosan to so ibabangat na litrato. Mangusar na saray teksto pian nibangat no antoy punto na samay litrato. Nayari met ya usaren iramay litrato pian repasoen iray naaralan. Agyo kokobrian so dakdakel a materyal diad sakey labat a sesyon. Idanet so tema tan saray manunan punto ed aaralen yo, tan agla mangaarum na saray punton agmikonektaan ed satan. Direktan basaen ed Biblia iray teksto, tan tepetan so iyaaralan pian naamtaan no atalosan to imay binasa. Nayarin mas mamakiwas iya ed sikaton paaligwasey panagbasa to, diad ontan et sarag to lan aralen a bukor iray katuaan a walad Biblia.
4. Panon tayon natulongan iray iyaaralan pian onaligwas so panagbasa ra?
4 Tulong Pian Napaaligwas so Panagbasa: Saray totoon agtanto makabasa odino anggapoy pakasarag dan manaral et sarag da pan talosan tan tandaan iray impormasyon a naaralan da. Nayari yo ran pasesegen ya ondengel ed saray maong a manbasa tan itumbok da ed dilin kopya ra, insan da makalnan uliten iray salita. Ontulong iya pian napaaligwas day panagbasa ra. Makatulong met ed sikara so brosyur ya Apply Yourself to Reading and Writing. Diad arum a lugar, iyaarunsa na saray elder so pambangat ed saray agmakabasa. Sarayan praktikal a suhestion so makatulong ed sikatayon naasistian iramay agtanton makabasa pian natalosan da so “masanton sulsulat.” Diad ontan et magmaliw iran “makabat ed kilalaban.”—2 Tim. 3:15.