No Panon ya Natulongan Iramay Naiirapan a Manbasa

1. Akin et nayarin mairap ya bangatan na Biblia iramay naiirapan a manbasa?

¹ Nayarin interesado ed saray espiritual a bengatla iray householder ya naiirapan a manbasa, balet ompan isipen dan agda sarag ya aralen so Biblia tan arum ni ran libro. No iyopresi tayon tampol so libron Ibabangat na Biblia ed sikara, ompan aliwan tanton epektibo. Panon tayo ran natulongan ed espiritual? Tinepetan iray eksperiensyadon manangipalapag ya nanlapud masulok ya 20 a nanduruman bansa no antoy gagawaen da. Nia ray suhestion da.

2. Anto ran publikasyon so epektibon usaren pian tulongan iramay naiirapan a manbasa?

² No naiirapan odino agmakabasa so iyaaralan, nayarin igapom ed sakey a brosyur, balanglan say Listen to God odino Ondengel ed Dios Pian Manbilay ya Andi-angga. Diad United States, ipapanengneng na sakey a payunir iratan ya brosyur ed interesado insan to tepetan no antoy mas labay to. Inreport na branch office ed Kenya ya talagan epektibo irayan publikasyon diman lapud apasalan na saray totood Africa so pangibangat ed sikara panamegley na pangistorya imbes ya tepet-tan-ebat ya panagaral. Nayarin mainomay parad saray de-aral so panagaral ya walay pambasa tan pantepet, balet ompan nairapan ed satan iramay abebay aral da. No makabasa met so iyaaralan, labalabay na dakel a manangipalapag ya usaren so brosyur ya Maong a Balita ya Nanlapud Dios! odino Nayarian Moy Magmaliw a Kaaro na Dios!, odino say libron Saray Istorya ed Biblia.

3. Anto ray nepeg tayon tandaan pian magmaliw tayon epektibod pambangat ed saray agmakabasa?

³ Mankomenda: Nayarin nababaingan iramay agmakabasa, tan dakel ed sikara so andiay kompiyansa. No tulongan tayo ran magmaliw a komportable, kaslakan et gapoan itan pian naibangat tayoy katuaan ed sikara. Maslak ed saray totoon agmakabasa et matalino tan sarag day makaaral. Respetoen tan tratoen tayo ra tekep na dignidad. (1 Ped. 3:15) Napaseseg iran ituloy so panaaral da no nalikna dan aliwan sayang so pansasagpot da tan onaaligwas ira ed espiritual. Kanian naynay iran komendaan.

4. Panon tayon napaseseg iramay naiirapan a manbasa ya manparaan parad panagaral?

⁴ Anggano naiirapan ya manbasa so iyaaralan, paseseg mon manparaan parad panagaral yo. Diad South Africa, papasesegen na arum a manangipalapag iray iyaaralan da ya manpatulong irad kapamilya odino kaaro dan marunong a manbasa. Diad Britain, pian napaseseg na sakey a manangipalapag iray iyaaralan to ya manparaan, ipapabayes toy libro tod sikara legan dan aaralen so pigaran parapo pian nanengneng dan mas mainomay ya naalmo iray ebat no agulisan iratan. Papasesegen na sakey a brother diad India iray iyaaralan to ya nengnengen iray litrato ed leksion ya aralen dad onsublay ya simba tan dalepdepen da la iratan.

5. Panon tayon nipanengneng so inkaanos no mangikokondukta tayoy panagaral?

⁵ Mananos: Antokaman so usaren mon publikasyon, manpokus kad saray manunan punto tan tulongan so iyaaralan mo ya natalosan to iratan a maong. Diad gapo, nayarin mas maabig no 10 anggad 15 minuto labat so panaral. Agkaukolan ya amayamay so aralen, nayarin pigaran parapo labat kada panagaral. Anosan mo labat no matantan ya manbasa so iyaaralan mo. Seguradon napakiwas ya paaligwasen toy panagbasa to legan ya onaaralem so apresasyon tod si Jehova. Pian natulongan moy iyaaralan mo, maabig no imbitaan mon miaral diad gapo ni labat.

6. Panon tayon natulongan iray totoo ya naaralan day manbasa?

⁶ No saray iyaaralan na Biblia et naaralan day manbasa, mas maples iran onaligwas ed espiritual. (Sal. 1:1-3) Atulongan na dakel iray iyaaralan da diad impangusar dad publikasyon ya Apply Yourself to Reading and Writing ya pigaran minuto kayari na kada panaral da. No nadidismaya so iyaaralan, ompan sarag mon tulongan ya nawalaay kompiyansad sarili to no ipaimanom iray bengatlan naaralan to lan gawaen. Ipasegurom ya bendisyonan nen Jehova iray sagpot to, tan paseseg mon manpikasi parad tulong nen Jehova. (Uli. 16:3; 1 Juan 5:14, 15) Papasesegen na arum a manangipalapag ed Britain iray iyaaralan dan manggaway kalat ya sarasarag da balet ontulong ed sikaran magmaliw a progresibo​—nayarin kabisadoen da ni so alpabeto, insan anapen tan basaen iray teksto, ya anggad nabasa da la ray pinasimplin publikasyon na Biblia. Pian natulongan iran manbasa, aglabat ira basta bangatan no panon, kaukolan met ya napaseseg ira pian sikaran mismo et labay dan gawaen itan.

7. Akin et agtayo nepeg a manaalangan ya ibangat so katuaan ed saramay naiirapan a manbasa?

⁷ Agmemelmelagen nen Jehova iramay abebay aral da. (Job 34:19) Say nenengnengen to et say puso na too. (1 Awa. 28:9) Kanian agka manaalangan ya ibangat so katuaan ed saramay naiirapan a manbasa. Dakel so epektibon publikasyon ya nausar mo pian nagawaan itan. Onsabi panaon, nayarian mon iyalis so panagaral ed libron Ibabangat na Biblia tan tulongan mo ran nawalaan na mas aralem a pakatalos ed Biblia.