Tepet

◼ Manepeg kasin usaren na kongregasyon odino na indibidual iray logo na legal iran korporasyon ya uusaren na Saray Tasi nen Jehova?

Say logo et sakey a ngaran, simbolo, odino marka a denesinyo pian mainomay a nabidbir so sakey a bengatla. Say logo na Watch Tower et irerepresenta toy Watch Tower Bible and Tract Society of Pennsylvania tan say arum niran korporasyon ya uusaren na organisasyon. Say Kristianon Kongregasyon na Saray Tasi nen Jehova et manguusar na Biblian akalukas bilang logo ed saray letterhead. Saray arum a korporasyon ya uusaren na Saray Tasi nen Jehova et manguusar na sananey iran logo.

Agnepeg ya usaren na saray kongregasyon odino na indibidual so antokaman iran logo odino ngaran na saray legal a kayarian na organisasyon ed saray Kingdom Hall, karatula, letterhead, personal iran kagawaan tan arum nira. No usaren yo irayan logo na organisasyon, nawetwet laingen iray opisyales na gobierno, manangipalapag, tan arum nira no anton talaga so pikonektaan na kongregasyon ed saray legal a kayarian na organisasyon. Ontan met, no usaren iraya ed letterhead, ompan isipen da laingen a saraya et inaprobaan tan nanlapud sankamundoan a hedkuarter odino diad sangan opisina.

Say logo na Watch Tower, odino antokaman a kapara na satan et agnepeg ya usaren ed saray ipaalagey a Kingdom Hall anggano kayarian iratan na Watch Tower. Agmet kaukolan a salatan a tampol iray karatula, odino desinyo na saray Kingdom Hall a walaan na saratan a logo, lapud mankaukolan itan na dakel a sagpot, panaon, tan kuarta. Balet no daiset labat a sagpot so nakaukolan, ompan sarag yo lan umanen itan. No baleg balet so pananguman a gawaen ed karatula odino diad mismon Hall, ibansag yo la itan no apigeren yo so interon bilding.