Say tower ed arap tan say lolooban ya paonlad lobby na world headquarters na Saray Tasi nen Jehova diad Warwick, New York

Anto so Watch Tower Bible and Tract Society?

Say Watch Tower Bible and Tract Society of Pennsylvania et sakey ya korporasyon ya aliwan parad negosyo. Pinorma itan nen 1884 base ed saray batas na Commonwealth of Pennsylvania, U.S.A. Uusaren itan na saray Tasi nen Jehova pian suportaan so sankamundoan ya kimey da, kaiba lay panag-publish na saray Biblia tan saray literaturan base ed Biblia.

Base ed dokumento ya pakabasaan na gagala na sayan korporasyon, saya et “parad relihyon, edukasyon, tan itutulong ed arum,” panamegley na “panagpulong tan panagbangat na ebanghelyo na Panarian na Dios diad uley nen Kristo Jesus.” Espisipikon naiimbitaan iray magmamaliw ya membro na korporasyon, aliwa itan ya base ed kabaleg na donasyon. Tutulongan na saray membro tan direktor na korporasyon so Mananguley ya Ulop na Saray Tasi nen Jehova.

Saray Onsusuportan Legal ya Korporasyon

Likud ed Watch Tower Bible and Tract Society of Pennsylvania, manguusar met iray Tasi nen Jehova na dakel nin legal a korporasyon diad nanduruman bansa. Say ngaran na arum ed saratan ya korporasyon et kaiba so salitan “Watch Tower,” “Watchtower,” odino say patalos na sakey ed saratan.

Manlapud inkiletneg na saratan ya nanduruman legal ya korporasyon, akatulong iratan pian dakel so nagawaan mi, a singa saraya:

Panagsulat tan panag-publish. Manga 253 milyon la ya Biblia so ni-publish mi. Wala lad masulok ya 1,050 a lenguahe iray publikasyon mi. Libren nabasa na totoo so Biblia diad website mi ya jw.org. Wala la itan ed masulok ya 300 a lenguahe tan naromog da met ditan iray ebat ed saray tepet ed Biblia, a singa say “Anto so Panarian na Dios?”
Edukasyon. Wala ray nanduruman eskuelaan mi pian aralen so Biblia. Alimbawa, manlapud 1943 et manga 10,000 la ya Tasi nen Jehova so impasal a maong diad Watchtower Bible School of Gilead pian makapanlingkor ira bilang misionero odino pian makatulong ed iyaligwas na sankamundoan a kimey mi. Tan kada simba, minilyon ya totoo so nibabangat ed saray pantitipon ya gagawaen ed kada kongregasyon mi, kaiba lad satan iray aliwan Tasi. Wala met iray totoon ibabangat min manbasa tan mansulat tan walay libron uusaren mid saya ed masulok ya 136 a lenguahe.
Itutulong ed arum. Mangiiter kami na tulong ed saray biktima na trahedya—balanglan lapud ginaway too, singa say impamatey ed dakel a totoo ed Rwanda nen 1994, odino lapud kalamidad, singa say yegyeg ya agawad Haiti nen 2010.

Anggaman dakel so nagagawaan mi lapud sarayan korporasyon tan arum nin onsusuportan korporasyon, ag-akadepende ed saraya so kimey mi. Responsabilidad na kada Kristiano ya gawaen so ganggan na Dios ya ipulong tan ibangat so maong a balita. (Mateo 24:14; 28:19, 20) Manisia kamin susuportaan na Dios so kimey mi tan sikato so “mamapabaleg ed satan.”—1 Corinto 3:6, 7.