Manbangat a Simpli
1. Antoy sakey ya importantin aspekto na malinew tan epektibon panagbangat?
1 Importante so inkasimpli ed epektibon panagbangat. Napaaligwas so dunong na ‘panagbangat’ tayo no konsideraen tayo so paraan na Maong a Managbangat, si Jesus.—2 Tim. 4:2; Juan 13:13.
2. Antoy nalalanor ed pambangat a simpli, tan antoray epekto na ontan a panagbangat?
2 Mangusar na Simpli Iran Salita: Say Sermon ed Palandey so walaan na sankaabigan iran katuaan ya imbalikas ed simplin paraan. (Mat., kap. 5-7) Saray karaklan a dinmengel ed si Jesus so ‘mankelkelaw ed panagbangat to.’ Anggan saray nibakin mangerel ed sikato et nikuan dan: “Anggapo ni too a nansalita na onia.” (Mat. 7:28, 29; Juan 7:46) Agtayo kaukolan so mangusar na saray araralem, komplikado iran salita, odino detalyado iran ilustrasyon pian sigpot a makakombinse so katuaan ed saray totoo. Nipaliwawa tayon malinew so katuaan ed simpli iran salita.
3. Akin a nasasagyat iray arum a buntonan da iramay ondedengel ed sikara na impormasyon, tan panon iyan napaliisan?
3 Determinaen so Karakel na Impormasyon: Inkonsidera nen Jesus iray dumerengel to no kaunongan ya impormasyon so ipasabi to ed sikara. (Juan 16:12) Nepeg itayon maobserba tan mainomay ya ontukoy, lalo la no pupulongan tayo iray kakanayon, balo iran interesado, odino ugugaw. Agtayo ira bubuntonan na impormasyon anggano naimano tayon atentibo ira. Lapud saramay masimoon so mantultuloy ya onggamor na pikakabat nipaakar ed tuan Dios, si Jehova.—Juan 17:3; 1 Cor. 3:6.
4. Akin a makagunggona so pangiyapasakey ed manuna iran punto imbes a dakel a detalye?
4 Iyapasakey ed Manuna Iran Punto: Agginawa nen Jesus a komplikado so ibabangat to, diad agto impangitekep na dakerakel a detalye. Sanen imbaga ton: ‘Amin iray wala ed saray lubok et ompaway ira,’ agto ni pinalaknab a tampol ed saman so nipaakar ed duaran pansumpalan na saramay napaoli. (Juan 5:28, 29) Sano mangiyaaral itayo na Biblia, iyapasakey tayo ed manuna iran punto tan agtayo mangiyaarum na agnakaukolan ya impormasyon.
5. Anton bendisyon so nagamoran tayo no simpli so pambangat tayo?
5 Agaylan pisalamatan tayoy Jehova ta simpli so pangibabangat to ed amin a kaukolan tayon naamtaan! (Mat. 11:25) Komon ta simpli so paraan na panagbangat tayo pian napanggayagaan tayoy mabungan ministeryo.