Taloran Paraan Pian Napaaligwas Moy Panagbangat Mo
1. Akin ya kaukolan tayon paaligwasey panagbangat tayo?
1 Amin ya Kristianon manangipalapag et managbangat. Balanglan diad unonan pitongtong, sano ompapawil, odino mangiyaaral na Biblia, mangipapasabi tayo na impormasyon. Tan satan ya impormasyon ya ibabangat tayo et aliwan ordinaryo. Ipapaliwawa tayo “iray masanton sulat,” a makatulong ed totoo pian “magmaliw a marunong parad kilalaban.” (2 Tim. 3:15) Agaylay abig itan ya pribilehyo! Nia ray taloran paraan pian napaaligwas tayoy panagbangat tayo.
2. Panon tayon gawaen ya simpli so panagbangat tayo?
2 Simpli: No kabkabisado tayoy sakey a topic, ompano agtayo la naisip ya nayarin komplikado manaya itan parad saray agmakaamtad satan. Kanian no mangiyaaral na Biblia, agtayo la mangibabaga na amayamay ya detalyin agmet kaukolan. Imbes, ipabitar iray manunan punto. Agto labay ya ibagan lapud dakel so ibabagam et maong kan manbangat. (Uli. 10:19) Kaslakan, mas maong no say basaen labat et saray tekston mangipapaliwawad punto. Kayarin basaen so teksto, say idanet et say kabiangan na satan ya onsusuportad topic. Diad samay Sermon ed Palandey, ya akasulat ed Mateo kapitulo 5 anggad 7, naaralan iray mabmablin katuaan, balet ta simpli so impangipaliwawa nen Jesus tan daiset labat ya salita so inusar to.
3. Akin et importante iray ilustrasyon, tan anto ran klase na ilustrasyon so sankaabigan?
3 Saray Ilustrasyon: Saray ilustrasyon et panisipen toy sakey, makatenyeg na liknaan, tan makatulong ed memorya. Agmo iisipen ya kaukolan et maong kan mangistorya pian makapangiter kay marakep iran ilustrasyon. Si Jesus et mabetbet ya manguusar na antikey tan aliwan komplikado iran ilustrasyon. (Mat. 7:3-5; 18:2-4) Mausausar met iray simplin drowing ed papel. No manparaan kan maong, makanonot ka ray epektibon ilustrasyon.
4. Panon tayon usaren ya epektibo iray tepet?
4 Saray Tepet: Saray tepet et panisipen toy iyaaralan mo. Kanian, alagar moy ebat kayarim ya mantepet. No ibagam ya tampol so ebat, agmo naamtaan no antoy atalosan na iyaaralan mo. No bilang ta aliway ebat to, mas maabig no manpalesa kay arum ya tepet pian naala toy dugan ebat imbes ya basta labat la ibagay ebat ed sikato. (Mat. 17:24-27) Siempre, anggapod sikatayoy perpekton managbangat. Kanian papasesegen itayo na Biblia ya imanoen a naynay so panagbangat tayo. No gawaen tayo ’tan, nagamoran tayo, pati saramay ondengel ed sikatayo iray agmanganggan bendisyon.—1 Tim. 4:16.