‘Inabang so Bilay Yo’ ed Saray Iyaaralan Yo
1. Anto so kaukolan a gawaen pian natulongan iray iyaaralan na Biblia?
1 Pian natulongan so iyaaralan na Biblia anggad pangidedika toy bilay to, wala ni kaukolan a gawaen nen say basta regular a panagaral na Biblia. Inkompara nen apostol Pablo so relasyon to’d saramay imbangat to na katuaan ed sakey a maasikason ina a mamapabli ed saray ananak to. Labay tayo met ya ‘inabang so bilay tayo’ pian natulongan iramay iyaaralan tayo na Biblia ya onaligwas ed espiritual.—1 Tes. 2:7-9, NW.
2. Akin a kaukolan tayon ipatnag so personal ya interes, tan panon itan a nagawaan?
2 Nawalaan na Personal ya Interes: Legan ya iyaaplika na iyaaralan na Biblia iray naaralan to, say konsiensia to so mamakiwas ed sikaton agla miulop ed saramay totoon say ugali ra et agmitunosan ed prinsipyo na Biblia. (1 Ped. 4:4) Sikato met so nayarin ikaindan na pamilya to. (Mat. 10:34-36) Makatulong so pangipatnag tayoy personal ya interes pian nabawasan so paneermen to. Oniay impaseseg na abayag lan misionero: “Agkayo maganat ya onsempet kayari na panagaral yo. No nayari, agkayo ni onaalis tan miistoryaan kayo nin magano.” Lawas akaparaan a mangiter na praktikal a tulong. Singa bilang, kasin sarag yon bisitaen odino anggan tawagan ed telepono so iyaaralan yo no mansasakit? No posible, sarag yo kasin abayan so iyaaralan yo diad saray miting tan ibaan a mangasikaso ed saray ananak to?
3. Panon tayon natulongan so iyaaralan tayo na Biblia a makagamor na panamaseseg manlapud kongregasyon?
3 Tulong Manlapud Kongregasyon: No say pampulongan yo et asingger ed panaayaman na iyaaralan yo, akin ta no onsamar kayon magano pian ikabat so kaiba yo? No sarag to, mangitagar kayo na nanduruman manangipalapag, pati saray elder, a nakaiba yo ed panagaral. Ontan met, no niletneg yo lay panagaral na Biblia, paseseg yon onatendi ed saray pantitipon diad Kingdom Hall. Ontulong iya ed sikaton panggayagaan iray makapabiskeg a panlilimog a kaiba iray membro na kongregasyon a nayarin magmaliw ya espiritual a kapamilya to.—Mar. 10:29, 30; Heb. 10:24, 25.
4. Panon a nabendisyonan so inkaseseg tayo?
4 Say sakey ya ateng a maan-anos a tinmulong pian onaligwas so espiritualidad na ananak to et malikeliket sano ontalindeg iray anak to ed dapag nen Jehova tan manakar ira’d katuaan. (3 Juan 4) Ontan met a liket so nalikna tayo legan ya inanabang tayo so bilay tayo pian tulongan iray iyaaralan tayo na Biblia.