Kasin Kualipikado Ak a Manpulong?
1. Akin et agtayo nepeg a liknaen ya agtayo kualipikadon manpulong?
1 No bilang ta nitepet mo la itan ed inkasika, agka manpapaga! Sikatayoy nagmaliw a ministro aliwan lapud atagey ya aral odino nisipor ya abilidad. Arum ed saray inmunan disipulo et adeskribin “abebay-aral tan ordinaryo.” Anggaman ontan, sikaray epektibon manangipulong na maong a balita lapud determinasyon dan tumboken so ehemplon impanengneng nen Jesus.—Gawa 4:13, NW; 1 Ped. 2:21.
2. Panon so impanbangat nen Jesus?
2 No Panon so Impanbangat nen Jesus: Simpli, praktikal, tan mainomay a talosan na ordinaryon totoo so panagbangat nen Jesus. Saray tepet, ilustrasyon, tan malinew ya introduksion to so anagyat ed imano na saray dumerengel. (Mat. 6:26) Impanengneng toy masimoon ya interes ed saray totoo. (Mat. 14:14) Kaaruman ni, nansalitay Jesus tekep na talek tan autoridad lapud amta to a sikatoy inganggan tan inikdan na Dios na pakayari pian nagawaan toy asainmin to.—Luc. 4:18.
3. Panon itayon tutulongan nen Jehova a nasumpal so ministeryo tayo?
3 Tutulongan Itayo nen Jehova: Itatarya na Matalonggaring ya Instruktor tayo, panamegley na Salita tan organisasyon to so nakaukolan tayon panangipasal pian epektibon nipulong so maong a balita. (Isa. 54:13) Lapud impaisulat nen Jehova so paraan na impanbangat nen Jesus, sarag tayon analisaen tan aligen iray inusar ton metodo. Iikdan itayo nen Jehova na masanton espiritu tan ipapasal to itayo diad saray miting ed kongregasyon. (Juan 14:26) Niarum ni, uusaren to ray eksperiensyadon manangipalapag ya ontulong ed sikatayon magmaliw a mas epektibo.
4. Akin et nalikna tayon kualipikado itayon manginabang na maong a balita ed arum?
4 Walaan itayo sirin na dakel a rason a naliknan kualipikado itayon manpulong, lapud say “impagmaliw [tayon] kualipikado et manlalapud Dios.” (2 Cor. 3:5, NW) Legan itayon manmamatalek ed si Jehova tan matoor a mamapabli ed saray maaron probisyon to, magmaliw itayon “sigpot a makayari tan akaparaan a maong parad amin a maabig a gawa.”—2 Tim. 3:17, NW.