Tepet
◼ Manepeg kasin ibunog na saray Tasi nen Jehova iray inrekord odino manuskrito na saray paliwawa?
Napapabiskeg tan napapaseseg itayo na saray paliwawa a nibase ed Biblia. (Gawa 15:32) Kanian, natural labat a labay tayon inabang irayan makapaseseg ya impormasyon ed saramay anggapo ed satan a pantitipon. Lapud impakaimbento na nanduruma iran panagrekord, say sakey a paliwawa et magmainomay lan nirekord tan ibunog. Walaray arum a walaan na koleksion na saray akarekord a paliwawa, pati saray abaybayag lan nipaliwawa, tan tekep na maabig a motibo et ipapabayes odino igagawaan day kopya iray kakaaro ra. Wala ni ingen iray arum a nanggawa na saray Web site tan inkarga da ditan iray paliwawa a nayarin i-download na anggan siopa.
Diad tua, aliwa met a sebel so pangirekord na saray paliwawa pian personal ya usaren odino parad saray arum a membro na pamilya tayo. Niarum ni, nayarin iyuksoy na saray mamatatken so pangirekord na saray paliwawa pian nausar na saray mansasakit a membro na kongregasyon ya agmakaatendi ed saray pantitipon. Balet, walaray makatunongan a rason no akin ya agtayo nayarin ibunog iray manuskrito odino nirekord iran paliwawa.
Lapud saray paliwawa et iprepresenta unong ed lokal iran pankaukolan, ompan sananey so pakatalos tayo ed nibunog iran recording ta agtayo amta iray kipapasen sanen impaliwawa itan. Kaaruman ni, agtayo nakompirma no kapigan tan no siopa so nampaliwawa, kanian agtayo naseguro no say impormasyon ed paliwawa et susto tan unong ed kaplesan a pakatalos. (Luc. 1:1-4) Ontan met, say pangibunog na saray manuskrito odino recording na saray paliwawa et nayarin manresulta’d pangiter odino pangawat na agmanepeg ya atension tan dayew.—1 Cor. 3:5-7.
Mansasagpot a maong so matoor tan makabat ya aripen pian nitarya so dugan karakel na espiritual a tagano diad “manepeg a panaon.” (Luc. 12:42) Kalaktip ed saya iray uksoyan parad saray paliwawa ya iprepresenta ed lokal iran kongregasyon na saray Tasi nen Jehova tan saray audio recording a nayarin i-download ed opisyal a Web site ya jw.org. Makapanmatalek itayo a mangitatarya so matoor tan makabat ya aripen tan say Mananguley ya ulop to na saray nakaukolan tayo pian magmaliw itayon mabiskeg ed pananisia.—Gawa 16:4, 5.