Say DVD a The Bible​—Its Power in Your Life

Tutulongan na Biblia iray minilyon a totoo pian nawalaan na mas maabig a kabibilay. Antoray pigaran prinsipyo a walad Biblia, a no niyaplika et makatulong ed sikatayon natalonaan iray problema ed panaon tayo? Andi-duaruwan panliketan yo so pakaamta na ebat ed sarayan tepet diad pambantay yo na video a The Bible​—Its Power in Your Life, a komadua ed taloran video presentation a naromog ed DVD a The Bible​—A Book of Fact and Prophecy. Kayari yon bantayan iyan video, kasin naebatan yo iray onggendan a tepet?

(1) Akin a say Biblia et aliwa lambengat a sakey ya obra maestra? (Heb. 4:12) (2) No say Biblia et makatulong pian napasimbalo na totoo so kabibilay da, akin et amayamay nin siansia so problema na katooan? (3) Anto so tema na Biblia? (4) Antoran teksto ed Biblia so asalambit ya ontulong ed saray sanasawa a (a) napaaligwas so komunikasyon da tan (b) kontroley sanok da? (5) Panon a say panmoria na saray Kristiano ed panamaley et gawaen ton mas maabig so kabibilay na pamilya? (Efe. 5:28, 29) (6) Panon ya impanengneng nen Jehova so maabig ya ehemplo ya aligen na saray atateng? (Mar. 1:9-11) (7) Panon a gawaen na saray atateng a makapasagyat so panagaral na pamilya? (8) Nilikud ed panagaral na Biblia, anto ni so ipapaseseg na Salita na Dios ya itarya na saray atateng ed ananak da? (9) Panon a say simbawa na Biblia so makatulong ed saray pamilya a nasungdoan so kairapan ed ekonomya? (10) Sano niyaplika, antoran Makasulatan a prinsipyo nipaakar ed kalinisan, panag-abuso ed alak tan druga, tan stress so makatulong pian naparaisetan iray problema ed bunigas? (11) Antoran sipan na Biblia so ontulong ed sikatayon makapansungdo? (Job 33:25; Sal. 145:16) (12) Panon ya apasimbalo na saray bangat manlapud Salita na Dios so kabibilay mo? (13) Panon mon usaren iyan video pian natulongay arum?