Say Libron “Bearing Thorough Witness” About God’s Kingdom
1. Anto so aralen ed Panagaral na Kongregasyon ed Biblia manlapud simba na Marso 14?
1 Diad simba na Marso 14, 2011, igapon aralen na saray kongregasyon a Cebuano, Hiligaynon, Iloko, tan Tagalog so libron “Bearing Thorough Witness” About God’s Kingdom diad Panagaral na Kongregasyon ed Biblia. (Paimano: aralen na saray Kongregasyon a Bicol, Pangasinan, tan Waray-Waray so libron Onapit ed si Jehova a singa nipakabat ed Nobyembre a Ministeryo Tayo ed Panarian.) Sayan publikasyon et kobrian toy libro na Saray Gawa diad mabilabilay a paraan kanian nasagyat iray manbabasa a manimanon maong ed impanguman-uman na saray ebenton akarekord ditan. Imbes a bersikulo-por-bersikulon impaliwawa, impabitar na libron Bearing Witness iray leksion a walad salaysay na Saray Gawa tan tulongan itayo na satan a namoria no panon tayon niyaplika iratan.—Roma 15:4.
2. Ipaliwawa so arum a kabiangan na libron Bearing Witness.
2 Saray Kabiangan na Libro: Say introduksion ed pahina 2 et maaron sulat na Mananguley ya Ulop a mangipapasabi’d pilalek dan minabang itayo’d sayan libro. Onggapo ed kapitulo 2, walay focus line a mangipapaliwawa ed lugan na kada kapitulo tan teksto ed Saray Gawa a konsideraen. Dakel a kapitulo so walaan na saray kahon a nankarga na impormasyon nipaakar ed saray karakter, lugar, odino ebento. Napannotaan iray maawang a mardyin. Diad interon libro et walaray detalyadon ilustrasyon na saray eksena ed Biblia ya ontulong pian nilitrato iray importantin ebento, tan diad sampot a pahina et walay image index a mangipapabitar no anto imay akalitrato. Diad loob na apis na libro et walaray mapa a makatulong ed sikatayon nanengneng so biniahe na saray kaparan managdayew nen inmunan siglo sanen inggapo dan ipulong so maong a balita “diad sankaarawian a pasen na dalin.”—Gawa 1:8.
3. Antoran importantin tepet so naebatan diad panaral ed libro na Saray Gawa?
3 Ebat ed Saray Importantin Tepet: Say pangonsidera ed libro na Saray Gawa so ontulong pian natalosan so ebat ed saray importantin tepet nipaakar ed ministeryo. Alimbawa, anton kimey tan mensahe so pakabidbiran na saray tuan papatumbok nen Jesu-Kristo? Siopa so mangididirehi ed sayan sankamundoan a panagpulong a kimey, tan panon? Antoran pankanawnawa so papawalaen na panamasegsegang tan isusumpa diad saray managpulong? Anto so betang na masanton espiritu ed ministeryo tayo?
4. Panon itayon sigpot a minabang ed aralen tayo?
4 Pian sigpot a minabang, masakbay lan aralen so materyal tan manparaan pian makapibiang ed panaral diad kongregasyon. Atendian so kada pantitipon, tan dalepdepen no panon yon niyaplika iray leksion a naaralan tayo.