Aligen so Pananisia Ra
1. Antoy aralen tayod Panagaral na Kongregasyon ed Biblia kagapoy Oktubre 19?
1 Onggapo no Oktubre 19, 2015, say libron Aligen so Pananisia Ra so aralen tayod Panagaral na Kongregasyon ed Biblia. Inusisan maong ed sayan publikasyon so agawa ed 14 ya bibii tan lalaki ed Biblia ya angipanengneng na pananisia. Say impanggawa ed sayan libro et diad paraan ya gawaen ton mabilabilay iray karakter ed nonot tayo, tan pian nalikna ya sarayan totoo et talagan nambilay tan dinmalan met ed nanduruman subok legan dan manlilingkor ed si Jehova. Ibabangat met na sayan libro iray praktikal a leksion ya mausausar natan.—Heb. 6:12.
2. Anto ray pigaran kabiangan na libron Aligen so Pananisia Ra?
2 Kabiangan na Sayan Libro: Makatulong iray kabiangan na sayan libro, a singa say time line tan mapa, pian nanengneng no iner tan kapigan nambilay irayan totood Biblia. Ontan met, kada kapitulo et walay seksion ya, “Dalepdepen . . . ” ya ontulong pian mas natalosan iray praktikal ya leksion. Dakel so makolor, napnoy detalye, tan in-research a maong iran litrato ya ontulong pian naimadyin tayo ray salaysay ed Biblia.
3. Antoy gawaen tayo pian nagunggonaan tayod panaral na sayan publikasyon?
3 No Panon Kan Minabang: Oniay ipapaseseg na Mananguley ya Ulop ed sulat da ya walad libro: “Imadyin yo imay babasaen yo. Kunwari et wadman kayon mismo ed eksena—ya singa yo met nalilikna so nalilikna na sarayan karakter ed Biblia, tan singa yo met nanenengneng iray nanenengneng da. Usisa yo ray ginawgawa da tan isip yo no anto met so gawaen yo no sikayoy walad situasyon da.” Siempre, say pan-imadyin et aliwan samay panimbento ed isip no antoy nagawa, balet pandalepdep iya ed ibabaga na Kasulatan tan pilikna ed sarayan totoo. Importante sirin so pangilaem na panaon pian makapandalepdep. (Neh. 8:8) No say aralen et agmanlapud gapo na kapitulo, irepaso ni na mangikondukta so inaral nen imbeneg diad loob na 30 anggad 60 segundo. Tan sikatoy nayarin mantepet na sakey o duara diad sampot bilang rebyu, no agkaibad aralen so seksion ya “Dalepdepen . . . ”
4. Akin ya kaukolan tayon aralen so libron Aligen so Pananisia Ra?
4 Manbibilay itayod mundon lanang ton pakakapuyen odino dederalen so pananisia tayo. Sayan libro—ontan met ed tuloytuloy ya serye na Say Panag-bantayan no iner ya imbase—et regalon nanlapud si Jehova ya ontulong pian pabiskegey pananisia tayo. (Sant. 1:17) Komon ta ipanengneng tayon papablien tayo yan probisyon diad regular ya iyatendi tan pankomentod Panagaral na Kongregasyon ed Biblia, legan tayon saniiban aaralen iyan publikasyon!