Niiter so Maabig a Pantasi
1. Nilikud ed paliwawa, anto ni so pandinayewan na saray onatendid Memoryal? Ipaliwawa.
1 Kapigan? Diad labi na Memoryal. Dakel a sagpot so ginawa pian naimbitaan iray totoo ya onatendin kaiba tayo. Aliwa labat a say narengelan da so nayarin pandinayewan da. Kayari inyatendi na sakey ya bii diad Memoryal, kinomendaan toy anengneng to—say inkamakaaro na amin tan say marakep, malinis a hall ya impaalagey tan minintina na saray boluntaryo. Kanian, aliwan say espiker labat, noagta amin tayo so nepeg a mitulongan diad pangiter na pantasi ed sayan sankaimportantian ya okasyon ed taon.—Efe. 4:16.
2. Panon a makapangiter na pantasi so balang sakey ed sikatayo?
2 Makaaron Awaten Iray Bisita: Say makaaron imis tan maliket a pangibano tayo’d sikara et sakey a maabig ya pantasi. (Juan 13:35) Anggano agmo nakatongtong so amin ya bisita, sarag mo nin siansia ya ipakabat so inkasika ed kakaabay mo. (Heb. 13:1, 2) Magmaliw a maimano ed saray bisitan anggapoy kabat da. Nayarin akaawat iray imbitasyon legan na panagbunog. Sarag mon itepet, “Natan yo labat asali inmatendi?” Imbitaan mo ran miabay ed sika, tan tepeten no walay labay dan naamtaan. No nakaukolan yoy onalis a tampol lapud walay kongregasyon ya onsublay a mangusar ed hall, nayarian mon ibaga: “Labay kon naamtaan no antoy nikuan yo’d programa. Panon ta kayon napitongtongan lamet ey?”
3. Panon so pangabrasa tayo’d saray inaktibo?
3 Abrasaen Iray Inaktibo: Seguradon walaray inaktibon manangipalapag ya onatendi, kaiba la iramay mililimog labat ed kongregasyon kada Memoryal. Abrasaen ira, tan ipaliknan malikeliket kayo’d impakanengneng ed sikara. (Roma 15:7) Nayarin sikaray bisitaen a tampol na saray elder pian pasesegen iran milimog lamet ed kongregasyon. Ipipikasi tayo a dakel ed saray onatendi so napakiwas a mangigloria ed Dios aliwa labat a lapud paliwawan narengelan da noagta ‘lapud nanengneng da iray maabig a gawa tayo.’—1 Ped. 2:12.