Maliket ya Awaten Iray Bisita

No Marso 23, iilaloan tayo ya manga 12 milyon o mas dakel nin bisita so onatendi ed Memoryal. Baleg a pantasi ed sikara so narengel dan paliwawa na espiker ed regalo nen Jehova ya dondon tan arum ya bendisyon ed arapen ya naawat na totoo lapud satan! (Isa 11:6-9; 35:5, 6; 65:21-23; Jn 3:16) Balet, aliwan say espiker labat so makapantasi ed sayan espisyal ya okasyon. Nagawaan tayon amin itan no maliket tayon awaten iray bisita. (Rom 15:7) Nia ray pigaran suhestion.

• Imbes ya basta labat onyurong tan alagaren ya onggapoy programa, ibano iray bisita tan inaktibo, imisan ira, tan magmaliw ya makaaro

• No wala ray kabat mo ya personal mon inimbitaan, nayarin asikasoen mo ran maong, balet imanoen mo met iray inmatendi ya abunogan tayoy imbitasyon. Payurongen ira ed abay mo. Inabang so Bibliam tan songbook mo

• Kayari na paliwawa, sarag mon ebatan iray tepet na bisita. No kaukolan ya onalis ya tampol lapud wala ni sananey a mangusar ya kongregasyon, iyeskedyul so ibisitad sikato kayari pigaran agew. Pian naamtaan so address to odino no panon mon nakontak, nayarin ibagam: “Labay kon naamtaan no antoy nibagam ed samay programa. Panon ta ka kasin nakontak?”