Pablim so Panagpulong a Kimey
1. Antoy panmoria na dakel nipaakar ed panagpulong tayo?
1 Ipapasen na maslak a totoo diad mundo nen Satanas a “kakulangkulangan” so panagpulong tayo. (1 Cor. 1:18-21) No ag-itayo manalwar, sayan pikewet a panmoria so manismaya tan mamakapuy ed seseg tayo. (Uli. 24:10; Isa. 5:20) Akin a papablien tayo so pribilehyon pagmaliw a Tasi nen Jehova?—Isa. 43:10.
2. Akin et nibagan “masanton kimey” so ministeryo?
2 “Masanton Kimey”: Tinukoy nen apostol Pablo so ministeryo bilang “masanton kimey.” (Roma 15:15, 16) Akin et nibagan ontan? Lapud no mibibiang itayo ed ministeryo, sikatayoy “kakimeyan” na “Masanton Dios,” si Jehova, tan ontutulong itayo pian napasanto so ngaran to. (1 Cor. 3:9; 1 Ped. 1:15) Momoriaen nen Jehova a “bagat a panangidayew” so panagpulong tayo. Kanian, say ministeryo et importantin kabiangan na panagdayew tayo.—Heb. 13:15.
3. Akin et baleg a pribilehyo so pangipulong ed maong a balita?
3 Say panangipulong ed maong a balita et baleg a pribilehyon niiter ed pigpigara. Pirpirawat na saray anghel iyan asainmin tan seguradon sarasarag da iyan gawaen. (1 Ped. 1:12) Balet, say pinili nen Jehova ed sayan nikaduman pribilehyo et sikatayoran ag-perpekton totoo a “pananginan a gawa ed pitek”!—2 Cor. 4:7.
4. Panon tayon nipanengneng a papablien tayo so ministeryo?
4 Prayuridad: Lapud talagan papablien tayo so pribilehyo tayo, momoriaen tayo so ministeryo a sakey ed saray “mas importantin bengatla” ed bilay. (Fil. 1:10) Kanian, iyi-eskedyul tayoy sinimban pibibiang ed panagpulong. No say sakey a musikero et papablien toy pribilehyo ton panugtog ed kabkabat ya orkestra, sikatoy manparaan ed kada palabas tan paaligwasen toy abilidad to. Mipadpara, manparaan itayo antis tayon manpulong pian ‘dugay pangusar tayo ed salita na katuaan,’ tan pansagpotan tayon paaligwasen so “dunong ed panagbangat.”—2 Tim. 2:15; 4:2.
5. Siopay mamapabli ed ministeryo tayo?
5 Agmo aabuloyan so panmoria na maslak a totoo a manismaya ed sika. Tandaan ya dakel nin siansia iray mangaapresyad ibibisita tayo. Balet, aliwan say panangabobon na too so aanapen tayo. Say nagkalalon importante et say panmoria nen Jehova, tan papablien ton maong so makulin sagpot tayo.—Isa. 52:7.