Panangipulong ed Panarian—Sakey a Mablin Pribilehyo
1 Diad inagew-agew et binilyon so nagugunggonaan a totoo diad dalin lapud daakan a probisyon nen Jehova parad bilay. (Mat. 5:45) Ingen ta pigpigara so walaan na nikadkaduman pribilehyo a mangipatnag na apresasyon ed Manamalsa ra panamegley na panangipulong ed maong a balita na Panarian na Dios. (Mat. 24:14) Panon kaaralem so panamabli yo ed sayan mablin pribilehyo?
2 Say panangipulong ed Panarian so mamapagalang ed Dios tan mangitatarok na ilalo tan kareenan ed saray totoon nagogonigon ed sayan magulon panaon. (Heb. 13:15) Parad saramay onkiwas ed mensahe, mankabaliksan itan na andi-anggaan a bilay. (Juan 17:3) Wala tay sekular a karera a makapangitarya na ontan iran gunggona? Impatnag nen apostol Pablo so panangapresya to ed ministeryo diad paraan na impanumpal to ed satan. Tan impasen to itan bilang kayamanan.—Gawa 20:20, 21, 24; 2 Cor. 4:1, 7.
3 Pablien so Mablin Pribilehyo Tayo: Say sakey lan paraan a nipatnag tayoy panangapresya ed pribilehyo tayon panagpulong et diad pangimano tayo ed kalidad na serbisyo tayo. Kasin mangigagana itayo na panaon ed pangiparaan na presentasyon ya ontanek ed kapusoan na saray nakatongtong tayo? Wala ni kasi aligwasan na dunong tayo ed panangusar na Kasulatan tan ed panagkatunongan ed saray totoo? Kasin kikimeyan tayon maong so teritorya tayo? Sarag tayo kasi so mangigapo tan mangikondukta na panangiyaral ed Biblia? Singa saray matoor a Kristiano, nensaman tan natan, papakiwasen itayo na suston panmoria ed sayan kimey, tan papablien tayo iyan pribilehyo.—Mat. 25:14-23.
4 Sano nipapaarap itayo ed saray epekto na itatakken, makapuy a bunigas, odino arum niran mairap a kipapasen, naliligliwa itayo ed pakaamtan say maseet a panagsagpot tayo pian makapibiang ed ministeryo so peteg a papablien a maong. Papaseguroan itayo na Salitay Dios a papablien nen Jehova iray ontan a sagpot diad panaglingkor ed sikato, anggan saramay sagpot ya ompatnag ya andi-kakanaan ed arum.—Luc. 21:1-4.
5 Say panangipulong ed panarian et lapuan na pirmin inkapnek. Oniay inkuan na 92 años ya agin bii: “Agaylan pribilehyo so pannodnonot ed apalabas ya 80 taon na imbunek a panaglingkor ed Dios—anggapon balot so pagbabawian ko! No naulit koy bilay ko, ontan lamet a panagbilay so pilien ko, lapud, peteg a ‘say maaron abig na linawa na Dios et magmaong nen say bilay.’” (Sal. 63:3) Komon ta pabpablien tayo met iyan mablin pribilehyo ya inter na Dios, salanti, say kimey a panangipulong ed Panarian.