Sakey a Paraan na Pangusar ed Brosyur ya Mensahe na Biblia

Diad saray teritorya tayo, dakel so agpamilyar ed Biblia, lalo la iramay aliwan Kristiano. Sano iyaaral ed sikara so libron Ibabangat na Biblia, uusaren met na arum a manangipalapag so brosyur ya Mensahe na Biblia pian makaala ira na ideya nipaakar ed Biblia. Alimbawa, sanen iyaaral na sakey ya agi so kapitulo 3 na libron Ibabangat na Biblia, impaimano to so seksion 1 na brosyur. Manlapu lad saman, kada nasumpal iran manaral et pantotongtongan day sakey nin seksion na brosyur. Kasin say iyaaralan mo et daiset odino anggapoy amta tod Biblia? Pian naaralan to ‘iray masanton sulat, ya makatulong ed sikaton magmaliw a marunong parad kilalaban,’ iyarum ed panangiyaral yod libron Ibabangat na Biblia so brosyur ya Mensahe na Biblia.​—2 Tim. 3:15.