Iyopresi so Balon Brosyur!
1. Antoy iyopresi tayo legay Nobyembre, tan antoy gagala na sayan publikasyon?
1 Diad “Mantultuloy a Manbantay!” a Distriton Kombension nen 2009, nipaway so balon brosyur ya Say Biblia—Anto So Mensahe To? Legay Nobyembre, diad unonan pankanawnawa et iyopresi iya na amin a kongregasyon ed interon mundo. Panon ya nagunggonaan iray totoo’d teritorya tayo ed sayan brosyur? Walaray totoon daiset labat so amta ra’d Biblia, lalo la iramay say relihyon da et agmanisia’d Kristo. Kanian, singa ibabaga na pahina 3 na sayan brosyur, imparaan iya pian nawalaan iray “ideya ed no antoy karga na Biblia.”
2. Panon so nayarin pangiyopresi tayo’d sayan brosyur?
2 No Panon so Pangiyopresi: Nayarin oniay ibaga tayo: “Labay min naamtaay opinyon yo ed ibabaga na sayan bersikulo. [Basaen so 2 Timoteo 3:16.] Dakel so nakakatongtong min manisia ed ibabaga to dia a say interon Kasulatan o Biblia et impuyan na Dios; ibabaga balet na arum ya say Biblia et marakep labat a libro. Sika balet ey, antoy nibagam ed satan? [Abuloyan ya onebat.] Antokaman so papanisiaan tayo, maabig no sikatayon mismo so manusisa’d Biblia. [Basaen so introduksion diad pahina 3.] Diad pambasam ed sumaryo na Biblia ed sayan brosyur, naamtaan mon saksakey manaya so tema tan mensahe na interon Biblia.”
3. Anto ni sananey a presentasyon a nausar tayo, lalo la’d teritoryan walaray say relihyon da et agmanisia’d Kristo?
3 Nayari met ya oniay ibaga yo, lalo la’d saramay lugar ya walaray say relihyon da et agmanisia’d Kristo: “Labay min naamtaay opinyon yo ed sayan ibabaga na sayan Kasulatan (odino masanton libro). [Basaen so Salmo 37:11.] Parad sika, anto kasi pagmaliwan na mundo no nagawa la iya? [Abuloyan ya onebat.] Sakey iya ed saray ilalo tan ligliwa ya naromog tayo’d Biblia, anggan antoy kultura o relihyon tayo.” Basaen so introduksion ed pahina 3, tan iyopresi so brosyur.
4. Panon tayon nausar so brosyur pian igapoy panangiyaral na Biblia?
4 Igapoy Panangiyaral na Biblia: Diad ipawil yo, ipanonot ed unabung imay teman inmunan apantongtongan yo tan pantongtongan lamet so sakey o duaran parapo nipaakar ed satan, ya usaren iray tepet ya walad leksab na pinili yon seksion. No labay yon usaren ya tampol so libron Ibabangat na Biblia, ibasa yo imay walad beneg na brosyur, ipabemben yo’d sikato so libro, tepetan yo no anton kapitulo so makapainteres ed sikato, tan pantongtongan yoy sakey o duaran parapo ed satan a kapitulo. Komon ta sigpot itayon mibiang ed pangiyopresi’d sayan brosyur legay Nobyembre!