Kasin Uusaren Yo so Brosyur a Kakaukolanen Pian Mangigapo na Panangiyaral?
1 Kasin namomoria yo a makapangikokondukta kayo la na panangiyaral na Biblia, no regular tan sistematikon nisisingbat yo so Biblia, anggaman magano labat, diad sakey ya interesadon too tan kobrian so materyal diad sakey a nirekomendan publikasyon? On, panangiyaral la itan anggaman nagagawa diad puerta odino panamegley na telepono. Akin ya agmanggawa na nikaduman sagpot legan na Mayo tan Hunyo pian nigapo so ontan a panagaral ya uusaren so brosyur a Kakaukolanen?
2 Manparaan Pian Ontalona: Sano iyoopresi so brosyur a Kakaukolanen, nonoten la no anto so kaliktan yon singbaten. No ompawil kayo, nonoten so apantongtongan yo ed primeron dalaw. Tepetan so inkasikayo: ‘Dinan ed saray parapo na brosyur so ipaimanok pian napalaknab so diskusyon diad ontan et magmaliw a sakey a panangiyaral na Biblia?’ No mankakabkaabungan kayo, ikonsidera no antoran tema so makapasagyat ed tin-edyer, maedad la, laki, odino bii. Repasoen iray tema ed brosyur, tan pilien so tema a paninteresan. Kayarin adesidi so pangiparungtal, manpasal a maminpiga. Saya so sakey ed saray sekreto pian ontalona.
3 Say insert ed sayan isyu na Ministeryo Tayo ed Panarian so mangiiter na waloran “Suhestion Diad Pangipresenta ed Kakaukolanen a Brosyur.” Say kahon a “Say Direktan Pangiparungtal” so mangipapanengneng no panon ya usaren so brosyur pian makapangigapo na saray panagaral. Nayarin usaren yo so unaan a suhestion a singa onggendan:
◼ “Kasin amta yo a diad pigaran minuto labat et naromog yo lay ebat ed importantin tepet ed Biblia? Alimbawa, akin a dakdakel so relihyon a mankuan a Kristiano? Kasin naumameng yo la itan?” Kayarin inmebat so too, ibukay ed leksion 13 tan isingbat so unonan duaran parapo. No wala ni panaon, basaen tan isingbat so sakey odino duaran teksto. Insan basaen so unor a tepet diad tagey na pahina, insan ikuan: “Say nakekeraan a leksion so mangipapabitar ed limaran pakapangibiigan na tuan relihyon. Maliket ak ya ompawil tan isingbat iraya ed sikayo.”
4 Manseet: Anamoten so kada pankanawnawa pian idemostra so panagaral ed Biblia diad brosyur a Kakaukolanen. Onkerew na panamendisyon nen Jehova. (Mat. 21:22) Diad panseet yo, nalikna yo so gayaga diad panulong ed sakey pian onkiwas ed maong a balita!