Isimpen
Saray Nisuherin Presentasyon Parad Lawak na Kimeyan
No Panon ya Usaren Iyan Insert
Maslak ed saray onggendan a presentasyon so naromog ed saray apalabas ya isyu na Ministeryo Tayo ed Panarian. Salien so anggan pigara a kaliktan yo diad panagpulong a kimey yo, tan imanoen no antoray resultan nagamoran. Isimpen iyan insert, tan repasoen iya sano manpaparaan parad ministeryo.
Nayarin nasagyat yo so interes na too ed Salitay Dios no direkta kayo ed punto. Espesipikon mantepet, insan basaen so antikey a Makasulatan ya ebat. Nayarian yon salien irayan suhestion:
“Legan mon momolimolien so arapen, kasin mailalo ka odino manduaruwa ka? [Abuloyan ya onebat.] Impasakbay la na Biblia iray magulon ebento a naiimatonan tayo natan tan say resulta na saratan.”—2 Tim. 3:1, 2, 5; Uli. 2:21, 22.
“Pampapagaan a maong natan so panangasikaso ed bunigas. Kasin amta yo la ya insipan na Dios a permanente ton solbaren so amin a problema ed bunigas?”—Isa. 33:24; Apoc. 21:3, 4.
“Kasin amta yo ya ipapasakbay na Biblia a diad kaunoran et wala labat lay sakey a gobierno a manguley ed interon dalin?”—Dan. 2:44; Mat. 6:9, 10.
“Diad padesir yo anto kasi iray kipapasen no si Jesu-Kristo so manuuley ed dalin?”—Sal. 72:7, 8.
“Dakel a totoo so makakasagmak na panangidumaduma lapud sekso, relihyon, odino rasa. Diad padesir yo, anto kasi liknaan na Dios ed ontan a panaglabi?”—Gawa 10:34, 35.
“Amta tayo a si Jesu-Kristo so nanggawa na dakel a milagro nen panaon to. No sarag moy onkerew ed sikato na sakey nin milagro, anto itan?”—Sal. 72:12-14, 16.
“Maslak a totoo so onsasawa lan ondedengel na saray problema. Say kaliktan dan narengel et saray solusyon. Balet iner so pakaromogan tayoy peteg iran solusyon ed saray problema tayo?”—2 Tim. 3:16, 17.
“Kasin amta yo no anto so Panarian ya ipipikasi yo ed Pikakasi na Katawan (odino, Ama Mi)?”—Apoc. 11:15.
Manangigapo na Tongtongan
Saray tepet ed leksab ya inaon ed saray tema diad libron Reasoning, so mangipapanengneng ed saray pahina diad libro a pakaromogan ed ebat:
Akin a sikatayoy ontatakken tan ompapatey? (98; 105 TG)
Antoy kipapasen na inaatey? (100; 107 TG)
Kasin walaray makatunongan a rason pian manisia ed Dios? (145; 126 TG)
Peteg kasin pampapagaan na Dios no anto so nagagawa ed sikatayo ran totoo? (147; 128 TG)
Kasin peteg a persona so Dios? (147; 128 TG)
Kasin onla ed tawen so amin a maong a totoo? (162; 220 TG)
Kaukolan ni kasin onla so too ed tawen pian nawalaan na peteg a maliket ya arapen? (163; 221 TG)
Akin ya importantin amtaen tan usaren so personal a ngaran na Dios? (196; 195 TG)
Peteg kasin si Jesu-Kristo so Dios? (212; 200 TG)
Anto so sumpalen na Panarian na Dios? (227; 88 TG)
Anto so gagala na bilay na too? (243; 70 TG)
Anto so makatulong pian napaaligwas so panamaley? (253; 267 TG)
Kasin aabobonan na Dios so amin a relihyon? (322; 360 TG)
Panon a naamtaan na too no dinan so dugan relihyon? (328; 365 TG)
Panoy kabiskeg na impluensya nen Satanas ed mundo natan? (364; 398 TG)
Akin ya aabuloyan na Dios so panirap? (393; 284 TG)
Akin ya ontanlan kasmak so karelmengan? (427; 83 TG)
Siopa so manguuley ed sayan mundo—say Dios odino si Satanas? (436; 388 TG)
Saray Suhestion Diad Pangipresenta ed Brosyur a Kakaukolanen
“Andi-duaruwan onabobon kayo a dakel so totoon manisia ed Dios. Amin a manisia ed sikato so onabobon a wala so kakaukolanen na Dios ed sikatayo. Balet say agpakapanpapaknaan na totoo et no Anto so kakaukolanen na Dios ed sikatayo?” Insan iparungtal so brosyur a Kakaukolanen, ibukay ed leksion 1, tan singbaten itan.
“Lapud dakerakel so problema ed bilay na pamilya natan, kasin naumameng yo la no anto so sekreto pian nadampot so liket ed pamilya?” Kayarin inmebat, ipaliwawa a diad Biblia et ipaparungtal na Dios so peteg a sekreto na liket ed pamilya. Basaen so Isaias 48:17. Insan ibukay ed leksion 8 diad brosyur a Kakaukolanen, tan ipabitar so pigara ed saray nisitan bersikulo ed Biblia a napanmatalkan a mangiwanwan ed kada membro na pamilya. Basaen iray tepet diad gapo na leksion. Tepetan so too no labay ton basaen iray ebat.
“Lugan na sayan brosyur so kompleton kurso ed panagaral a mangokobre ed saray manunan bangat na Biblia. Diad kada pahina, naromog yoray ebat ed saray tepet a mangogonigon ed totoo diad loob na pigara lan siglo. Alimbawa, Anto so gagala na Dios ed dalin?” Ibukay ed leksion 5, tan basaen iray tepet diad gapo na leksion. Tepetan so unabung no dinan so paninteresan ton maong, insan basaen so nasasaglawi iran parapo tan nengnengen iray matukoy a teksto. Ipaliwawa a say makapenek iran ebat ed arum niran tepet so mainomay a naromog a singa ed sayan siningbat. Isuheri ya ompawil ka lamet pian singbaten so sananey a tepet.
“Anto so iisipen yon rason ed marawal iran krimen diad limog na saray kalangweran natan? Kasin satan so resulta na kakulangay panangipasal na atateng? Odino arum nin bengatla, a singa say impluensya na Diablo?” Abuloyan ya onebat. No ikuan na too a lapud impluensya na Diablo, basaen so Apocalipsis 12:9, 12. Ipabitar so betang na Diablo diad pangiyaalibansa na gulo ed mundo. Insan ibukay so brosyur a Kakaukolanen diad leksion 4, tan tepetan so too no kasin naumameng to la no iner so nanlapuan na Diablo. Ituloy diad pambasa tan pangisingbat ed unona a duaran parapo. No say pinili ton rason ed karawalan diad limog na kalangweran et say “kakulangay panangipasal na atateng,” basaen so 2 Timoteo 3:1-3 tan ipabitar iray walna a mapatnag a mamapaloor ed sayan problema. Insan ibukay so brosyur a Kakaukolanen diad leksion 8, basaen so parapo 5, insan ituloy a singbaten.
“Diad padesir yo makatunongan kasin ilaloan ya ikdan itayo na Manamalsa na pikakabat a nakaukolan tayo pian niletneg so matalonan bilay ed pamilya?” Kayarin inmebat, iparungtal so Kakaukolanen a brosyur. Ibukay ed leksion 8, insan ipaliwawa a lugan na satan iray prinsipyo manlapud Biblia parad balang membro na pamilya. Iyopresi ya idemostra no panon ya usaren so brosyur tekep na Biblia pian sigpot a nagunggonaan.
“Lapud kinarakel na nipapaarap iran problema ed sikatayo diad modernon-agew a kabibilay tayo, kasin liknaen yon peteg a makatulong ed sikatayo so pikakasi? [Abuloyan ya onebat.] Dakel so mangibabaga a say pikakasi so mangiiter ed sikara na akindalem a biskeg. [Basaen so Filipos 4:6, 7.] Anggaman ontan, nayarin isipen na too a saray pikakasi to so agnaeebatan. [Ibukay so Kakaukolanen a brosyur diad leksion 7.] Sayan brosyur so mangipapaliwawa no panon a say pikakasi so makagunggonan tuloy ed sikatayo.”
“Mitotongtong kami ed saray kakaabay tayo nipaakar ed no akin ya amayamay so relihyon ed mundo. Ingen, saksakey labat so Biblia. Diad padesir yo, akin ya onia lan makawetwet iray relihyon? [Abuloyan ya onebat. Ibukay so Kakaukolanen a brosyur diad leksion 13, insan basaen so manangilukas iran tepet.] Naamtaan yo so makapenek iran ebat ed saratan a tepet diad pamasa ed sayan leksion.”
Kayarin impalima iray magasin a Panag-Bantayan tan Awake! ed too, tepetan no nayarin basaen ed sikato so sakey ya antikey a parapo. No inmabobon, ibukay so Kakaukolanen a brosyur diad leksion 5. Ipabitar iray tepet a nilista ed gapo na leksion, tan kerewen ed sikaton subaybayan to so ebat ed inmunan tepet legan yon babasaen so parapo uno. Kayarin binasa so parapo, tepetan tan abuloyan ya onebat. Iyopresi so brosyur, tan no satan so inawat to, iyarunsa so ipawil pian naebatan to iray onsublay a duaran tepet a nilista.
Saray Suhestion Diad Pangipresenta ed Libro a Pikakabat
Legan a sankaegnaan so Biblia, igapo diad pangibagan: “Inanabang mi so sakey a kasulatan ed balang sakey diad lugar yo natan. Onia so ibabaga na . . .” Basaen so Juan 17:3, insan itepet: “Naimano yo ta so insipan no walaan itayo na suston klase na pikakabat? [Abuloyan ya onebat.] Iner so pakaromogan na sakey ed ontan a pikakabat?” Kayarin inmebat, ipanengneng so libron Pikakabat, insan ikuan: “Ipaparungtal na sayan libro so pikakabat a mangitonton ed andi-anggaan a bilay. Eebatan na saya iray kaslakan lan tepet na totoo nipaakar ed Biblia.” Ipanengneng iray lugan na satan, tan tepetan no kasin naumameng to la so anggan dinan ed saratan a tema.
“Kasin naumameng yo la no talagan mapaga so Dios nipaakar ed ag-inkahustisya tan paniirap a nanenengneng tayo ed kaliberliber odino nasasagmak tayo a mismo? [Abuloyan ya onebat.] Ipapaseguro ed sikatayo na Biblia ya inaro itayo na Dios tan tulongan to itayo diad saray panaon na gonigon.” Basaen iray kabiangan na Salmo 72:12-17. Ibukay so libron Pikakabat diad kapitulo 8, tan ipabitar a wadtan so makaligliwan ebat ed itetepet na minilyon ya, Akin ya aabuloyan na Dios so panirap? No posibli, isingbat so pigaran Makasulatan iran ideya a wala’d parapo 3 anggad 5, odino gawaen itan diad ipawil.
“Maslak ed sikatayo so inateyan la na saray inadaro. Naumameng yo ta la no kasin nanengneng tayo lamet ira? [Abuloyan ya onebat.] Pinaneknekan nen Jesus a saray inadaro tayo so nayarin naagwat ed ipapatey. [Basaen so Juan 11:11, 25, 44.] Anggaman saya so agawa pigaran siglo la ed apalabas, idedemostra na saya no anto so insipan na Dios a gawaen parad sikatayo.” Ibukay so libron Pikakabat diad litrato ed pahina 85, tan basaen so kapsion. Insan ipanengneng so litrato ed pahina 86, tan komentoan itan. Iletneg so pundasyon parad ontumbok ya ibisita diad pangitepet: “Labay yon naamtaan so rason no akin ya ontatakken tan ompapatey so totoo?” Ompawil pian isingbat so kapitulo 6.
“Kasin naisip yo la no akin a pirpirawat na totoo so andukey a bilay?” Kayarin inmebat, ibukay so libron Pikakabat diad kapitulo 6, tan basaen so parapo 3. Mankatunongan ed nisita iran kasulatan. Diad panukoy ed duaran tepet diad sampot na parapo, tepetan so too no labay ton naamtaan so ebat. No paborabli so ebat to, isingbat so onsublay iran pigaran parapo.
“Tetepetan mi ray totoo no panisiaan da iya . . .” Basaen so Genesis 1:1, insan itepet: “Kasin onabobon ka ed sayan balikas?” No onabobon so too, ikuan: “Siak met. Balet, diad padesir mo no say Dios so amalsa ed amin a bengatla, kasin sikato met so responsable ed karelmengan?” Kayarin tinalineng so ebat to, basaen so Eclesiastes 7:29. Ibukay so libron Pikakabat ed kapitulo 8, tan basaen so parapo 2. No ag-onabobon ed Genesis 1:1, pasesegen a sukimaten toy paneknek a wala so Manamalsa.—Nengnengen so libron Reasoning, pahina 84-6 (291-2 diad Tagalog).
“Kasin mipakna kayo a lapud maples a panguuman na saray estandarte ed moral natan et kaukolan tayo so napanmatalkan a giya ed bilay? [Abuloyan ya onebat.] Anggaman say Biblia so sankadaanan ed saray libro, satan so mangiiter na praktikal iran simbawa parad kabibilay natan tan ed maliket a bilay na pamilya.” Insan ibukay ed kapitulo 2 na libron Pikakabat, tan basaen so parapo 10 tan say unonan estansa na parapo 11, pati say 2 Timoteo 3:16, 17.
“Labay yo ta a naamtaan no anto so itatarya na arapen parad sikatayo tan para ed dalin? [Abuloyan ya onebat.] Sinegek na Biblia so arapen ed saksakey a salita—Paraiso! Ditan so anginan na Dios ed inmunan sanasawa sanen pinalsa to ra. Imanoen pa iyan impaneskribe no panon so bilay ditan.” Ibukay so libron Pikakabat diad pahina 8, tan basaen so parapo 9, diad silong na sub-titulo a “Bilay Diad Paraiso.” Insan singbaten iray punto ed parapo 10, tan basaen so nisitan kasulatan ya Isaias 55:10, 11. Iyopresi ya ituloy so paningbat no antoy kipapasen na bilay diad nipawil a Paraiso, a kobrian iray parapo 11-16.
Sano ompapawil ed saramay apalimaan yo na saray magasin a Panag-Bantayan tan Awake!, nayarin oniay ikuan yo:
“Nen imbeneg a dinmalaw ak, aliketan ak ya akapangitilak ed sikayo na sakey a kopya na Panag-Bantayan a magasin. Anganko et naimano yon say interon titulo na dyurnal et Say Panag-Bantayan Mangipapalapag na Panarian nen Jehova. Natan et labay kon ipaliwawa no anto iyan Panarian tan no antoy kabaliksan na saya ed sikayo tan ed pamilya yo.” Insan ibukay so brosyur a Kakaukolanen diad leksion 6, insan basaen tan isingbat anggad wala ni so panaon na too parad satan.
“Dinalaw ta kayo nen agano ni tan angitilak ak na saray magasin a Panag-Bantayan tan Awake! Sarayan dyurnal so ontutulong pian lalon narespeto so Biblia tan say moral a panangiwanwan na satan. Lapud liknaen kon makana ed balang sakey a natalosan so Salita na Dios, pinmawil ak pian ipanengneng ed sikayo so bengatlan ontulong ed sikayon nagawaan itan.” Iparungtal so brosyur a Kakaukolanen odino say libron Pikakabat, tan iyopresi so panagaral ed Biblia.
Sano ipaparungtal so anggan dinan ed saray daan a libron walaan na 192 pahina, nayarian yon salien iyan presentasyon:
“Lawas ya idadanet so pankaukolan ed de-kalidad ya edukasyon. Diad padesir yo, anton klase na edukasyon so nepeg a gemtanen na sakey a too pian naseguro so sankaliketan tan sankatalonaan a bilay? [Abuloyan ya onebat. Insan basaen so Uliran 9:10, 11.] Sayan melag a libro [ibaga so titulo na libron iyoopresi yo] et nibase ed Biblia. Ipaparungtal na saya so mogmon lapuan na pikakabat a mangitonton ed andi-anggaan a bilay.” Mangipanengneng na espesipikon alimbawa diad libro, tan pasesegen so too a basaen itan.
Arum Niran Publikasyon
Saray nisuherin presentasyon parad kaaruman iran libro tan brosyur so naromog ed Watch Tower Publications Index diad silong na:
Presentations
Nilista unong ed Publikasyon
Say Direktan Panangiparungtal
Pian makapangigapo na panangiyaral na Biblia, salien ya usaren so sakey ed sarayan direktan panangiparungtal:
“Kasin amta yo a diad pigaran minuto labat et naromog yo lay ebat ed importantin tepet ed Biblia? Alimbawa, . . .” Insan, itepet so niparungtal ed gapo na sakey ed saray leksion diad brosyur a Kakaukolanen ya iisipen yon makapasagyat ed indibidual.
“Linma ak dia pian iparungtal ed sikayo so programa mi ed libren panagaral na Biblia. Mankakaukolan labat na limaran minuto so panangidemostra. Kasin nilugar yo so limaran minuto?” No say ebat et on, usaren so leksion 1 ed brosyur a Kakaukolanen pian idemostra so panagaral, a basaen labat so duara odino taloran apilin teksto. Kayari na satan, tepetan: “Kapigan kayo kasi nawalaan na manga 15 minuto pian nakobrian tayo so onsublay a leksion?”
“Dakel a totoo so walaan na Biblia, balet agda namomoria a lugan na satan iray ebat ed importante iran tepet tayon amin nipaakar ed arapen. Diad pangusar ed sayan katulongan ed panagaral [say brosyur a Kakaukolanen odino say libron Pikakabat] diad loob na sakey oras odino onsulok ni a sinimba, natalosan yo iray manunan bangat ed Biblia diad loob na pigaran bulan labat. Maliket ak a mangipapanengneng ed sikayo no panon a nagagawa so programa.”
“Linma ak dia pian iyopresi ed sikayo so libren kurso ed Biblia. No abuloyan yoak, labay kon idemostra diad loob na pigaran minuto no panon a sisingbaten na totoo diad manga 200 a daldalin so Biblia diad abung bilang inggrupon pamilya. Nayarian tayon usaren so anggan dinan ed sarayan tema bilang basiyan na diskusyon tayo. [Ipanengneng iray lugan na libron Pikakabat.] Dinan so nagkalautlan paninteresan yo?” Alagden so toon mamili. Ibukay ed kapitulo a pinili to, tan igapo so panagaral diad unonan parapo.
“Manbabangat ak na Biblia a libre tan wala ni eskedyul ko parad kaaruman iran estudyante. Saya so uusaren min katulongan ed panagaral na Biblia. [Ipanengneng so libron Pikakabat.] Say kurso so manbayag lambengat na pigaran bulan tan mangitatarya na saray ebat ed tepetepet a singa say: Akin ya aabuloyan na Dios so panirap? Akin a sikatayoy ontatakken tan ompapatey? Anto so nagagawa ed saray inad-aro tayon inaatey? Tan panon tayon onapit ed Dios? Nayari ta’n idemostrak so sakey a leksion?”
No akaromog kayo na maabig a presentasyon ya epektibo diad pamayubo na interes, itultuloy yon usaren itan! Iyadapta yo lambengat itan ed opresin literatura ed kaplesan a bulan.