Simpitan
Nisuheri Iran Presentasyon Parad Lawak na Serbisyo
Usaren iray onggendan a suhestion ya ontulong ed sikayon manparaan na saray presentasyon ya ontukoy ed saray opresin literatura na bulan.
Onapit ed si Jehova
“Dakel a totoon manisia ed Dios so malabay a lalon onapit ed sikato. Amta yo ta a sikatayoy iimbitaan na Dios ya onapit ed sikato? [Basaen so Santiago 4:8.] Sayan publikasyon so ginetman ontulong ed totoo a mangusar ed mismon Biblia ra pian onapit ed Dios.” Basaen so parapo 1 ed pahina 16.
“Natan et kasmak la so ag-inkahustisya. Singa onia ay ed adeskribe’d dia. [Basaen so Eclesiastes 8:9b.] Dakel so manduaruwa no mangiyaansakit ni kasi Dios. [Basaen so unonan duaran estansa ed parapo 4 na pahina 119.] Ipapaliwawa na sayan kapitulo no akin a temporaryon inabuloyan na Dios so ag-inkahustisya.”
Is There a Creator Who Cares About You?
“Iner kasi pakaromogan tayo na sankaabigan a simbawa no panon a resolbien iray makawetwet a problema? [Abuloyan ya onebat. Insan basaen so Mateo 7:28, 29.] Idedeskribe na satan so reaksion na totoo ed samay Sermon nen Jesus ed Palandey. Imanoen pa no anto so imbaga na arum. [Ipresenta iray komento ed pahina 152.] Sisingbaten na sayan kapitulo so bilay tan bangabangat nen Jesus.”
“Naumameng yo ta la a: ‘No walay Dios, paandien to kasi so amin ya irap tan ag-inkahustisya ed mundo?’ [Abuloyan ya onebat. Insan basaen so Apocalipsis 21:3, 4.] Ipapaliwawa na sayan libro no antoy gawaen na Dios pian panampoten so paniirap tan ekalen so lamot na satan.” Ipanengneng so kapitulo 10.
Pikakabat a Mangitonton ed Andi-Anggaan a Bilay
“No bilang ta naimbitaan kayon manayam ed singa onian karakep a kaliberliber, kasin awaten yo? [Ipanengneng so litrato ed pahina 4-5, tan abuloyan ya onebat.] Imanoen pa no antoy tinukoy na Dios a tombok pian napanggayagaan tayo so onian klase na bilay diad ando lan ando. [Basaen so Juan 17:3.] Sayan libro so ontulong ed sikayo pian nagamoran so pikakabat a mangitonton ed andi-anggaan a bilay.” Iyuksoy so paningbat ed unonan limaran parapo na kapitulo 1 diad ontumbok ya idalaw.
Ibukay ed litrato a walad pahina 188-9, tan itepet ed unabung so walad kapsion: “Kasin maniilalo kayon manbilay ed Paraiso, sano say dalin so napano na pikakabat na Dios?” [Abuloyan ya onebat. Insan basaen so Isaias 11:9.] Sayan libro so ontulong ed sikayon naamtaan so ibabaga na Biblia nipaakar ed Paraiso tan no panon tayon magmaliw a kabiangan na satan.” Iyuksoy so paningbat ed parapo 11-16 na kapitulo 1 diad onsublay ya idalaw.
Manaral Manlapud Sankamaongan a Managbangat
“Diad padesir yo magmaliw kasin mas maabig so pambilay ed sayan mundo no iyaplika na totoo iyan diparan? [Basaen so Mateo 7:12a. Insan abuloyan ya onebat.] Lugan na sayan libro so dakerakel a leksion manlapud sankamaongan a managbangat a nambilay.” Ipabitar iray litrato tan kapsion ed kapitulo 17.
“Panggugunaetan na dakel ya ateng natan so pangipurek na maabig iran estandarte ed ananak da. Padesir yo kasi et importante iya? [Abuloyan ya onebat. Insan basaen so Uliran 22:6.] Imanoen a saray ateng so papasesegen a mangipasal ed saray anak da manlapu la’d inkaugaw. Sayan libro so ginetman ontulong ed sikara a gawaen itan.” Ipabitar iray litrato tan kapsion ed kapitulo 15 odino 18.
“Mabetbet a nikekelawan iray ateng ed itetepet na ananak da. Arum ed saratan a tepet et mairap ya ebatan, agta ontan? [Abuloyan ya onebat. Insan basaen so Efeso 6:4.] Sayan libro so ontulong ed saray ateng a mangebat ed tepetepet na ananak da natan.” Ipabitar so pigara ed saray litrato tan kapsion ed kapitulo 11 tan 12 odino 34 ya anggad 36.
Life—How Did It Get Here? By Evolution or by Creation?
“Amin tayo so mapaga ed krimen tan karawalan ed lugar tayo. Diad padesir yo wala tay siopaman a walaan na peteg a solusyon ed satan a problema? [Abuloyan ya onebat.] Say Dios so walaan na solusyon.” Ibukay ed pahina 196; basaen tan komentoan so Uliran 2:21, 22 ed parapo 19. Ipanengneng so titulo na kapitulo 16, insan iyopresi so libro.
Ibukay ed pahina 6, insan ibaga: “Iisipen na dakel a totoo a say marakdakep a planeta tayo tan saray mabilay a wadia so resulta labat na inkibanbana. Anto so padesir yo a makatunongan ya eksplinasyon no panon a linmesa irayan amin? [Abuloyan ya onebat.] Amayamay ya ebidensya so mamepekder ed salaysay na Biblia nipaakar ed sakey a Manamalsa a makapanyari tan inadaro to itayo met. Sikato so tuan Dios, tan say ngaran to et Jehova.” Basaen so Salmo 83:18, tan antikey ya ipaliwawa a gagala ton pagmaliwen a paraiso so interon dalin.
Mankind’s Search for God
“Diad karakel na relihyon natan, naumameng yo ta la no panon tayon naamtaan no dinan so aabobonan na Dios?” Kayari ton inmebat, ibukay ed pahina 377. Ipabitar so koma-7 punto, insan tepetan so unabung no kasin onabobon a say tuan relihyon et nepeg a napankasakey to so amin a rasa na katooan. Ibasa so sakey ed saray nisitan teksto, tan no iyabuloy ni oras, singbaten niray arum ed nanggegendanan a punto. No angipatnag so unabung na masimoon ya interes, iyopresi so libro. No manpatanir kayo la, nayarin itepet yo, “Anto kasi so nepeg ya epekto na tuan relihyon ed walna na sakey a too?” Iyuksoy so ipawil pian ebatan so tepet.
No impakabat na sakey a too a sikatoy membro na sakey a manunan relihyon, nayarin ibaga yo: “Makapainteres a nakabat iray totoo ed nanduruman relihyon. Nanduruman paraan so panaanap na katooan ed Dios. [No matukoy, basaen so Gawa 17:26, 27.] Mabetbet et tutumboken na totoo so relihyon na atateng da. [Basaen so parapo 12 ed pahina 8.] Naliwawaan ka tan makaibangat so pakaaral na dakel ni nipaakar ed arum a relihyon. Ipapaliwawa na sayan libro so lapuan, ag-agamil, tan bangabangat na saray manunan relihyon ed mundo.” Ipanengneng so sakey ya alimbawan impormasyon a lugan na libro nipaakar ed relihyon na unabung, a singa naromog ed sarayan pahina: Sikhismo (100-1); Hinduismo (116-17); Budismo (141); Taoismo (164-6); Confucianismo (177); Shintoismo (190-5); Judaismo (220-1); tan Islam (289).
Revelation—Its Grand Climax At Hand!
“Nayarin arengelan yo la so nipaakar ed [mamitla na sakey a balita]. Sano biglaan ya ompatey iray totoo, dakel so maniisip no anto kasi ligliwan niiter da ed saray pamilya na saray biktima. Antoy padesir yo?” Abuloyan ya onebat. Insan ibukay ed pahina 299, tan ipanengneng so litrato na eksena ed kikioli. Oniay ituloy ya ibaga: “Dakel so nasusurprisa sano nakakabatan da ya onoli iray matunong tan agmatunong a totoo diad Paraison dalin. [Basaen so Gawa 24:15 unong ya inaon ed parapo 9 diad pahina 297, insan itarya so eksplinasyon a walad parapo 10.] Sisingbaten na sayan libro so dakel a makapainteres iran detalye nipaakar ed gagala na Dios parad arapen.”
The Bible—God’s Word or Man’s?
“Manbibilay itayo ed panaon a ngalngalin amin et walaan na seryoso iran problema. Dakel so ontutupleg ed amin a klase na managkonseho pian paigiya. Walaray patutulongan ed saray psychic. Iner so padesir yon pakaromogan tayo na maabig a simbawa a talagan makatulong ed sikatayo? [Abuloyan ya onebat.] Sasalambiten na Biblia so sakey ya importantin katuaan a kaukolan tayon amin a talosan. [Basaen so 2 Timoteo 3:16. Insan ibukay ed pahina 187, tan basaen so parapo 9.] Tulongan kayo na sayan libro a natalosan no panon a say panumbok ed ibabaga na Biblia so naynay a manresulta ed sankaabigan.”
The Greatest Man Who Ever Lived
“Sano panaon na Krismas, dakel a totoo so mannononot ed si Jesus. Balet, lapud inkakasmak na mauges iran nagagawa ed interon mundo, panduaruwaan na arum no talaga kasin iyaansakit itayo nen Jesus. Anto met so nikuan mo ed satan?” Abuloyan ya onebat. Ibukay ed kapitulo 24, tan isingbat a magano no akin a linma si Jesus diad dalin. Insan basaen so Juan 15:13, ya idanet so impapuson panangaro nen Jesus ed arum.
“Sano nasalambit na sakey si Jesu-Kristo, dakel so manisip ed sikato bilang sakey a kapangiyanak ya ugaw odino maniirap a toon asingger lan ompatey. Say nanonotan da labat ed si Jesus et say inkianak tan impatey to. Kaslakan et agda amta iray makapakelaw a bengatlan imbaga tan ginawa to legan na impanbilay to. Lanoren na say ginawa to so amin a toon nambilay ed dalin. Kanian importante a makaaral itayo na dakel anggad posible nipaakar ed saray makapakelaw a bengatlan ginawa to parad sikatayo.” Basaen so Juan 17:3. Ibukay ed unonan pahina na introduksion, tan basaen so komapat a parapo.
Anto so Kakaukolanen na Dios ed Sikatayo?
“Diad padesir yo, kasin getma na Dios a sikatayoy manbilay ed magulon kaliberliber a singa naeeksperiensya tayo natan? [Abuloyan ya onebat. Insan basaen so Mateo 6:10.] Inisip yo ta la no anton talaga so Panarian na Dios?” Ibukay ed leksion 6, tan basaen iray tepet ed gapo na leksion. Igapon singbaten so leksion, odino iyuksoy so panggawa ed satan diad ontumbok ya idalaw.
“Anggaman onaaligwas so modernon sosyedad, say sakit tan ipapatey so siansian pirmin mamapairap tan mamapaermen ed katooan. Amta yo ta no antoy gawaen nen Jesus parad saray mansasakit, maedad la, tan anggan ed saray inaatey?” Abuloyan ya onebat. No labay na too a naamtaan so ebat, ibukay ed leksion 5, tan basaen iray tepetepet parad parapo 5-6. Singbaten iray parapo, odino iyuksoy so panggawa ed satan diad ontumbok ya idalaw.
Dayewen so Alenleneg a Tuan Dios
“Iner so padesir yon pakaromogan tayo na tulong pian naanosan iray desdes ed bilay? [Abuloyan ya onebat. Insan basaen so Roma 15:4.] Imanoen ya itatarya ed sikatayo na impuyan a Kasulatan so kibangatan, pakaligliwaan, tan ilalo a mamabiskeg ed sikatayon sungdoan iray kairapan. Itatarya na sayan libro iray suhestion ya ontulong ed sikatayon nagunggonaan a maong ed panagbasa na Biblia.” Ipabitar so apatiran punto a nidatak ed pahina 30.
“Nanlapu la’d samay inyakar nen Jesus ed dalin, dakel lan totoo so mangipipikasi ed isabi na Panarian na Dios. Inisip yo ta la no antoy kabaliksan na isabi na satan a Panarian parad katooan? [Abuloyan ya onebat. Insan basaen so Daniel 2:44.] Ipapaliwawa na sayan libro no anto so Panarian na Dios, no antoy gawaen na satan, tan no panon itayon nagunggonaan ed matunong ya uley to.” Ipanengneng so ilustrasyon ed pahina 92-3.