(1) Tepet, (2) Teksto, tan (3) Kapitulo
Say simplin paraan a pangipresenta ed Anto so Peteg ya Ibabangat na Biblia? et say (1) pamalesa na punto de bista a tepet, (2) pamasa na matukoy a teksto, tan (3) pangiparungtal na sakey a kapitulo ed libro a manisingbat ed satan a tema diad pamasa ed manangigapo iran tepet ed leksab na titulo na kapitulo. No interesado so unabung, nayarin idemostra yo so panagaral na Biblia ya usaren so manangigapo iran parapo na satan a kapitulo. Sayan metodo so nayarin usaren ed pangigapo na panagaral sano primeron ondalaw odino sano ompawil.
◼ “Diad padesir yo, posible kasin nakabat na totoo lambengat so makapanyarin-amin a Manamalsa tayo, unong a nibaga dia ed Biblia?” Basaen so Gawa 17:26, 27, tan abuloyan ya onebat. Insan iparungtal so kapitulo 1.
◼ “Diad saray probleman kipapaarapan tayo natan, diad padesir yo, posible kasin naromog so ligliwa tan ilalo ya adeskribe’d dia?” Basaen so Roma 15:4, tan abuloyan ya onebat. Insan iparungtal so kapitulo 2.
◼ “No walaan kayo na pakapanyari, kasin gawaen yo irayan pananguman?” Basaen so Apocalipsis 21:4, tan abuloyan ya onebat. Insan iparungtal so kapitulo 3.
◼ “Diad padesir yo, naeksperiensya ni kasi na ananak tayo iray kipapasen ya adeskribe ed sayan kanta nensaman?” Basaen so Salmo 37:10, 11, tan abuloyan ya onebat. Insan iparungtal so kapitulo 3.
◼ “Diad padesir yo, onsabi ni kasi agew a nasumpal irayan salita?” Basaen so Isaias 33:24, tan abuloyan ya onebat. Insan iparungtal so kapitulo 3.
◼ “Naumameng yo ta la no kasin amta na inaatey so gagawaen na saray mabilay?” Abuloyan ya onebat. Insan basaen so Eclesiastes 9:5, tan iparungtal so kapitulo 6.
◼ “Diad padesir yo, posible kasi a kasabi agew et nanengneng tayo lamet iray inad-aro tayon inaatey la, unong ya imbaga nen Jesus ed sarayan bersikulo?” Basaen so Juan 5:28, 29, tan abuloyan ya onebat. Insan iparungtal so kapitulo 7.
◼ “Diad padesir yo, panon a posiblin nagawa so linawa na Dios ed dalin a singa ed tawen, unong ya asalambit ed sayan bantog a pikakasi?” Basaen so Mateo 6:9, 10, tan abuloyan ya onebat. Insan iparungtal so kapitulo 8.
◼ “Diad padesir yo, kasin manbibilay itayo la ed panaon ya adeskribe ed sayan propesiya?” Basaen so 2 Timoteo 3:1-4, tan abuloyan ya onebat. Insan iparungtal so kapitulo 9.
◼ “Panumamengan na dakel a totoo no akin ya onloloor iray problema na katooan. Kasin ninonot yo la iya bilang posibilidad?” Basaen so Apocalipsis 12:9, tan abuloyan ya onebat. Insan iparungtal so kapitulo 10.
◼ “Nampirawatan yo ta lan naamtaan so ebat ed tepet a singa saya?” Basaen so Job 21:7, tan abuloyan ya onebat. Insan iparungtal so kapitulo 11.
◼ “Diad padesir yo, kasin say pangiyaplika ed sayan simbawa na Biblia et ontulong ed totoo pian napanggayagaan so maliket a bilay na pamilya?” Basaen so Efeso 5:33, tan abuloyan ya onebat. Insan iparungtal so kapitulo 14.
Nayari lan ireport bilang sakey a panangiyaral na Biblia no amidua lan nikondukta kayarin nidemostra so uksoyan ed panagaral tan no natebek a mantultuloy so panagaral.