No Panon ya Iyopresi so Libron Ibabangat na Biblia

Sayan insert so mangilaktip ed nanduruman suhestion parad pangiyopresi ed libron Ibabangat na Biblia. Pian epektibon maong, ibalikas iratan ed dilin salita yo, iyadapta so metodo yo ed totoo ed teritorya yo, tan kabisadoen iray napantongtongan a punto ed libro. Nayari met ya usaren so arum niran presentasyon a praktikal ed teritorya yo.​—Nengnengen so Enero 2005 a Ministeryo Tayo ed Panarian, p. 8.

Armagedon

◼ “Sano narengel na totoo so salitan ‘Armagedon,’ isipen na dakel so interamentin kadederal. Agkayo ta nikelawan a naamtaan a say Armagedon manaya et nepeg a pampilalekan tayon talaranan? [Abuloyan ya onebat. Insan basaen so Apocalipsis 16:14, 16.] Imanoen pa iyan komento ed no antoy kipapasen na bilay kayari na Armagedon.” Ibukay ed pahina 82-4, tan basaen so parapo 21.

Biblia

◼ “Mabetbet a tukoyen na totoo so Biblia bilang Salitay Dios. Naumameng yo ta la no panon a say sakey a libron insulat na totoo et matukoy a natawag a Salitay Dios? [Abuloyan ya onebat. Insan basaen so 2 Pedro 1:21 tan parapo 5 pahina 19-20.] Sayan publikasyon so mangiiter na saray ebat na Biblia ed sarayan tepet.” Ipanengneng iray tepet ed pahina 6.

◼ “Saray totoo natan so mas mainomay a makagamor na dakel ya impormasyon nen say nensaman. Balet iner so padesir yon pakaromogan tayo na maabig a simbawa a makatulong ed sikatayon nawalaan na maliket tan matalonan kabibilay? [Abuloyan ya onebat. Insan basaen so 2 Timoteo 3:16, 17 tan parapo 12 ed pahina 22-3.] Isasalaysay na sayan libro no panon itayon makapambilay a makapaliket ed Dios a pakagunggonaan tayon mismo.” Ipanengneng so tsart tan litrato ed pahina 122-3.

Bilay ya Andi-anggaan

◼ “Pampilalekan na maslak a totoo so maabig a bunigas tan andukey a bilay. Balet no posible, labay yo ta so manbilay ya ando lan ando? [Abuloyan ya onebat. Insan basaen so Apocalipsis 21:3, 4 tan parapo 17 ed pahina 53-4.] Sisingbaten na sayan libro no panon tayon nagamoran so andi-anggaan a bilay tan no antoy kipapasen na bilay no nagawa la itan a sipan.”

Guerra/Kareenan

◼ “Pirawat na totoo ed anggan iner a pasen so kareenan. Diad padesir yo, kugip labat kasi so panilalo ed kareenan diad dalin? [Abuloyan ya onebat. Insan basaen so Salmo 46:8, 9.] Sisingbaten na sayan publikasyon no panon a gawaen na Dios so gagala to tan itarok so kareenan ed interon globo.” Ipanengneng so litrato ed pahina 35, tan singbaten iray parapo 17-21 ed pahina 34, 36.

Jehova a Dios

◼ “Dakel a totoon manisia ed Dios so malabay ya onapit ed sikato. Amta yo ta ya iimbitaan itayo na Biblia ya onsingger odino onapit ed sikato? [Abuloyan ya onebat. Insan basaen so Santiago 4:8a tan parapo 20 ed pahina 16.] Imparaan iyan libro pian ontulong ed totoo a makaaral a nagkalalo nipaakar ed Dios, ya usaren so dili ran kopya na Biblia.” Ipanengneng so manangigapo iran tepet ed pahina 8.

◼ “Ipipikasi na dakel a totoo a napasanto, odino nadayew komon so ngaran na Dios. Naumameng yo ta la no anto itan a ngaran? [Abuloyan ya onebat. Insan basaen so Salmo 83:18 tan parapo 2-3 ed pahina 195.] Isasalaysay na sayan libro no antoy peteg ya ibabangat na Biblia nipaakar ed Jehova a Dios tan say gagala to ed katooan.”

Jesu-Kristo

◼ “Nadngelan la na saray totoo ed interon dalin so nipaakar ed si Jesu-Kristo. Ibabaga na arum a sikatoy sakey labat a matalonggaring a too. Arum so mandadayew ed sikato bilang Makapanyarin-amin a Dios. Diad padesir yo, importante kasi no antoy sisiaen tayo nipaakar ed si Jesu-Kristo?” Abuloyan ya onebat. Insan basaen so Juan 17:3 tan parapo 3 pahina 37-8. Ipaimano so manangigapo iran tepet ed leksab na titulo na kapitulo.

Paabung

◼ “Diad dakel a pasen, mairap so pakaromog na desente tan mamuran lugar a napanayaman. Diad padesir yo, onsabi kasi agew a niwalay magenap ya abung parad amin? [Abuloyan ya onebat. Insan basaen so Isaias 65:21, 22 tan parapo 20 ed pahina 34.] Ipapaliwawa na sayan libro no panon a nagawa iyan sipan na Dios.”

Pamilya

◼ “Interesado tayon amin ed pakawalaan na maliket a bilay na pamilya, agta ontan? [Abuloyan ya onebat.] Sasaglawien na Biblia so bengatlan nagawaan na balang sakey ed pamilya pian niwalay liket ed loob na pamilya, salanti, say pangalig ed Dios ed pangipatnag na aro.” Basaen so Efeso 5:1, 2 tan parapo 4 ed pahina 135.

Patey/Kioli

◼ “Panumamengan na dakel a totoo no anton talaga so nagawa diad ipatey. Diad padesir yo, posible kasin naamtaan tayo itan? [Abuloyan ya onebat. Insan basaen so Eclesiastes 9:5 tan parapo 5-6 ed pahina 58-9.] Ipapaliwawa met na sayan libro no antoy kabaliksan na sipan na Biblia nipaakar ed kioli parad saramay inaatey.” Ipanengneng so litrato ed pahina 75.

◼ “Sano ompatey so inad-aro tayo, natural labat a labay tayon napinengnengan lamet ira, agta ontan? [Abuloyan ya onebat.] Dakel la so aligliwa ed sipan na Biblia nipaakar ed kioli. [Basaen so Juan 5:28, 29 tan parapo 16-17 ed pahina 71-2.] Eebatan met na sayan kapitulo irayan tepet.” Ipanengneng iray manangigapon tepet ed pahina 66.

Pikakasi

◼ “Kasin naumameng yo la no panon ya eebatan na Dios iray pikakasi? [Abuloyan ya onebat. Insan basaen so 1 Juan 5:14, 15 tan parapo 16-18 ed pahina 170-2.] Ipapaliwawa met na sayan kapitulo no akin a nepeg tayoy manpikasi ed Dios tan no antoy nepeg tayon gawaen pian dengelen to itayo.”

Relihyon

◼ “Momoriaen la natan na dakel a totoo iray relihyon ed mundo bilang sengegan na saray problema na katooan imbes a solusyon. Diad padesir yo, say relihyon kasi et mangiwawanwan ed totoo ed dugan direksion? [Abuloyan ya onebat. Insan basaen so Mateo 7:13, 14 tan parapo 5 ed pahina 145-6.] Uusisaen na sayan kapitulo so anemiran aspekto a nabidbiran so panagdayew ya aabobonan na Dios.” Ipanengneng so listaan ed pahina 147.

Trahedya/Paniirap

◼ “No walay nagawan trahedya, dakel so manduaruwa no kasin peteg a mangiyaansakit so Dios ed totoo tan iimanoen toray kairapan da. Naumameng yo ta la itan? [Abuloyan ya onebat. Insan basaen so 1 Pedro 5:7 tan parapo 11 ed pahina 11.] Isasalaysay na sayan publikasyon no panon a sigpot ya ekalen na Dios so paniirap na katooan.” Ipanengneng so manangigapo iran tepet ed pahina 106.

[Kahon ed pahina 5]

Saray Paraan na Panalambit ed Uksoyan a Panagdonasyon

“No labay yoy mangiter na daiset a donasyon natan parad sankamundoan a kimey mi, maliket ak a mangawat ed satan.”

“Anggaman say literatura mi et iyoopresi ya anggapoy bayar, aawaten mi iray melag a donasyon parad sankamundoan a kimey mi.”

“Nayarin panumamengan yo no panon min nagagawaan iyan kimey. Saya so lapud say sankamundoan a kimey mi et susuportaan na boluntaryo iran donasyon. No labay yoy mandonasyon na daiset natan, maliket ak a mangawat ed satan.”