Pangaligan Iran Presentasyon

Pian Makapangigapoy Panangiyaral na Biblia ed Unonan Sabado na Oktubre

“Diad sayan mairap a panaon, dakel so probleman nadadalan na kada pamilya. Parad sikayo, iner kasi napangalaan tayoy napanmatalkan a tulong pian magmaliw a maliket so pamilya tayo?” Abuloyan ya onebat. Ikdan na kopya na Oktubre-Disyembre a Panag-bantayan. Basaen tan ipaliwawa so sakey ed saray subheading diad pahina 16 tan 17 tan sakey ed saray nisitan teksto. Iyopresi iray magasin tan iyeskedyul so ipawil pian pantongtongan so onsublay ya tepet.

Say Panag-Bantayan Oktubre-Disyembre

Ipanengneng so apis na magasin tan itepet, “Antoy naliknam sano naamtaan mon tila manayay imbangat ed sika nipaakar ed Dios? [Abuloyan ya onebat.] Imanoen so imbaga nen Jesus no panon a nibiig so tua ed tila. [Basaen so Juan 17:17.] Kanian say Biblia labat so mangibabagad sikatayo na katuaan nipaakar ed Dios. Ipaliwawa na sayan magasin so limaran kaslakan a katilaan nipaakar ed Dios ya impaamta na Biblia.”

Awake! Oktubre

“Wadia kami natan pian itongtong so nipaakar ed pamilya. Parad sikayo, antoy sankairapan a naeeksperiensya na saray atateng diad pamapabaleg ed ananak da? [Abuloyan ya onebat.] Dakel ya atateng so manmamatalek ed simbawa na Biblia. Alimbawa, makatulong iyan teksto sano didisiplinaen iray anak. [Basaen so Efeso 4:31.] Ipapanengneng na sayan magasin no panon a natulongan na simbaway Biblia iray atateng diad pamapabaleg dad anak da.”