Tulongan so Unabung a Mankatunongay Duga
1. Anton paraan so sankaepektiboan ed ministeryo?
1 Dinan ed sarayan paraan so mas epektibo ed ministeryo—amay ipilit tayoy labay tayo odino amay tulongan tayo ray unabung a mankatunongan tan nalinewan no antoy duga? Sayay mikadua so inyaplika nen apostol Pablo sanen akitongtong ed saray Judio diad Tesalonica, tan “lapud saya et nagmaliw a mananisia so arum ed sikara.” (Gawa 17:2-4) Panon tayon nagawaan itan?
2. Panon tayon naalig si Pablo sano ipupulong so maong a balita?
2 Ikonsideray Liknaan tan Abangonan Da: Natulongan tayo ray totoo ed teritorya tayo a mankatunongay duga tan nalinewan no ikonsidera tayoy liknaan tan sisisiaen da. Sanen nampaliwawa si Pablo ed saray agmananisian Griego diad Areopago, say sinalambit to et saray bengatlan amta da tan papanisiaan da. (Gawa 17:22-31) Kanian, sano manpaparaan na presentasyon, nonoten no antoray sisisiaen tan aglabay na totoo ed teritorya yo. (1 Cor. 9:19-22) No ag-onabobon so unabung, say itongtong la et saray bengatlan pampaknaan yo.
3. Panon tayon makapikatunongay duga ed arum diad pangusar na epektibo iran tepet?
3 Mangusar na Epektibo Iran Tepet: Say sakey ya ombiabiahe et agtayo naikdan na dugan direksion paarap ed destinasyon to no agtayo amta so kawalaan to. Mipadpara, agtayo natulongan so unabung a namoria no antoy duga no agtayo amta so papanisiaan to. Antis ya ipapalinew nen Jesus so sakey a punto, kaslakan lan tetepetan to ni ray katongtong to pian naamtaay panmoria ra. Alimbawa, sanen walay lakin nantepet ed sikaton “antoy nepeg kon gawaen pian natawir koy andi-anggaan a bilay?,” inamta nin unona nen Jesus no antoy opinyon to antis ya inmebat. (Luc. 10:25-28) Diad sananey ya inkagawa, sanen aliway ebat nen Pedro, angusar si Jesus na epektibo iran tepet pian nipetek so panmoria to. (Mat. 17:24-26) Kanian, no say unabung et mantepet odino mangibagay lingon panmoria, sarag tayoy mangusar na tepetepet pian makapikatunongay duga.
4. Akin et nepeg tayon tulongan so unabung a mankatunongay duga?
4 No tulongan tayoy unabung a mankatunongay duga, aaligen tayo so Sankamaongan a Managbangat, si Jesus, pati saray marundunong ya ebanghelisador nen inmunan siglo. Tan nipanengneng tayon rerespetoen tayoy unabung. (1 Ped. 3:15) Bilang resulta, ompan onabuloy a sikatoy pawilen tayo.