Paaligwasen Iray Abilidad Tayod Ministeryo—Pangebat ed Saray Mamatunday Tongtongan

No Akin ya Importante: Imadyin mo pan antam ya walay onsabin kalamidad. Ompatey iray totoo no ag-ira onlad maligen a pasen. Linma kad abung na kaabay yo pian pasakbayan, balet pinatunda to ka, tan imbaga ton sikatoy busy. Seguradon agmo bastabasta taynan, imbes siansia nin pasakbayan mo! Dakel ed teritorya tayo so ag-ondengel, ta agda amtay kaimportantian na mensahe tayo. Ompan talagan busy ra nen nampulong tayo. (Mat. 24:37-39) Odino nayarin naimpluensiaan ira ed saray tilan ibabaga na arum ed sikatayo. (Mat. 11:18, 19) Ompan ipasen dan anggapo met so pidumaan tayod arum iran relihyon ya makapuy so kagagawa da. (2 Ped. 2:1, 2) No diad gapo et singa ag-interesadoy householder, agtayo bastabasta manpapatanir.

No Panon Iyan Nagawaan:

Antis kan manpulong, nonot mo ni ray posiblin ibaga na saray totoo a nayarin mamatunday tongtongan tan manparaan no panoy pangebat.
No onsuppiat so householder, mataktikan ituloy so tongtongan. Nayarin nagawaan itan diad pankomendad sikato. Singa bilang, no ibaga ton wala lay relihyon to, nayarin oniay ibagam, “Diad tua, labalabay mi makaromog na totoon walaay interes ed espiritual ya singa sikayo.” No maminsan, say pangikonsiderad liknaan odino situasyon na householder et makatulong pian nituloy moy tongtongan. Singa bilang, no ibaga ton busy, nayarin ibagan: “Natatalosan ta kayo. Balet antis ak ya onalis, labay ko yan iter ed sikayo.” No walay mangibagan ag-interesado sarag mon itepet, “Kasin diad Biblia kayo ag-interesado odino diad relihyon?”
Usar moy pakatebek. Tandaan ya agpipiliten nen Jehova iray totoo ya ondengel. (Deu. 30:19) Akauley so kada sakey ed espiritual a responsabilidad tod Dios. (Gal. 6:5) No talagan aglabay na householder so ondengel, maabig no manpatanir la. Diad panrespetod liknaan to, ompan diad ontumbok ya napulongan et ondengel la.—1 Ped. 3:15.

Gawaen Iya Legan na Sayan Bulan:

No say aromog yon householder et mamatunday tongtongan, kaalis yo, pantongtongan yo na kaulop mo no anto komoy mas maabig ya paraan na impangebat mo.