Manalwar Legan a Walad Ministeryo
1. Akin ya nepeg tayon manalwar sano manpupulong?
1 “Singa saray karnero ed limog na saray lobo,” saray lingkor na Dios et manpupulong “ed limog na pikewet tan mauges a kailalakan.” (Mat. 10:16; Fil. 2:15) Mabetbet la ray makapataktakot ya balita nipaakar ed totoon manproprotesta, bayolenti iran grupo ya manggugulo, tan andiay panangasi ya panag-kidnap, ebidensya iya ya saray mauges a totoo et magmamaliw a “lalon mauges.” (2 Tim. 3:13) Anto ran Makasulatan ya prinsipyo so iyaplika tayo a makatulong pian ‘magmaliw itayon malikas’ sano manpupulong?—Mat. 10:16.
2. Anto ran situasyon a mas maong so iyalis tan manpulong lad arum a lugar?
2 Onkiwas ya Makabat: Idadanet na Uliran 22:3 ya makabat so ‘pangiyamot ed inkasikatayo’ manlapud mauges. Mansiansian alerto! Say datin mareen ya lugar et nayarin biglan manguman. Nayarin naimanom ya wala ray pupulis odino totoon nanmumungkog ed karsada. No maminsan, walay maong ya householder a manpasakbay. Imbes ya manbayag ni pian mibalita, makabat so iyalis lan tampol tan diad arum la manpulong.—Uli. 17:14; Juan 8:59; 1 Tes. 4:11.
3. Panon ya onaplika so prinsipyo ed Eclesiastes 4:9 diad ministeryo tayo?
3 Mankimey a Saniiba: “Say duara sikara so magmaong nen sakey,” so inkuan na Eclesiastes 4:9. Nayarin dati ka lan manpupulong a bukor ya anggapo met so mauges ya nagagawa, balet agkasi mapeligro la itan natan? Diad arum a lugar, nayarin andi. Balet diad arum, mapeligro la parad sakey a sister odino ugaw so manpulong ya bukor ed kaabungan, lalo la no mansirunget la. Apaneknekan lan baleg ya tulong no walay partner ya alerto. (Ecl. 4:10, 12) Imanoen a naynay iray kaiba yod grupo. Agyo lilingwanay manpatanir ed saray kaiba yo no onalis kayo la.
4. Antoy nagawaan tayo pian naprotektaan so amin diad kongregasyon?
4 Bilang ‘manbabantay ed kamarerwa tayo,’ responsabilidad na saray elder so mangiter na praktikal ya giya unong ed kipapasen ed lugar da. (Heb. 13:17) Makaseguro tayo ed panamendisyon nen Jehova legan tayon ipapatnag so kapaabebaan tan sigpot ya mikokoopera ed sikara. (Miq. 6:8; 1 Cor. 10:12) Komon ta amin a lingkor na Dios et makapangiter na epektibon panagtasi ed teritorya tayo, balet ta naynay ya maalwar.