Mensahe na Dios ed Sikatayo Panamegley nen Jeremias
1. Anton publikasyon so ni-release diad 2010 a distriton kombension, tan panon tayon usaren itan?
1 Malikeliket tayo nen ni-release itan ya balon libro nen 2010 “Mansiansian Maapit ed si Jehova!” a Distriton Kombension! Ipapabitar na sayan publikasyon iray naaralan tayon leksion ed libro na Jeremias tan Tagleey ya nausar tayo ed inagew-agew a kabibilay tayo. (Roma 15:4) Imparaan iya pian usaren ed Panagaral na Kongregasyon ed Biblia, tan igapon aralen diad simba na Nobyembre 5, 2012.
2. Akin a nagunggonaan itayo diad panaral ed saray libro na Biblia ya Jeremias tan Tagleey?
2 Makagunggona Natan: Sanen nampropesiya si Jeremias, say angisulat ed sayan pinuyanan a libro na Biblia, maguloy kipapasen ed Juda. Nen unaan, say liknaan to et agto sarag itan ya asainmin. (Jer. 1:6) Pinasegsegang met na saray kabat to tan nayarin pati saray kakanayon to ed binalegan ton syudad ya Anatot. (Jer. 11:21, 22) Natural labat ya wala ray panaon ya adismaya si Jeremias. (Jer. 20:14) Legan tayon gagawaen so ingganggan ed sikatayo ya ‘ibangat iray totoo ed amin a nasyones pian magmaliw iran disipulo,’ mabetbet tayon makaeksperiensyay kairapan tan naliknay singa alikna nen Jeremias. (Mat. 28:19) Say panaral ed saray sulat to et ontulong ed sikatayon gawaen so ministeryo tayo ya makpel tan maseseg.
3. Panon tayon usaren iray kabiangan na libron Jeremias?
3 Saray Kabiangan: Aka-italic iray manunan teksto ya nepeg a basaen legan na panaral. Diad sampot na panaral kada simba, walay sakey o duaran makagunggonan tepet a nisulat ya mabaltaw, a mangidadanet ed saray manunan punto diad leksion. Nepeg iratan ya itepet ed saray dumerengel bilang repaso. Mararakep iray litrato, tan seguradon labay ya komentoan na kongregasyon.
4. Panon itayon nagunggonaan a maong ed panaral na libron Jeremias?
4 Pian nagunggonaan ya maong, iparaan lan masakbay so leksion. Nengnengen iray punto ya nausar mod bilay tan ministeryom. Naynay ya mankomento. Lapud bendisyon nen Jehova, agawaan nen Jeremias so asainmin to ya maliket tan kontento. (Jer. 15:16) Komon ta say panaral tayod sayan balon publikasyon et ontulong ed sikatayon nagawaan so ministeryo tayo a singa ed si Jeremias.