Labinduan Rason no Akin a Manpulong

Akin et ipupulong tan ibabangat tayo so maong a balita? Kasin say manunan rason et pian tulongan iray matunong a totoo ya naromog so dalan ya ompugtad bilay? (Mat. 7:14) Satan so unonan rason ya akalista dia, balet aliwan satan so manuna. Parad sika, dinan so sankaimportantian ed sarayan 12 rason no akin ya manpulong?

1. Makapangisalba itan na bilay.​—Juan 17:3.

2. Panamasakbay itan ed saray mauges.​—Eze. 3:18, 19.

3. Makatulong itan ed kagawa na propesiya.​—Mat. 24:14.

4. Napatnagan ed satan so inkatunong na Dios. Anggapoy makapangibagan ag-inikdan nen Jehova na pankanawnawa iray mauges ya magbabawi antis to ran dineral.​—Gawa 17:30, 31; 1 Tim. 2:3, 4.

5. Nagawaan tayoy obligasyon tayon mangiter na espiritual a tulong ed saray totoo ya sinaliw panamegley na dala nen Jesus.​—Roma 1:14, 15.

6. Pian ag-itayo mankasalanan ed dala.​—Gawa 20:26, 27.

7. Pian nilaban itayon mismo.​—Eze. 3:19; Roma 10:9, 10.

8. Diad satan et nipanengneng tayoy panangarod kaparan too.​—Mat. 22:39.

9. Diad satan et nipanengneng tayon uunoren tayoy Jehova tan say Anak to.​—Mat. 28:19, 20.

10. Kabiangan itan na panagdayew tayo.​—Heb. 13:15.

11. Diad satan et ipapatnag tayon inaro tayoy Dios.​—1 Juan 5:3.

12. Makatulong itan pian napasanto so ngaran nen Jehova.​—Isa. 43:10-12; Mat. 6:9.

Siempre, aliwan saraya labat so rason no akin et manpupulong itayo. Singa bilang, napapabiskeg so pananisia tayo no manpupulong itayo tan sakey a pribilehyo so pagmaliw a kakimeyan na Dios. (1 Cor. 3:9) Balet say sankaimportantian a rason no akin a manpupulong itayo et say koma 12. Ondengel man odino andi iray totoo, say panagpulong tayo et ontutulong pian napasanto so ngaran na Dios, tan lapud satan et naeebatan nen Jehova imay mamabalaw ed sikato. (Uli. 27:11) On, wala ray maabig ya rason tayon ‘ag-ontundan manbangat tan mangiyabawag ed maong a balita.’​—Gawa 5:42.