Aglilimitaay Nagawaan Mo—Ag-iisipen ya Agmo Sarag
1. Akin et talawan iray arum a mangiyaral na Biblia?
1 Kasin talawan kan mangiyaral na Biblia ta iisipen mon agmo sarag? Ontan so alikna na saray matoor a lingkor nensaman, a singa di Moises tan Jeremias. Inisip dan kulang iray abilidad pian nagawaay asainmin da. (Exo. 3:10, 11; 4:10; Jer. 1:4- 6) Ontan met so nalilikna na dakel. Panon iyan nalabanan?
2. Akin et agti labat mankokontentod pankabkaabungan tan ipiya lad arum so pangiyaral?
2 Tandaan ya amta nen Jehova no anto labat so nasarag tayo. (Sal. 103:14) Amta to a say kimey ya ‘ibangat iray totoo’ pian magmaliw a disipulo et nagawaan tayo. (Mat. 28:19, 20) Aglabat iiter nen Jehova iyan pribilehyo ed saray eksperiensyado odino maabilidad. (1 Cor. 1:26, 27) Kanian, agtayo labat mankokontentod pankabkaabungan tan akauley lay arum ya mangiyaral ed saray interesado.
3. Panon itayon ipapasal nen Jehova a mangiyaral na Biblia?
3 Ipapasal Itayo nen Jehova: Impagmaliw itayon kualipikado nen Jehova a manbangat ed saray totoo. (2 Cor. 3:5) Panamegley na organisasyon to, imbangat tod sikatayoy katuaan ed Biblia ya ag-amta na anggan saray de-aral a totoo ed sayan mundo. (1 Cor. 2:7, 8) Impaisulat to ray paraan na panagbangat nen Jesus, say Sankamaongan a Managbangat, pian naalig tayo. Tan tuloytuloy to itayon ipapasal diad kongregasyon. Ontan met, inikdan itayo nen Jehova na saray nakaukolan pian nibangat so Biblia. Sakey ed saraya so libron Ibabangat na Biblia pian naaralan so katuaan ed malinew tan mainomay ya paraan. Lapud saraya, aliwan mairap so pangiyaral na Biblia.
4. Akin a makaseguro itayod tulong nen Jehova?
4 Agawaan di Moises tan Jeremias iray asainmin da diad tulong nen Jehova. (Exo. 4:11, 12; Jer. 1:7, 8) Sarag tayo met so onkerew na tulong ed si Jehova. Diad tua, sano mangiyaaral tayo, ibabangat tayo so katuaan nipaakar ed si Jehova ya makapaliket ed sikato. (1 Juan 3:22) Kanian, gawaen tayoy anggaay nayarian tayon makapangiyaral na Biblia, say sankaliketan tan importantin kabiangan na ministeryo tayo.