“Mikareenan Kayo ed Amin a Totoo”
1. Anton simbawa na Biblia so kaukolan tayon iyaplika no walay maingongot ya napulongan tayo?
1 Sikatayo ran totoo nen Jehova et mareen, tan ipupulong tayoy kareenan. (Isa. 52:7) Balet, no maminsan et wala ray totoon maingongot no manpupulong tayod kaabungan da. Antoy makatulong ed sikatayon mansiansian mareen ed ontan iran situasyon?—Roma 12:18.
2. Akin et importantin talosan tayo ray pupulongan tayo?
2 Talosan Ira: Anggaman wala ray onsyodot lapud agda labay so ipupulong tayon katuaan, nayarin mansyodot so arum lapud sananey a rason. Ompan nibana ya aliway timing na imbisita tayo. Posiblin walay problema da. Balet anggano say pansyodotan da et say maong ya balita, tandaan tayo ya nayarin ontan so reaksion da lapud naimpluensyaan ira. (2 Cor. 4:4) No talosan tayo ra, makapansiansia tayon kalmado tan agtayo isipen ya sikatayoy pansyodotan da.—Uli. 19:11.
3. Panon tayon nipanengneng so respeto ed saray pupulongan tayo?
3 Respetoen Ira: Dakel ya totood teritorya tayo so walaan lay malmalet ya papanisiaan. (2 Cor. 10:4) Kanepegan day mandesisyon no ondengel ira odino andi. Agtayo labay ya ibaliwala iray papanisiaan na pupulongan tayo odino ipaliknan mas dakel so amta tayod Biblia nen say sikara. No paalisen da tayo, nepeg ya marespeto tayon onalis.
4. Antoy labay ya ibaga na pansalitay maabig?
4 Mansalita na Maabig: Anggano pansalitaan da tayoy mauges, kaukolan ya maabig tan kalmado so ebat tayo. (Col. 4:6; 1 Ped. 2:23) Imbes ya misangsangan, gawaey anggaay nayarian ya mananap na topic ya makapantunosan tayo. Sarag tayon mataktikan tepeten no akin ya onman so panmoria na katongtong tayo. Pian agla naarumay syodot da, no maminsan et mas maabig no manpatanir tayo la.—Uli. 9:7; 17:14.
5. Anto ray maabig ya resulta no mikareenan tayo diad ministeryo?
5 No mansiansia tayon mareen, nayarin satan so natandaan na apulongan tayo tan ondengel la no wala lamet so manpulong ed sikato. (Roma 12:20, 21) Anggano singa opposer ya talaga, ompan nasabi panaon et magmaliw lanlamang ya agi tayo. (Gal. 1:13, 14) Magmaliw man ya interesado odino andi, napagalangan tayoy Jehova tan nipanengneng tayoy dakep na ibabangat tayo no pansiansiaen tayoy panangontrol ed dili tan mikareenan itayo.—2 Cor. 6:3.