“Sigpot a Mantasi”
1. Anto so maabig ya alimbawa nen apostol Pablo diad ministeryo?
1 “Sigpot mon sumpalen so ministeryom.” (2 Tim. 4:5) Matalek si apostol Pablo ya ibaga iyad si Timoteo ta asumpal toy amitlon impanbiahe to bilang misionero manlapud 47 anggad 56 C.E. Aminpigan binitla na libron Gawa so ‘sigpot ya impantasi’ nen Pablo. (Gawa 23:11; 28:23) Panon tayo met a nagawaan itan natan?
2. Sano mankakabkaabungan, panon itayon sigpot a makapantasi?
2 Panagkabkaabungan: Pian nakatongtong iray totoon agnin balot akarengel ed maong a balita, ompan kaukolan tayon uman-umaney oras na idalaw tayo. Nayarin diad labi odino diad weekend tayo labat nasabian iray akan-abung. Panggunaetan tayon walay nakatongtong ed kada abung tan pawilen a pawilen iramay anggapoy too. Panon to no aminpiga ka lan linma balet ta anggapo nin siansiay asabian mo? Ompan makatulong so pansulat odino itawag ed telepono.
3. Anto ray pankanawnawan makapanpulong kad publiko tan impormal?
3 Publiko tan Impormal ya Paraan: Ipapakabat na saray lingkor nen Jehova natan so “tuan karunongan” ed amin ya ondengel. No maminsan, gagawaen da iya diad “karsada” odino diad “plaza.” (Pro. 1:20, 21, NW) Diad saray rotina tayod inagew-agew, kasin manaanap tayoy pankanawnawan makapanpulong? Nibaga kasin ‘uusaren tayoy amin a panaon tayo parad salita na Dios’? (Gawa 18:5) No ontan, gagawaen tayoy obligasyon tayon “sigpot a mantasi.”—Gawa 10:42; 17:17; 20:20, 21, 24.
4. Panon a makatulong so pikakasi tan panagdalepdep pian sigpot itayon mantasi?
4 No maminsan, lapud mabapbaing odino wala ray kakapuyan tayo, ngalngali agtayo manpulong. Seguradon natatalosan nen Jehova iray limitasyon tayo. (Sal. 103:14) Balet sarag tayoy onkerew na pakpel ed sikato pian makapansalita. (Gawa 4:29, 31) Ontan met, sano manpepersonal study tan mandadalepdep ed Salita na Dios, nayarin ikdan tayo na imano no panon tayon napaaralem so apresasyon tayod “mabmablin” maong a balita. (Fil. 3:8) Saya so mamakiwas ed sikatayon maseseg ya manpulong!
5. Panon itayon makapibiang ed pakagawa na propesiya nen Joel?
5 Impasakbay na propesiya nen Joel ya antis na isabi na baleg tan makapataktakot ya agew nen Jehova, saray totoo na Dios et ag-ontunda, tan agda abuloyan so antokaman a mangamper ed sikaran manpulong. (Joel 2:2, 7-9) Komon ta sigpot itayon mibiang ed panagpulong a kimey ya aglan balot naulit!