Manseet Diad “Sigpot a Panagtasi”

1, 2. Anto so pandinayewan yo nipaakar ed panmoria nen Pablo ed panagpulong na maong a balita, tan panon tayon naalig so ehemplo to ed “sigpot a panagtasi”?

¹ Singa si Jesus tan dakel nin arum a matoor a lingkor nensaman, si apostol Pablo so maseseg a managpulong na maong a balita, a ‘sigpot a nantasi’ diad antokaman a kipapasen. Anggan sanen sikatoy impangaw ed sakey ya abung, “inawat to ra ya amin so linma ed sikato, ya impupulong to so panarian na Dios, tan imbabangat to so saray bengatlan nipaakar ed Katawan a Jesu-Kristo, dia ed mabulos.”​—Gawa 28:16-31.

² Nayarian tayo met so magmaliw a maseet diad “sigpot a panagtasi” ed amin a panaon. Kabiangan ed satan so pantasi ed totoon naaabet tayo sano manbiabiahen mamaarap ed saray asamblea tan kombension odino legan a manbiabiahe pian manbakasyon.​—Gawa 28:23, NW; Sal. 145:10-13.

3. Panon tayon napaliisan a pagmaliwen so impormal a panagtasi ya incidental lambengat?

³ Incidental Odino Impormal a Panagtasi? Wala tay pandumaan na saya? On wala. Say incidental et basta labat la nibanbana odino agginetma, a singano ag-implano odino aliwan tanton importante. Peteg ya aliwan ontan so ministeryo tayo. Singa ed si Pablo, importante ed sikatayo so panangidayew ed Dios panamegley na panagtasi tayo, tan nepeg a getmaen tayo so manpulong sano matukoy legan a manbiabiahe diad sayan tiagew. Balet, say paraan na iyaasingger tayo ed arum so dugan natawag ya impormal, salanti relaks, makaaro, tan natural. Sayan metodo so mamawala na maabig iran resulta.

4. Anto so akatulong ed si Pablo a makapantasi diad panaayaman to?

⁴ Manparaan a Mantasi: Si Pablo so kaukolan a mamalesa na saray pankanawnawa pian makapantasi legan a sikatoy nipangaw ed abung diad Roma. Sikatoy inmuna lan kinmiwas ya angimbita ed saray lokal a Judion lider diad ayaman to. (Gawa 28:17) Anggaman wala lay kongregasyon na saray Kristiano diad Roma, naamtaan nen Pablo a samet labat so pikakabat na Judion komunidad ed satan a syudad nipaakar ed pananisia na saray Kristiano. (Gawa 28:22; Roma 1:7) Agto inkibot so “sigpot a panagtasi” nipaakar ed si Jesu-Kristo tan say Panarian na Dios.

5, 6. Antoran pankanawnawa a nayari itayon impormal a makapantasi, tan anto so gawaen tayon panagparaan pian epektibon nagawaan itan?

⁵ Sano manbiahe, masakbay lan isipen so amin a naabet yon totoo a dagdaiset so amta ra nipaakar ed saray Tasi nen Jehova. Ompan agda ni anggan amta a mangiyoopresi itayo na libren panagaral ed Biblia. Magmaliw ya alerto ed saray pankanawnawa a makapantasi ed saramay naabet yo legan a manbiabiahe, ontutunda pian manpainawa, manpapagasolina, mansasaliw, ontutuloy ed saray hotel, mamangan diad saray restawran, akalugan ed mapublikon luluganan, tan arum ni. Masakbay lan iplano no anto so ibaga yo pian nigapo so tongtongan tan makapantasi a magano. Nayarin diad onsaginonor iran agew et makapanpasal kayo panamegley na impormal a pantasi ed saray kakaabay yo, saray kakanayon, katrabahoan, tan saray arum a kabat yo.

⁶ Kaukolan a walay suplay yo na saray publikasyon ya usaren sano impormal a mantatasi. Dinan iratan? Nayarin usaren yo so tract a Labay Moy Makaaral nin Maong Diad Biblia? Ipabitar so manunan limaran parapo, a ditan et nidalatdat so nanduruman rason ed pambasa na Biblia. Ipanengneng so kahon ed beneg parad ikerew na sakey na libren panagaral ed Biblia. Sano makaromog kayo na too ya onkiwas, iyopresi so Kakaukolanen a brosyur. Pian akaparaan sano makaabet na totoon mansasalita na duman lenguahe, awiten so bokleta a Good News for All Nations. Ipapaliwawa na pahina 2 no panon itan ya usaren pian makapantasi. Sano manbiabiahe, nayarin mangawit kayo na pigaran manunan publikasyon parad saramay mangipatnag na peteg ya interes ed mensahe na Panarian.

7, 8. Anton pasakbay nipaakar ed itsura tan kondukta tayo legan a manbiabiahe odino manliligliwa so nepeg tayon ikdan na imano?

⁷ Imanoen so Itsura tan Kondukta Yo: Nepeg tayon seguroen a say kondukta, panangawes, tan panag-ayos tayo so agmangiter ed arum na lingon impresyon odino sengegan na ‘pansalita [ra] sumpa’ ed organisasyon nen Jehova. (Gawa 28:22) Aglambengat onaaplika iya sano onaatendi ed saray asamblea odino kombension noagta legan met a manbiabiahe tan manrerelaks. Oniay impasakbay na Agosto 1, 2002 a Panag-Bantayan, pahina 18, parapo 14: “Say itsura tayo so agnepeg a maparayag, akulastay, makasagyat, mankaninag, odino miuuso. Niarum ni, nepeg itayon mankawes ed paraan a ‘mangigagalang ed Dios.’ Satan so bengatlan panumamengan, agta ontan? Aliwa lambengat itan a pankawes na matukoy sano onatendi ed saray miting ed kongregasyon insan akulastay la no arum a pankanawnawa. Say personal ya itsura tayo so nepeg a mangipatnag lawas na mapagalang, marespeton awawey lapud Kristianos tan ministros itayo ed loob na 24 oras ed kada agew.”​—1 Tim. 2:9, 10.

⁸ Nepeg a mangawes itayo a masimpit tan tekep na dignidad. No say itsura tan kondukta tayo so lawas mangisisindag ed sisisiaen tayo ed Dios, agtayon balot masuyat a mantasin impormal makasengeg ta say itsura tayo so singa aliwan ministro.​—1 Ped 3:15.

9. Anton intalona so niwala diad impantasi nen Pablo ed Roma?

⁹ Say Impormal a Panagtasi so Mabunga: Legan na duay taon a si Pablo so nipangaw ed sakey ya abung diad Roma, anengneng to so maabig iran resulta na impantasi to. Inreport nen Lucas a “saray arum [et] anisia ra ed saray salita to.” (Gawa 28:24) Inusisa a mismo nen Pablo so inkaepektibo na ‘sigpot ya impantasi’ to sanen insulat to: “Saray bengatla ya agawa ed siak asumpalan da so lalon mamapaaligwas na ebanghelyo; a dia ed saya saray inkabalorbalor ko pinmatnag ed Kristo ed amin na saray bantay a Pretoriano tan ed saray arum ni; tan say karaklan ed saray agagi ed Katawan, mailalo ra ed kakanaan na saray inkabalorbalor ko, nagnap ira ed tepel a mangisalita na salita na Dios ya anggapoy takot.”​—Fil. 1:12-14.

10. Anton intalona ed panagtasi so agawaan na sanasawa nen imbeneg a tiagew?

¹⁰ Nen imbeneg a tiagew, kayari na sanagew a kombension, awalaan so sakey a sanasawa na mabungan eksperiensya diad impormal ya impantasi ed sakey a serbidora a nantepet ed sikara nipaakar ed badge card da ed kombension. Imbaga da ed sikato so nipaakar ed kombension tan ontan met ed ilalo ya iyoopresi na Biblia para ed arapen na katooan. Sikatoy inikdan da na tract a Labay Moy Makaaral nin Maong Diad Biblia? tan impaliwawa da so uksoyan a libren panagaral ed Biblia. Inkuan na bii a labay ton walay ondalaw ed sikato, insulat to so ngaran tan address to ed beneg na tract, tan inkerew to ed sanasawa a mangiyuksoy ed satan. Anton itatalona so nayarin panggayagaan yo diad pagmaliw a maseet ed “sigpot a panagtasi” diad amin a pankanawnawa?

11. Antoran kalidad so nepeg tayon bayuboan pian niyabante so maong a balita diad “sigpot a panagtasi”?

¹¹ Sigpot ya Iyabante so Maong a Balita: Isipen pa so inkaliket nen Pablo sanen nadngelan to ya aaligen na kaparan Kristianos so maseseg ya ehemplo to! Komon ta gawaen tayo so anggaay nayarian tayo ya iyabante so maong a balita diad pantasi ed amin a pankanawnawa nipaakar ed nibase ed Biblia a sisisiaen tayo.

[Kahon ed pahina 3]

Saray Nakaukolan a Publikasyon Parad Impormal a Panagtasi

■ Labay Moy Makaaral nin Maong Diad Biblia? (tract)

■ Anto so Kakaukolanen na Dios ed Sikatayo? (brosyur)

■ Good News for All Nations (bokleta)

■ Arum niran publikasyon